دلالت کردن شاپور خسرو را
از کتاب:
شیرین و خوسرەو
اثر:
خانای قبادی (1704-1778)
2 دقیقه
404 مشاهده
شاپوور دیش شیرین شا کەرد بێ دەماخ
بۆسا پای سەریر خوسرەو بە گوستاخ
واتش: فیدات بام ئیمانم، دینم
قیبڵەی حەقیقیی ڕووی سەرزەمینم
بێ دەماخ مەبەر شیرین پڕ جەوەرەن
شێوەی مەحبووبان بەی تەرز و تەورەن
وێت مەدەر بە خەم شیرین کەچبازەن
شیرین دەستوورش هەر غەمزە و نازەن
مەواچە شیرین ئەرمەنی بەدخوون
زاڵمەن، بێ زام، کۆی مەینەت بە کۆن
عەیب نیەن عاشق، شای والا تەبار
ناز مەعشووقەش بکێشۆ سەد جار
مەحبووبان نیەن هیچ ڕەحمێ پێشان
هەر زوڵم و جەورەن دایم خدێشان
دۆست جە غەمزەی دۆست بێزار نمەبۆ
گوڵ جە گوڵشەندا بێ خار نمەبۆ
شیرین ساحێب شەرت، بە بەین دروستەن
بت پەرست نیەن، خوسرەو پەرستەن
بەو خەیاڵ مەبەر شیرین بەدکارەن
کەم شەرت و کەم شۆن، جە شا بێزارەن
بە بێ شەهەنشا جە مەهـ تا ماهی
ئەر بدەن پەنەش بە پادشاهی
بە تاجت سەوگەند دەرکارش نیەن
درەنگێ بێ شا قەرارش نیەن
یەک ئیمشەو بێ سەبر بێ تاقەت مەبەر
مەی بنۆش ئیمشەو بە شاد تا سەحەر
تا کە بوینمێ جە دەور گەردوون
چێش مبۆ حاسڵ، جە تەور مبۆ، چوون؟
فیدات بام تا سەر، شەهەنشای عادڵ
شادی و زەوق پەی کەس نمەبۆ حاسڵ
سەبر خەیرێ کەر ئیمشەو تا سەحەر
جە تاڵیی شیرین ترش و تاڵ مەبەر
ئەڵبەتە جە سەبر شای بەرجیس مەقام
ئیمشەو تا سەبا نیاوی بە کام
دەلالەت مدا فەرخوندە شاپوور
خوسرەو لاڵ پۆش ئەو شەو بەی دوستوور