dilalit kirdin şapur xisru ra
Li pirtûka:
Şîrîn û Xusrew
Berhema:
Xanayê Qubadî (1704-1778)
2 Xulek
210 Dîtin
şapûr dîş şîrîn şa kerd bê demax
bosa pay serîr xusrew be gustax
watiş: fîdat bam îmanim, dînim
qîbłey ḧeqîqîy řûy serzemînim
bê demax meber şîrîn piř ceweren
şêwey meḧbûban bey terz û tewren
wêt meder be xem şîrîn keçbazen
şîrîn destûrş her ẍemze û nazen
mewaçe şîrîn ermenî bedxûn
załmen, bê zam, koy meynet be kon
’eyb nyen ’aşiq, şay wala tebar
naz me’şûqeş bikêşo sed car
meḧbûban nyen hîç řeḧmê pêşan
her zułim û cewren daym xidêşan
dost ce ẍemzey dost bêzar nimebo
guł ce gułşenda bê xar nimebo
şîrîn saḧêb şerit, be beyn dirusten
bit perist nyen, xusrew peristen
bew xeyał meber şîrîn bedkaren
kem şerit û kem şon, ce şa bêzaren
be bê şehenşa ce meh ta mahî
er biden peneş be padşahî
be tacit sewgend derkarş nyen
direngê bê şa qerarş nyen
yek îmşew bê sebir bê taqet meber
mey binoş îmşew be şad ta seḧer
ta ke bwînmê ce dewr gerdûn
çêş mibo ḧasił, ce tewr mibo, çûn?
fîdat bam ta ser, şehenşay ’adił
şadî û zewq pey kes nimebo ḧasił
sebir xeyrê ker îmşew ta seḧer
ce tałîy şîrîn tirş û tał meber
ełbete ce sebir şay bercîs meqam
îmşew ta seba nyawî be kam
delalet mida ferxunde şapûr
xusrew lał poş ew şew bey dustûr