گفتار در بیان نور حضرت فخر کائنات ﷺ و خلقت بهشت و دوزخ گوید
از کتاب:
روضة الصفا
اثر:
میرزا عبدالقادر پاوه‌ای (1850-1910)
2 دقیقه
479 مشاهده
سا چوون ڕۆی ئەزەڵ بینای بێ ئەندێش
زات بێ زەواڵ قەدیم وێش بە وێش
نە خاک، نە زەمین، نە ئاسمان بێ
نە مەلائێکە، نە ئێنس و جان بێ
نە عەرش، نە زەمین، نە سەیارە بێ
نە ماە، نە خورەشید، نە ستارە بێ
نە لەوح، نە قەڵەم، نە جبرەئیل بێ
نە بەهەشت، نە حوور، نە سەلسەبیل بێ
نە نار، نە دووزەخ، نە خەیر و شەڕ بێ
نە ئاو، نە ئاوان، نە بەحر و بەڕ بێ
بە غەیر جە مەعبوود فەرد تەنیای تاک
زی بەشەر نەبێ غەیر جە زات پاک
نە باد، نە باران، نە ڕۆ، نە شەو بێ
نە ڕۆح، نە ئەجەڵ، نە خۆف، نە خەو بی
حەق جە نوور وێش نە تۆی پەردەوە
نوور حەزرەتش جیا کەردەوە
زات بێ زەواڵ وێش کەرد وە یارش
سەڵوات دا وە ڕووی دین و دیدارش
جەو دما بێ باک تاک تەنیای فەرد
قەڵەم وە قودرەت ئافەریدە کەرد
فەرما بنویسە. قەڵەم عەرزش کەرد
من چێش بنویسوون تاک تەنیای فەرد
فەرما ئەوەڵ «لا اله الا اللهعربی»
دووەم موحەممەد ئەو «رسول اللهعربی»
بەعد سازنا ئەفلاک ئەزرەق
یەک یەک وە مەجبوور تەبەق عەن تەبەق
لەیل چەنی نەهار، دەقیقە و ساعەت
فەسڵ و مانگ و ساڵ، سەعب و سەعادەت
خوەرشید و قەمەر چەنی ستاران
ڕەعد و بەرق و باد، هەور چەنی باران
وە یەک ئیشارە بینای بێ ئەندێش
سازنا جە نوور، موحەممەد وێش
تەمام کەرد تەرتیب هەر هەفت ئاسمان
عەرش و کورسی و فەوق، لەوح و لامەکان
ئەوەڵ جبرەئیل، دوهەم میکائیل
سێهەم ئیسرافیل، چوارەم عیزرائیل
هەر چوار موقەڕەب ئیجاد کەرد جە نوور
پەی خدمەت کاری دایم جە حزوور
«روح الأمينعربی» کەرد وە پەیک ڕاهان
پەی ئاما و لوای لای ئەنبیاهان
میکائیل ڕزقش دا وە دەستەوە
ڕۆزی مەخلووقات خاس و گەستەوە
دا وە ئیسرافیل لوولەی نەفخ سوور
ڕۆی دنیا ئاخر، دەم دۆ لێش زەروور
نام عیزرائیل بەر ئاوەرد وە بەر
کەردش وە قابز ئەروای زی بەشەر
وە حوکم و فەرمان پادشای غەفوور
باقی ڕۆحانی پەیدا بین جە نوور
مڵک و لامەکان، لاهووت و ناسووت
پەڕ بی جە مەلەک گرۆی مەلەکووت
کەریم کار ساز بێ مێسل و نەزیر
پادشای عادڵ تەنیای بێ وەزیر