şadî kirdin xisru az xwab dîdin xudiş
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
222 Dîtin
seḧer ber’ama ce meşrîq xurşîd
cîhan poşa řext zeř wêney cemşîd
xor çun meşşatey dilaray teřdest
sub wêney ’urûs řengîn zêwer best
xusrew bêdar bî ce xaw noşîn
dił temam piř şewq ce xaw doşîn
fermaş ta hordan ce new xergayê
xergahê guł nexiş, gułşen numayê
kêşaşan feřřaş hîndî û ḧîcazî
ne dewirş tecîr sed gez dirazî
seraperdey xas dêbay ferengê
muzeyyen be nexiş her nexşê řengê
kerdişan be pa çun çerx exzer
qubbeş direxşan çun qurs qemer
ne dîhlîz sera sef bestin be feř
ḧebeş ẍułaman hîndîy kemer zeř
be ẍeyr ce xergey xusrewîy xusrew
hordaşan ew řo be dewan dew
ne dewr xergey salar serkeş
çend hezar xergey xeymey muneqqeş
xusrew ne xergey wêş sikender terz
çenî begleran nîşt be demax berz
ne xergay henî saf bo ’ebîrîn
şîrîn weştebê sed şor şîrîn
axir şa fermaş munadî kerdin
cem’ê ce nedîm meḧrem awerdin
«ḧisb alamirErebî» şay gerdûn îqtîdar
neqîban bezim xergey zeřnîgar
nastin namḧirem ne xergey şayî
ẍeyr ce ẍułaman xasey serayî
dana û nedîman edeb perwerde
girew ce danş eflatûn berde
ne pay text şay sikender şî’ar
nîştin ne bałay kursîy zeřnîgar
cew demda perwêz şay ’enber siruşt
şemamey tełay dest efşar ne mişt
nedîman çoge heryek ne kuncê
mukellel be ’etir ’enber turuncê
girtebên be dest çun řend meykeş
çenî çend destey wenewşey bo weş
saqîy sîm endam qed çun seru ney
dewr mida û midya pêşan peyapey
neẍmey şadřewan saz nîkîsa
mibêza řutbey mu’cîzey ’îsa
barbud ce neqiş badey çeng û ’ûd
mibexşa neẍmey dilaray dawud
wextê ke berbet mawerd be awaz
ce ten mikirdiş murẍ řoḧ perwaz
kes çun nîkîsa çengîy namewer
nebî xoş goter ce her hefit kîşwer
seday sazendey sazan piř coş
west ne dilê bezim şehenşa xuroş
ta mijendin saz xoş deng mewzûn
zuhre çerx mida ne dewr gerdûn
axir nîkîsa û barbud bê xem
kokerdin berbet çenî çeng behem
wextê sergerm bî şa ce cam mey
wiyerd ne řûy çerx nałey neway ney
ẍułaman temam ce est şapûr
ne bezim bo muşk xusrew kerdin dûr
xałî ce eẍyar ew xergey guł bêz
her mend be şapûr dana be zerûr
fermaş: neqşibend danay diłnewaz
ew dû sazendey şox xoş awaz
tełeb ker we lay êmey xatir teng
çenî saz û ’ûd erẍenûn û çeng
ta be «wesif alḧalErebî» ey xestey bedḧal
bwaçan ẍezeł pey şay kemer lał
şapûr «ḧisb alamirErebî» ew şay leb şeker
ew şox şeş dang gêso bo ’enber
nîkîsa çenî barbud be dew
ḧazir kerd çoge, nezanaş xusrew
şîrîn fesîḧ şu’eray duř senc
da te’lîmşan be sed lare û lenc