بعد از آن حضرت رسالت پناه ﷺ مبعوث گشت و بیست روز بعد از بعثت شیاطین را هم گوید
از کتاب:
روضة الصفا
اثر:
میرزا عبدالقادر پاوه‌ای (1850-1910)
2 دقیقه
487 مشاهده
چوون تایفەیی جن ئەولاد جان بین
گشت ساحێب مەنزڵ جە ئاسمان بین
ئەوەڵ گرەوان، کێشان ئاهـ سەرد
جە ڕەجم شەیتان خۆفشان نە دڵ بەرد
تەمامی یەکسەر زەرد و زایف بین
گرۆی کەم نوسرەت ئەهل تایف بین
هەر یەکێ ناقە یا خۆ گوسفەندێ
مەکەردش وە زێبح بێ چوون و چەندێ
نە ڕاگەی بوتان سەرفشان مەکەرد
دایم مەناڵان جە داغ و جە دەرد
تا ئەمواڵشان گشت بەرشی جە دەس
جنس و نەقدشان بی بە خار و خەس
جەو دما پەنا وە بوتان بەردن
هەم جنی یەکسەر مەشوەرەت کەردن
واتن ستاران هیچ نمەبان کەم
ئەموال ئێمە گشت شی وە عەدەم
جەو دما گشت تەرک عادەت کەردشان
بادەی ڕەزالەت مێحنەت وەردشان
ئێبلیس خەتاب کەرد وە زوڕییەی وێش
وات ئەمرێ ڕوودان نمەز چێشەن چێش
نوقتەی سەرزەمین پەشێو مەوینوون
ڕەهبانان عاجز بوتخانان مەحزوون
ئەجیننان کیاست گشت وە هەوڵناک
وە هەر زەمینێ هەر یەک مشتێ خاک
ئاوەردن وە لاش یەکایەک بۆ کەرد
مولاحیزەی مڵک گرۆ گرۆ کەرد
تا مشتێ خاک سەحرای تەهامە
وەش بۆ تەر خەیلێ جە بۆی شەمامە
بۆ کەرد و واتش «یوم المحشر»ەن
ئی بۆ هەر بۆی خاک پای پێغەمبەرەن
چێش کەروون هانا هەی داد هەی بێداد
کەردەم گشت عەبەس ڕەنجم شی وە باد
دەرد بێ دەرمان وەی وە یانەم وەی
نەمام شادیم جە نۆ کریا پەی
توخم پاشیدەم جە زەمین بڕیا
بەرگ زەحمەتم جە لای حەق دڕیا
مەعزوول بیم جە تەخت فەرمان فەرمای وێم
جە تەوق لەعنەت بەدتەر ئاما پێم
ئەهل کوفر و شرک گشت مەبۆ پاماڵ
بوتان گشت باتڵ بوتخانان بەتاڵ
موحەممەد خاتەم پێغەمبەرانەن
شەفیع موختار «يَوم القيامعربی»ەن
تەبەعەی من گشت وە دەوان دەو
مەبۆ گشت بشۆ وە ئێتاعەی ئەو
با بەحس شەیتان بمانۆ جارێ
هەم بەیان مەبۆ بەڵ جە کەنارێ