جواب دادن خسرو شیرین را به حیله
از کتاب:
شیرین و خوسرەو
اثر:
خانای قبادی (1704-1778)
3 دقیقه
380 مشاهده
خوسرەو دیش شیرین شۆخ شەکەرڕاز
جە سەر بە نەکەرد لارە و لەنجە و ناز
دیسان شورووع کەرد بە ئەفسوون سازی
شایەد کە شیرین بدەرۆ بازی
لاڵا، وات: ئەرێ بینایی عەینم
سەیقەل بەخش زەنگ ئاینەی زەینم
زەوق و زینەت بەخش شادمانیی من
هەم مایەی بەهجەت زیندەگانیی من
تا کەی جە بەختم بەی تەور کەچ گەردی؟
بی خەبەر جە داخ، نەزان جە دەردی؟
چێش مبۆ ئەرێشای بڵند پایە
سەوڵ سەمەن بۆی سنەوبەر سایە
بکێشی نازم بە نیم نگاهێ
نەکەری خەفیف وێنەی من شاهێ
دوور جە تۆ سیرین سۆخ بێ ئەندێش
چون کۆرێ کۆر بۆ ئەو جە عەیب ویش
مواچی گست عەیب ئێمە جە سەردا
نمەوینی عەیب وێت هیچ نە وەردا
ئەر لژنەوی حەرف، ئیمانم، دینم
سەوڵ سۆسەن خاڵ، کڵاف موشکینم
عەیبەن عەیب چەنی شاهان ڕووی دەور
دەم بدۆ کەسێ بێ ئەدەب وەی تەور
هیلاکت کەردان وەس جەوابم دەر
سۆچیان یەکسان وەس کەبابم کەر
یەک ئیمشەو حاسڵ بکەر مرادم
جون شای ساحێب عەدڵ بپرسە دادم
بدەرەم ڕوخسەت بنیشوون جە لات
بماڵوون نە چەم گەرد خاکپات
شەرت بە غەیر جە ئێد چەنی تۆ بە شاد
بنۆشوون بادە و خەم دەروون وە باد
هیچ نەکەروون من وە بێ دەماخت
نەچێنوون غونجەی گوڵێ جە باخت
غەمزە و ناز وەسەن خاتوون ئێران
غەمزە تۆ کەردەن من یانە وێران
چێش مبۆ ئیمشەو بە بێ دڵگیری ؟
بکەری، قیبڵەم، میهمان پەزێری؟
وەس ترش و تاڵ بەر هەی شای مودبیران
با ڕووت گوشاد بۆ نامەرد کەران
تۆ خۆدا خێرت دۆ سپی سەوڵ نۆ
موشک مێخەک عەتر، زوڵفان عەنبەر بۆ
دا جارێ دروست بدیە بە لاوە
با بە نائومێد نەشوون بە ڕاوە
بنوازەم زەریف چون دڵنەوازان
بازی مەکەر پێم جون حوققەبازان
ناقڕەوان شیرین جەلای حەقشناس
گشت عاشق چون یەک بکەری قیساس
چون فەرهاد خوسرەو سەنگەسار مەکەر
عەیبەن پادشا بەی تەور خوار مەکەر
گاهێ عەلەم سوڵح، گاهێ نە جەنگی
خودایا تۆبە، عەجەب دووڕەنگی
مەعلوومەن جە لات، من وێنەی تۆ نیم
وێنەی تۆ پڕ خیشم توند و بەدخوو نیم
دا تەماشا کەر زوڵفان عەنبەربار
هەرچەند تۆ فێشتەر مدەریم ئازار
مجۆشوون فێشتەر چون بەحر پڕ جۆش
جۆش دەروونم نمەبۆ خامۆش
ئەر من بشانوون لێت قەتەری گوڵاو
لێڵ مبی دەرسات چون چەشمەی کەم ئاو
تا کەی مکەری زامدارم بەی ڕەنگ
دڵەن دڵ، شیرین، دڵ نیەن جە سەنگ
بە شۆرئەنگێزی بەی تەور مەکەر زۆر
شیرین تاڵ مبۆ وەختێ مبۆ شۆر
بە چەربی خووکەر شیرین وە بێخەم
چەربی وە شیرینی مسازان وەهەم
بەو تەور زانا شەمع شەب ئەفرۆزەنی
نەزانام بەی تەور دەروون سۆزەنی
تۆم چون گوڵێ دی سۆسەن بۆی چاو مەست
بیت بە ئاهیر لێم چون ئامای وە دەست
ناز وەختێ بەرشی جە حەد خۆ جەنگەن
زەمین کە سەخت بۆ قەرارش سەنگەن
مەعلووم بۆ جە لات شای سۆسەن خاڵان
سالار سەرکێش نازک نەوهاڵان
تا چێگە بەرشیم جە کەوکەبەی تۆ
ماوەروون وە دەست خاستەرێ جە نۆ
بەڵێ ڕەنج تۆ، بووم چون شۆڵەی شەم
زیادتەر جە حەد مەداروون بە چەم