در بیان اولادان سام و حام و یافث و تفرقه شدن ایشان و معمور بودن و آبادی کردن
از کتاب:
روضة الصفا
اثر:
میرزا عبدالقادر پاوه‌ای (1850-1910)
2 دقیقه
323 مشاهده
ئەولاد یافس نە ڕووی دەهر دوون
زیاد بی تەمام نە ڕوبع مەسکوون
بین بە سی و شەش نەوع، بێ زیاڎ و کەم
گشت گرۆ گرۆ موختەلێف جە هەم
بە سی و شەش زەبان لوغەت ماوەردن
تەکەللوم چەنی یەکتەر مەکەردن
یەک جە حەرف یەک نمەبی حاڵی
تەشخیس نمەڎان شیرین جە تاڵی
ئیسە هەر چی تورک ڕووی سەر زەمینەن
ڕووم و ڕەوەندی و چین و ماچینەن
ئێسلام یا تەرسا، مەجووس یا جهوود
جە نەسڵ یافس ئامان بە وجوود
دیسان حام چەنی فەرزەندان وێش
ڕای دوور ساحل موحیت گێرت نە پێش
جە سەحرای جنووب ئێقامەت کەردن
دەس پەی عەمارەت زێندەگی بەردن
جە نەشئەی تەئسیر بەرق دوعای نووح
جە ئەنفاس پاک سوب سەحەرگای نووح
فەرزەندان حام سەغیر و کەبیر
زکوور و ئوناس سیا بین چوون قیر
حام چەندین ئێقلیم قسمەت کەرد لێشان
خوڎا دەوڵەتێ عالی دا پێشان
گرۆی ئەوانیچ تا بین وە هەژدە
بەعزێ وە ئەسنام مەبەردن سوجدە
وە هەژدە زەبان مەکەردن تەقریر
هەر یەک یەک لوغەت عەجیب و دڵگیر
ئێقلیم مەغرێب کەردشان بەش بەش
یەک شی وە سوودان، یەکێ وە حەبەش
یەکێ هێندوستان، یەکێ زەنگبار
شاران، نەیدەران، یەکسەر دان قەرار
ئەغڵەب جە قانوون قەدیم ویەردن
هەر کام ئایینێ ئێختیار کەردن
مێللەت مێللەتان ئیسە ها عامەن
فێشتەرش نوتفەی ئەولاد حامەن
هەر چەند حەبەشی و هێند سیا ڕەنگ
توخم ناشیرین زشت بەدئاهەنگ
گەدا و کۆنەدڕ، ڕەزیل و ئەدبار
نەوکەر و غوڵام عەبد و خدمەتکار
جەی دنیا یەکسەر گشت ناتەمامەن
ئانە گشت ڕیشەی ئەولاد حامەن
بەڵام چوونکە نووح «عليه السلامعربی»
دوعای خەیرش کەرد پەی ئەولاد سام
وات زومرەی ئەولاد تۆ ئەنبیا بان
باقی هەر تالێب کەسب حەڵاڵ بان
وە حوکم فەرمان دانای «لَم يزلعربی»
ئەولادان سام ئەنبیای مورسەل
نۆ فەرزەند ئەو بی بە نۆ هەزار
جە ڕووی دنیای دوون گێرتشان قەرار
حێجاز و عێراق مەککە و مێسر و شام
فارس و ئێقلیمات خوراسان تەمام
مەعموورە وەسەت دنیای دوون یەکسەر
بی بە موڵکشان وە ئەمر داوەر