شادی کردن خسرو از خواب دیدن خودش
لە کتێبی:
شیرین و خوسرەو
بەرهەمی:
خانای قوبادی (1704-1778)
3 خولەک
401 بینین
سەحەر بەرئاما جە مەشریق خورشید
جیهان پۆشا ڕەخت زەڕ وێنەی جەمشید
خۆر چون مەششاتەی دلارای تەڕدەست
سوب وێنەی عورووس ڕەنگین زێوەر بەست
خوسرەو بێدار بی جە خاو نۆشین
دڵ تەمام پڕ شەوق جە خاو دۆشین
فەرماش تا هۆردان جە نەو خەرگایێ
خەرگاهێ گوڵ نەخش، گوڵشەن نومایێ
کێشاشان فەڕڕاش هیندی و حیجازی
نە دەورش تەجیر سەد گەز درازی
سەراپەردەی خاس دێبای فەرەنگێ
موزەییەن بە نەخش هەر نەخشێ ڕەنگێ
کەردشان بە پا چون چەرخ ئەخزەر
قوببەش درەخشان چون قورس قەمەر
نە دیهلیز سەرا سەف بەستن بە فەڕ
حەبەش غوڵامان هیندیی کەمەر زەڕ
بە غەیر جە خەرگەی خوسرەویی خوسرەو
هۆرداشان ئەو ڕۆ بە دەوان دەو
نە دەور خەرگەی سالار سەرکەش
چەند هەزار خەرگەی خەیمەی مونەققەش
خوسرەو نە خەرگەی وێش سکەندەر تەرز
چەنی بەگلەران نیشت بە دەماخ بەرز
نە خەرگای هەنی ساف بۆ عەبیرین
شیرین وەشتەبێ سەد شۆر شیرین
ئاخر شا فەرماش مونادی کەردن
جەمعێ جە نەدیم مەحرەم ئاوەردن
«حسب الامرعەرەبی» شای گەردوون ئیقتیدار
نەقیبان بەزم خەرگەی زەڕنیگار
ناستن نامحرەم نە خەرگەی شایی
غەیر جە غوڵامان خاسەی سەرایی
دانا و نەدیمان ئەدەب پەروەردە
گرەو جە دانش ئەفلاتوون بەردە
نە پای تەخت شای سکەندەر شیعار
نیشتن نە باڵای کورسیی زەڕنیگار
جەو دەمدا پەروێز شای عەنبەر سروشت
شەمامەی تەڵای دەست ئەفشار نە مشت
نەدیمان چۆگە هەریەک نە کونجێ
موکەللەل بە عەتر عەنبەر تورونجێ
گرتەبێن بە دەست چون ڕەند مەیکەش
چەنی چەند دەستەی وەنەوشەی بۆ وەش
ساقیی سیم ئەندام قەد چون سەرو نەی
دەور مدا و مدیا پێشان پەیاپەی
نەغمەی شادڕەوان ساز نیکیسا
مبێزا ڕوتبەی موعجیزەی عیسا
باربود جە نەقش بادەی چەنگ و عوود
مبەخشا نەغمەی دلارای داوود
وەختێ کە بەربەت ماوەرد بە ئاواز
جە تەن مکردش مورغ ڕۆح پەرواز
کەس چون نیکیسا چەنگیی نامەوەر
نەبی خۆش گۆتەر جە هەر هەفت کیشوەر
سەدای سازەندەی سازان پڕ جۆش
وەست نە دلێ بەزم شەهەنشا خورۆش
تا مژەندن ساز خۆش دەنگ مەوزوون
زوهرە چەرخ مدا نە دەور گەردوون
ئاخر نیکیسا و باربود بێ خەم
کۆکەردن بەربەت چەنی چەنگ بەهەم
وەختێ سەرگەرم بی شا جە جام مەی
ویەرد نە ڕووی چەرخ ناڵەی نەوای نەی
غوڵامان تەمام جە ەست شاپوور
نە بەزم بۆ موشک خوسرەو کەردن دوور
خاڵی جە ئەغیار ئەو خەرگەی گوڵ بێز
هەر مەند بە شاپوور دانا بە زەروور
فەرماش: نەقشبەند دانای دڵنەواز
ئەو دوو سازەندەی شۆخ خۆش ئاواز
تەڵەب کەر وە لای ئێمەی خاتر تەنگ
چەنی ساز و عوود ئەرغەنوون و چەنگ
تا بە «وَصف الحالعەرەبی» ئەی خەستەی بەدحال
بواچان غەزەڵ پەی شای کەمەر لاڵ
شاپوور «حسب الامرعەرەبی» ئەو شای لەب شەکەر
ئەو شۆخ شەش دانگ گێسۆ بۆ عەنبەر
نیکیسا چەنی باربود بە دەو
حازر کەرد چۆگە، نەزاناش خوسرەو
شیرین فەسیح شوعەرای دوڕ سەنج
دا تەعلیمشان بە سەد لارە و لەنج