ذکر وقایع سال سی و پنجم از ولادت حضرت مقدس نبوی و بیان بعضی امور که بعد از آن تا حین بعثت به ظهور پیوست
از کتاب:
روضة الصفا
اثر:
میرزا عبدالقادر پاوه‌ای (1850-1910)
5 دقیقه
387 مشاهده
حەزرەت جەو دەمدا جە مەککەی ئاوا
عومر شەریفش وە سی و پەنج یاوا
چەند وەقایعات چەند مەهلەکەی سەخت
ڕوودا یەکا یەک بە وەخت و نا وەخت
زات بێ زەواڵ تاک تەنیای فەرد
جە شەڕ دوشمەن موحافێزەش کەرد
جە بەعزێ کوتوب سیەر مەستوورەن
جە لای ڕاویان وەی تەور مەشهوورەن
فاتمەی زەهرا حەق ڕازی بۆ لێش
جەو ساڵ پەیڎا بی جە لای قەوم و خوێش
خاترش زیاد خەیلێ عەزیز بێ
هەر بە ئەتفاڵی ساحێب تەمیز بێ
تا عومر حەزرەت یاوا بە سی و هەشت
تەنها جە سەحرا مەکەردش گوڵ گەشت
مەیاوا وە سەمع شەریفش هەر سات
بە ئاواز بەرز کەڕات و مەڕات
شەجەر و حەجەر نەباتات یەکسەر
سڵام مەکەردن گشت وە پێغەمبەر
ڕۆشنی عەجەب هەم مەدی وە چەم
خۆف مەبەرد نە دڵ چەم مەنیا وە هەم
بەڵێ بە ئەسەح ئەسڵ حێکایەت
وەی تەورە ڕاوی کەردەن ڕێوایەت
قەریب بە بێعسەت ئامای ڕۆحانی
نەزدیک بە نزوول وەحی ڕەبانی
تەشریف حەزرەت نە تۆی ئەندەروون
هەر وەخت پەی کارێ مەشی وە بیروون
شەجەر و حەجەر یەکسەر وە «لبيكعربی»
مەوات «يا رسول سلام عليكعربی»
وە هەر جا حەزرەت تەشریفش مەبەرد
هەر ئەشیا پەی وێش سڵامش مەکەرد
حەزرەت جەی ئاواز جەی دەنگ و بێ دەنگ
حەیران مەندە بێ جە لای دار و سەنگ
یەمین و یەسار نگا مەکەردش
کەس نەبێ چوون خۆف نە دڵ مەبەردش
نەو جا مەگورێزا بە وێش مەڎا دەور
مەشی وە جایێ هەنی هەم بەو تەور
جەو دما وە حوکم شای «لا تناهيعربی»
ئاسار ئەنوار لوتف ئێلاهی
زات عەقیدەش وە حەق کەرد کامڵ
جای سەراچەی دڵ حەزرەت کەرد مەنزڵ
سەفحەی زەمیرش بە غەیر جە ئەڵڵا
خاڵی بی تەمام جە «ما سوى اللهعربی»
مەیل حەق بەو تەور نە دڵ نەقشش بەست
جە گشت ئموورات غەیرە کێشا دەست
قەتع کەردش نە دڵ مەیل عەلایق
لا بەرد ئێختێلاف چەنی خەلایق
مەرتەبەی عەشقش بەو جاگە یاوا
هەر شەو تا وە سوبح، سوبح تا خورئاوا
یاڎش هەر ماوای یاڎ خوڎا بێ
کەی خوڎا جە ئەو یاڎش جودا بێ
مەواتن عەرەب گومڕای دەروون ڕەق
نەدین موحەممەد عاشقەن وە حەق
چوون مەبۆ کەسێ دڵ پەسەندیدە
عاشق بۆ وە یاد خوڎای نادیدە
تەسویر خەیاڵ نەفسانی نە دڵ
وە ئاو ئێغماز شوستەن وێنەی گوڵ
تەشریف بەرد پەی بەیت کەعبەی موعەززەم
مەکەردش تەواف بارەگای حەرەم
مەنزڵ جە کۆی بەرز حەرا دا قەرار
شەوان تا وە ڕۆ، ڕۆ هەم تا ئێوار
بە قاعیدەی قەسر تەوەجوو کەردش
وەی تەور ڕیازەت دایم مەبەردش
ڕای عبودییەت وەی تەور گێرت نە وەر
مەحکووم بی وە حوکم دەهندەی داوەر
گاهێ پەی کارێ شای گەردن بێ گەرد
تەشریف وە حوجرەی خەدیجە ماوەرد
ئەندەکێ ڕۆزی زاد قورس جۆ
مەبەردش دیسان ڕوو مەنیا پەی کۆ
هەم جە کۆی حەرا مەعبەدگای جاران
ئەوقات سەرف مەکەرد جە ڕۆزگاران
هەر بە عێبادەت شای فریشتە خۆ
ڕۆ مەکەرد وە شەو، شەو مەکەرد وە ڕۆ
حوجرەی دەروونش وە حوکم شاهی
مەنقووش بی وە نەقش ئایەی ئێلاهی
«روح الأمينعربی» بی بە موعەللێمش
لەفز فورقان کەرد بە تەکەللومش
سینەی بێ کینەش ساف مەحفووز کەرد
شارەزای ئەوزاع «لوح المحفوظعربی» کەرد
سوب جە کۆی بەتحا شەمس نبووەت
یاوا وە حەرا بورج ڕێسالەت
باڵاش بی بە جای حێلم و ستایش
وە خاتەم خەلعەت دریا ئارایش
جە لوتف بێ چوون پادشای بێ باک
فەرقش فایز بی بە تاج «لولاكعربی»
دەروون پاکش چوون ئایێنەی ساف
مەنمانا دنیا جە قاف تا وە قاف
وەحش و تیوور و خاک و هەرد و بەرد
یەکسەر گشت چەنیش گفتوگوو مەکەرد
شیرین حەیا و حێلم شیرین دوا و دەنگ
شیرین خولق و خۆ شیرین شێوە و ڕەنگ
مەولای ڕووباری خاسش فەرماوان
چوون بار بێعسەت بە حەزرەت یاوان
ئەگەر موعجێزەش نەبیا چۆتەری
جەماڵش وەس بێ پەی پێغەمبەری
ئێبتێدای دنیا تا وە ڕۆی مەحشەر
جوملەی موسەننێف، واسێفان یەکسەر
گشت وە تەسنیفات تا وە ڕۆی مەردەن
کەس وەسف حەزرەت تەمام نەکەردەن
غەیر جە خوڎاوەند وەسف ئەو زانان
جە کەلام وێش مەدح ئەو وانان
وەسفش جە سحووف کەردەن پەی ئادەم
پەی شیس و ئیدریس دایم، دەما دەم
پەی موسای کەلیم دایم جە تەورات
چەند کەردەن سەنای خواجەی کائێنات
پەی نووح نەبی دیسان هەم پەی هوود
وەسفش جە زەبوور کەردەن پەی داوود
چەند جا جە ئێنجیل ئەوساف خاتەم
خوڎا کەردەن پەی عیسا بن مەریەم
سی جزمەی قورئان کەرد وە خەڵاتش
یەکسەر ئێشارەن جە موعجێزاتش
ئەغڵەب ڕمووزات تۆی پشت پەردەن
خوڎا حێکایەت پەی حەزرەت کەردەن
وە مقدار ئەرز، بەرزی سەماوات
وە دیدار پاک موحەممەد سەڵوات