cwab dadin xisru şîrîn ra bih ḧîlh
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
216 Dîtin
xusrew dîş şîrîn şox şekerřaz
ce ser be nekerd lare û lence û naz
dîsan şurû’ kerd be efsûn sazî
şayed ke şîrîn bidero bazî
lała, wat: erê bînayî ’eynim
seyqel bexiş zeng ayney zeynim
zewq û zînet bexiş şadmanîy min
hem mayey behcet zîndeganîy min
ta key ce bextim bey tewr keç gerdî?
bî xeber ce dax, nezan ce derdî?
çêş mibo erêşay biłind paye
sewł semen boy sinewber saye
bikêşî nazim be nîm nigahê
nekerî xefîf wêney min şahê
dûr ce to sîrîn sox bê endêş
çun korê kor bo ew ce ’eyb wîş
mwaçî gist ’eyb ême ce serda
nimewînî ’eyb wêt hîç ne werda
er lijnewî ḧerf, îmanim, dînim
sewł sosen xał, kiłaf muşkînim
’eyben ’eyb çenî şahan řûy dewr
dem bido kesê bê edeb wey tewr
hîlakit kerdan wes cewabim der
soçyan yeksan wes kebabim ker
yek îmşew ḧasił biker miradim
cun şay saḧêb ’edił bipirse dadim
biderem řuxset binîşûn ce lat
bimałûn ne çem gerd xakpat
şerit be ẍeyr ce êd çenî to be şad
binoşûn bade û xem derûn we bad
hîç nekerûn min we bê demaxt
neçênûn ẍuncey gułê ce baxt
ẍemze û naz wesen xatûn êran
ẍemze to kerden min yane wêran
çêş mibo îmşew be bê diłgîrî ?
bikerî, qîbłem, mîhman pezêrî?
wes tirş û tał ber hey şay mudbîran
ba řût guşad bo namerd keran
to xoda xêrit do sipî sewł no
muşk mêxek ’etir, zułfan ’enber bo
da carê dirust bidye be lawe
ba be na’umêd neşûn be řawe
binwazem zerîf çun diłnewazan
bazî meker pêm cun ḧuqqebazan
naqřewan şîrîn celay ḧeqşinas
gişt ’aşiq çun yek bikerî qîsas
çun ferhad xusrew sengesar meker
’eyben padşa bey tewr xwar meker
gahê ’elem sułḧ, gahê ne cengî
xudaya tobe, ’eceb dûřengî
me’lûmen ce lat, min wêney to nîm
wêney to piř xîşim tund û bedxû nîm
da temaşa ker zułfan ’enberbar
herçend to fêşter miderîm azar
micoşûn fêşter çun beḧir piř coş
coş derûnim nimebo xamoş
er min bişanûn lêt qeterî guław
lêł mibî dersat çun çeşmey kem aw
ta key mikerî zamdarim bey řeng
diłen dił, şîrîn, dił nyen ce seng
be şor’engêzî bey tewr meker zor
şîrîn tał mibo wextê mibo şor
be çerbî xûker şîrîn we bêxem
çerbî we şîrînî misazan wehem
bew tewr zana şem’ şeb efrozenî
nezanam bey tewr derûn sozenî
tom çun gułê dî sosen boy çaw mest
bît be ahîr lêm çun amay we dest
naz wextê berşî ce ḧed xo cengen
zemîn ke sext bo qerarş sengen
me’lûm bo ce lat şay sosen xałan
salar serkêş nazk newhałan
ta çêge berşîm ce kewkebey to
mawerûn we dest xasterê ce no
bełê řenc to, bûm çun şołey şem
zyadter ce ḧed medarûn be çem