نامه نوشتن حضرت ﷺ به خسرو و او را نصیحت و توبیخ فرمودن که شاید دین مبین اسلام را قبول کند
از کتاب:
شیرین و خوسرەو
اثر:
خانای قبادی (1704-1778)
5 دقیقه
423 مشاهده
خسرەو نامەی شۆخ مونشیی ئەی نامە
ئەی نامەی شیرین عەنبەر شەمامە
جەناب جەمشید موڵک شەریعەت
مەتڵەع دیوان غەڕڕای نوبووەت
وەختێ مەبعووس بی بە نێک ئەختەری
ژەندن بە نامش نای پەیغەممەری
ڕەقەم کەرد نامەی فەساحەت فەجام
بە پادشاهان کاففەی خاس و عام
فەرماش بە خوسرە، ئەو فریشتە فەڕ
بنویسان شەرحێ شیرین چون شەکەر
کاتب «حسب الامرعربی» سەیید موختار
بەی تەور کەرد تەحریر نامەی گەوهەر بار
ئەووەڵ چون تووتیی سوخەن شەربەت بێز
بە «بسم اللهعربی» کەرد قەڵەم شەکەر ڕێز
ئاخر وات بە نام ئەو کەس کە زاتش
نمەیۆ نە زەبت قەڵەم سیفاتش
یەکتای بێ شەریک حەیی لا مەوتەن
غەنی جە وەسفەن، بەری جە فەوتەن
سەمیعەن بێ گۆش، گۆیان بە بێ دەم
مەوجوودەن بێ جیسم، بەسیرەن بێ چەم
ئەو دان بە شاهان جەم بای جەمشید تەخت
تاج زەڕ نیگار زەروەی تاج و تەخت
تا کە ڕەزاشەن ئەو بێ مونا و مەین
نە عەرسەیی دەور بە «طرفة العينعربی»
شاهان قەدیم دارای هەفت کیشوەر
مدەرۆ بە ئاو سەر چەنی ئەفسەر
جە لای شاهیی ئەو، گشت شەهریاران
بەندە گەدایێ وجوود نەداران
سا تۆ هەی عاجز خوسرەو نامتەن
ئەر چون کەیخوسرەو مەی نە جامتەن
وەر چون سکەندەر سوپا و سانتەن
ئەر شان و شەوکەت سولەیمانتەن
ئەر مشی نە چەرخ چون زوهرەی ڕەققاس
نەخواهی جە دەس مەرگ ببی خەلاس
ڕوو مەکەر بەی نەحو بە نادروستی
بویەر جە مەزهەب ئاتەش پەرستی
وەس سوجدەی ئاهیر ئاتەش خانە بەر
خۆف بکەر جە ڕۆی واوەیلای مەحشەر
سوجدە و ستایش سزای ئەو کەسەن
فەردەن، قەدیمەن، هەم فەریاد ڕەسەن
پەرستش سیوای زاتش بێ سوودەن
ئاتەش پەرستی شێوەی نەمروودەن
بدەر ئەر گەدا، ئەر پادشاهی
بە وەحدانییەت زاتش گەواهی
وەرنە جەی دنیا بەد کردار مبی
جە ڕۆی مەحشەر هەم شەرمەسار مبی
وەختێ ئەی نامەی عەزیز جەو ماوا
بەی تەور جە مەتڵەع تا مەقتەع یاوا
موزەییەن بە موهر نوبووەت کەردش
بە شەخسێ ئەمین عەرەب سپەردش
ئەو شەخس ئەمین ڕۆ نەکەرد بە شەو
یاونا نامەی ڕەسوول بە خوسرەو
خوسرەو چون عینوان وەسیقەی ڕەسوول
یاوا پێ، وەندش بە خاتر مەلوول
غوروور شاهی داش نە کەللەی سەر
جە زوڵف شیرین بی ئاشفتەتەر
وات: کەسێ چێشەن نە ڕووی سەرزەمین
چەنی وێنەی من شاهێ جەم نگین
ئەر سەد ئەسکەندەر «ذو القرنينعربی» وێش بۆ
ببۆ بە هامسەر، جێم بێ ئەندێش بۆ؟
هەرچەند بێ خۆف بۆ جە شکۆ و سامم
نامش بنویسۆ جە باڵای نام
ئێد وات بە غەزەب ئەو شووم ستارە
مەکتووب ڕەسوول کەرد پارە پارە
چون فروستادەی «فَخر العالمينعربی»
دیش ئەو فیعل زوشت جەو شووم بێ دین
هۆرێزا دڵگیر چون باد ئەی خەبەر
یاون بە سەمع سەیید سەروەر
دوعای بەد کەرد لێش شای دارا ڕیکاب
دوعاش بی دەرلاد دەردەم موستەجاب
جەودما بە حوکم زات ئیلاهی
جە فەوق کیسرا کەفت تاج شاهی
موعجیزەی ڕەسوول سەیید سەروەر
سالار ڕەشید مەعرەکەی مەحشەر
ئاشفتەتەر کەرد ڕوتبەی شاهی لێش
جت زوڵف شیرین شیرین شێوەی وێش
ئەسحاب تەئریخ گوزەشتەی ساڵان
دانایان دەور ساحێب کەماڵان
بەی دەستوور بە ڕەشح خامەی خۆش تەقریر
نەخش کەرد سەفحەی سیم ئەی زێبا تەحریر
وەختێ کە خوسرەو جە ڕای نادانی
مەکتووب ڕەسوول حەیی ڕەببانی
پارە کەرد بە خیشم بێ خۆف و ئەندێش
جەو سەبەب چەند دەرد مەینەت یاوا پێش
ئەووەڵ بە سەمووم گڕەی دۆزەخ بێز
بین بە کۆی زوخاڵ گوڵگوون و شەبدێز
دووەم لەشکرش نە حەوبەی ئێڵغار
بە تەقدیر حەق گشت بین نیگوون سار
سێیەم یەک شەخسێ پڕ سام سەنگی
پەیدا بی وەنەش چون شێر جەنگی
چۆپێ گرت بە دەس بە چەند جا مەڕدش
ڕێزە ڕێزەش کەرد، بە یەکدا هەڕدش
واتش: من ئەو شەخس ساحێب عەمامەم
جە ڕای نادانی پارەت کەرد نامەم
منیچ چون ئەی چۆ شکەستم دینت
بەر ئەفگەندەم کەرد دین و ئایینت
پولێ کە هەم داشت جە ئاهین خوسرەو
سەختتەر بی جە سەد سکەندەری ئەو
ئەو پول بە چەند مانگ، چەند جەفا پەستش
سەیل عەزیمێ ئاوەرد شکەستش
ئەو ڕۆ جە ئیعجاز ئەو شای دەریا دڵ
بەی تەور بەڵایێ پەرێش بی نازڵ
بنازوون بە فەخر «رب العالمينعربی»
یەعنی موحەممەد شەمع شەرع و دین
جە عەرسەی دەوران بەڕۆ تا بە شەو
بەی تەور عاجز کەرد بە ئیعجاز خوسرەو
بنازوون بە قەدر سەیید سەروەر
شاهان جەم جای عەرسەی هەفت کیشوەر
گشت بە بەندەگیش منەت مبەردن
هەر سوبح و هەر شام سوجدەش مکەردن
جیهان تا جیهان توفەیل ڕاشەن
عەرش ئەعزەم فەرش نەعلەین پاشەن
سەرخێڵ و سەرهەنگ فەوج ئەبرارەن
ڕەشید مەیدان «يوم القرارعربی»ەن
«خاناتخلص» بە سەرگەرد بەرزیی پایەش بۆ
بە فیدای قامەت تووبا سایەش بۆ
هەرچەند عاسیەن شووم شەرمەسار
پەناش هەر ئەوەن جە «يوم القرارعربی»