جواب دادن شیرین خسرو را به غضب
از کتاب:
شیرین و خوسرەو
اثر:
خانای قبادی (1704-1778)
3 دقیقه
399 مشاهده
باز بەی تەور شیرین زوڵف بۆ عەبیرین
چەنی خوسرەو کەرد گفتۆگۆی شیرین
تا عەقیق جە ڕووی لوولوو هۆردارا
خوسرەو جە دانەی گەوهەر کەرد دارا
ئەووەڵ وات: ئەرێ هەی شای جەوان بەخت
جە تۆن زینەتبەخش هەم تاج و هەم تەخت
خاین دەرگات خار بە خەدەنگ بۆ
خەسمەت ئاوێزان مەودای چل چەنگ بۆ
باقی بۆ تا حەشر حیشمەت پەناهیت
بەرزتەر بۆ جە چەرخ ئیقباڵ شاهیت
ئاخر بە توندی ئەو شۆخ مەهوەش
واتش: ئەرێ هەی سالار سەرکەش
عەجایب موحیلل نەیرەنگ سازەنی
تۆ پادشای، یام عەشق بازەنی؟
مەکرووهەن جە تەبع حیشمەت پەناهان
عەشقبازی و ڕەندی پەی پادشاهان
عاشقی و ڕەندی لایقەن بەو کەس
یەک مەعشووقش بۆ نە ڕووی دنیا و بەس
تانە مدەی لێم جە عەشق فەرهاد
شەهیدەن غەریب، ئەرواحش بۆ شاد
جە عەرسەی دەوران ئەو خاتر مەلوول
من بە برای وێم کەردەبێم قەبووڵ
تاڵش کەرد شیرین با وجوود ڕۆزش
هەر چون عوود تاڵ شیرین بێ سۆزش
بە تەورێ جەو دیم ئابڕوو نە دەور
نەدیم من جە تۆ شای تەهەمتەن تەور
مەعلووم بۆ جە لای شەهەنشای نامی
دانەی دڵ ئەفرۆز دەریای گیرامی
خارێ پەیم گوڵ بۆ خاستەرەن ئەو خار
پەی من جە سەوڵێ پێم دەرۆ ئازار
چرایێ ڕەوشەن پێش ببۆ تەختم
خاستەرەن جەو شەم بسۆچنۆ ڕەختم
سا، جە تۆ کە شا هەم شەهریاری
نمەز چێشم دی بەغەیر جە خواری؟
کەس نەبۆ شەڵڵا بە تەنگدەستیی من
بە دێوانگی و بە سەرمەستیی من
نیشتەنم نەی کونج خرابەی بەد ڕەنگ
مەحبووسم چون نەخش تەسویر ڕووی سەنگ
خوسرەو بەو خودا هۆشم نەمەندەن
جەرگم چون گۆگرد فەرەنگ گڕ سەندەن
سا بوگرێزە لیم بە دەوان دەو
نەبا بە گڕەم بسۆچی ئیمشەو
چونکە، شەهنشا، بێ پەروا و بێ دەرد
چون فەڵەک نە بەخت من کچ شانا نەرد
شەرت بۆ نەوینی لێم دڵنەوازی
بە لیمۆی وەشبۆم نەکەری بازی
هۆرێزە جە لام، فرە پڕ پێچی
هیچ دۆسیت نیەن، فراوان هیچی
مەعلوومەن جە لای گشت موو شکاوان
کەس بە حیلە و مەکر بە کام نەیاوان
جە عەرسەی دەوران تا نەکێشی ڕەنج
ئەر شان ئەر گەدا نەیاوان بە گەنج
ئەر ماچی چۆنی زوڵف عەبیرینی
گوفتارت تاڵەن، تۆ وێت شیرینی ؟
من کە شیرینم شەربەتەن بارم
عەیب نیەن ئەگەر تاڵ بۆ گوفتارم
مەعلووم بۆ جە لای دارا تەرز و تەور
جە لای هەرکەسێ جە ڕووی عەرسەی دەور
ساحێب سەلیقەن هەم جیهان دیدەن
گوڵاویچ تاڵەن، دڵ پەسەندیدەن
سا من ئەو گوڵاو تام تاڵ و وەش بۆم
پەسەند شاهان دارای جەم شکۆم
هیچ باکم نیەن من جە تاڵیی وێم
ئەگەر سەد تاڵ بم شیرین ماچان پێم
قورس شەکەرڕاز، قاش قەوس زەڕبەخش
تا تا زوڵف وە بان شەمامدا پەخش
چون بەی تەور گەوهەر ڕیزا جە یاقووت
هۆرێزا بە خەشم چون گڕەی بارووت
وات: هەی نەزەرباز شۆخ مەست ڕەند
بە شێوەی شیرین شۆخ وێم سەوگەند
بە نەخش فەڕبەخش فیردەوس بەرین
بە شەمس ئەیوان عەرش بەرتەرین
بەو کەس ئەوەن حەی فەرد «لا ینام»
تەقدیرش بەی تەور من وستەن نە دام
بە ئەروای عەممەی کڵاف سۆسەنی
شای ساحێب تەمکین موڵک ئەرمەنی
هەرتا بە دەستوور شاهان جەم خوو
کۆی گەنج گەوهەر نەکەری بە کۆ
سیغەی نیکاحم نەوانی نە دەور
ئەر سەد تۆ شانی، شای سکەندەر تەور
وەسڵم بە هیچ وەجە پەی شای دەریا دڵ
نە عەرسەی دەوران نمەبۆ حاسڵ
سا بە بێ قەزا تۆ بگێرە ڕێت
هەرچەند منیشی تۆ دێر مەیۆ پێت