zarî kirdin şîrîn û bîtaqit şidin bih cihit xisru û riftin bih ’iqib aw
Li pirtûka:
Şîrîn û Xusrew
Berhema:
Xanayê Qubadî (1704-1778)
5 Xulek
203 Dîtin
be xamey muşkîn neqqaş dêrîn
bey tewr kêşa neqiş ḧałat şîrîn
çun şîrîn ce şa dûr kefit be diłteng
ce seng diłîy wêş daş be serda seng
nergis ce esrîn lale řeng kerd keyl
guł kerd be xezan gułnarîy siweyl
şengerfî xak kerd be dîdey giryan
qirçeş kefit ne cerg çun qirçey buryan
kendiş be naxûn pencey xeławî
ne seḧfey teła feyrozey mawî
pare kerd çun guł yexey ’enber boş
keftewber temam şemamey lîmoş
ahiş wêney dûd syay bo neftîn
dem dem mikêşa berimşî çîn çîn
sa bêtaqet bî ew perê xusrew
fermaş ta gułgûn awerdin be dew
gułgûn çenî seyl esrîn gułřeng
horkîşa be cext tenge û zêr teng
çenî dûd ah çun ateş pare
nîşt ne koł zîn dił piř pejare
şew tarîk çun tar zułmat gêsûş
řa barîk wêney peřgar ebrûş
hewa xem engêz çun mayey derdiş
sara piř ce tem ce ah serdiş
ce řah û bêřah gułgûn mya dew
ta yawa be qurb leşkirgay xusrew
ce şu’ley qubbey piř şewqiş ew şew
neşnasaş ce kon seywan xusrew
be nerme nermê guł boy guł nimdar
yawa be nezd ew seywan zeř tar
nîga kerd mes mes ew şox diłber
kes bêdar nebî ne şa ne şeker
naga nîga kerd ferxunde şapûr
dîş ke swarê peyda bî ce dûr
ama dya dîş zułf ’ebîrînen
persaş: to kênî? watiş: şîrînen
ta şapûr şineft wey tewr cewabiş
hełmet da dersat bosa řîkabiş
şîrîn dîş şapûr, xatirş bî şad
ce pişt gułgûn pya bî derlad
şapûr ce şadî sucdey zemîn berd
zyater ce ḧed mediḧ û senaş kerd
watiş: şiker leb, şerbet řîzey řaz
mujan çun xedeng turk tîr’endaz
ye çon bey şewe teşrîf awerdî
ême û şa q qoşen muşeřref kerdî?
hey be weş amay şehzadey ermen
bûm peřey nergis, xał nexiş sosen
peyker perîzad, řazan řêzey qend
teḧsîn kerd şapûr ustay neqşibend
cew dima şîrîn pey şapûr ew şew
îzhar kerd dem ceng ew perê xusrew
wat: ce bab şah fire şoxîm kerd
ne xîdmetîşeda watim ḧerf serd
min ce ḧerf wêm xirab êşam dił
peşîmanîm berd, bêḧed bîm xecił
wextê řencya swar bî ce lam
taqetim biřya pêm nemend aram
minîç şîm be dił gułgûn be diłteng
çenî ah serd esir lale řeng
tey kerdim menził dił be xofewe
zułf be zengûley wefir tofewe
ta yawam we to şukir xudawend
nekeftim be des bed xway napesend
ce lay to şapûr danay suxenwer
dû ḧacetim hen berareş weber
yekê wextê şay cem cay cemşîd feř
çenî xusrewan tac û kemer zeř
minoşo badey gułřeng bê endêş
goş mido be saz noşîn badey wêş
min berî we seyr her çon mizanî
qisem nekerî pay şa nîhanî
ta seyrkerûm bezim bo ’enber barş
řoşin bo dîdem hem ce řuxsarş
duwem ḧacetim her êden şapûr
er şa ce řay lutif minş hen menzûr
be şîr behay ’eqid ’urûsî
bikerom mumtaz be çaplûsî
werne řam dyen, xo hîç naman pêm
baz mişûnewe pey kilîsay wêm
şapûr sewgend werd be şoxîy şêweş
be lûl lawlaw zułfan lêweş
watiş: şeler leb şay şyeyin řazan
nazdar ’ezîz nazenîn nazan
îmcar çun zanam çonen dermanit
mawerûn be ca emir û fermanit
şapûr bestewe gułgûn çun şebdêz
berdiş ne çetrê şîrîn çun perwêz
bestiş perdey çetir zeřtan zeřpo
nîşt têşda şîrîn şox sosen bo
çun sitarey se’d ne çerx exzer
ama be balîn şay bercîs efser
xaster ce çiraẍ gułałey gułşen
şem’ bezim şa yek yek kerd řewşen
naga şehenşa ce xew bî bêdar
dîş her ne çerxen şapûr çun peřgar
fermaş: hey şapûr saknîy daxim
îmşew xawê dîm pêş weş demaxim
bew tewr dîm be xaw ce seḧin baẍê
awirdin perêm řewşen çiraẍê
min pêş diłşadim danay mû şikaw
waçe pêm çonen te’bîr ey xaw?
şapûr wat: ce no e’lay ’ebîrîn
şad mibî we dîn dîdar şîrîn
sa bo bey mijde çun keyan key
binoşîm bade çenî saz ney
çun xor ce meşrîq bigêro ce nûr
dêbay muşkîy şew be be’zê kafûr
badey kafûrîy gułřeng guł fam
çenî begleran biřêzîm ne cam
be yad ey xaw binoşîm pey pey
gahê goş be çeng, ga be saz û ney
şa ce zewq ḧerf ustay mû şikaw
be nîşat nergis şehlaş şî ne xaw