cwab dadin şîrîn xisru ra bih ẍizb
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
401 Dîtin
baz bey tewr şîrîn zułf bo ’ebîrîn
çenî xusrew kerd giftogoy şîrîn
ta ’eqîq ce řûy lûlû hordara
xusrew ce daney gewher kerd dara
ewweł wat: erê hey şay cewan bext
ce ton zînetbexiş hem tac û hem text
xayn dergat xar be xedeng bo
xesmet awêzan mewday çil çeng bo
baqî bo ta ḧeşir ḧîşmet penahît
berizter bo ce çerx îqbał şahît
axir be tundî ew şox mehweş
watiş: erê hey salar serkeş
’ecayb muḧîlil neyreng sazenî
to padşay, yam ’eşq bazenî?
mekirûhen ce tebi’ ḧîşmet penahan
’eşqibazî û řendî pey padşahan
’aşiqî û řendî layqen bew kes
yek me’şûqiş bo ne řûy dinya û bes
tane midey lêm ce ’eşq ferhad
şehîden ẍerîb, erwaḧiş bo şad
ce ’ersey dewran ew xatir melûl
min be biray wêm kerdebêm qebûł
tałş kerd şîrîn ba wicûd řoziş
her çun ’ûd tał şîrîn bê soziş
be tewrê cew dîm abřû ne dewr
nedîm min ce to şay tehemten tewr
me’lûm bo ce lay şehenşay namî
daney dił efroz deryay gîramî
xarê peym guł bo xasteren ew xar
pey min ce sewłê pêm dero azar
çirayê řewşen pêş bibo textim
xasteren cew şem bisoçno řextim
sa, ce to ke şa hem şehryarî
nimez çêşim dî beẍeyr ce xwarî?
kes nebo şełła be tengidestîy min
be dêwangî û be sermestîy min
nîştenim ney kunc xirabey bed řeng
meḧbûsim çun nexiş teswîr řûy seng
xusrew bew xuda hoşim nemenden
cergim çun gogird fereng giř senden
sa bugrêze lîm be dewan dew
neba be giřem bisoçî îmşew
çunke, şehnişa, bê perwa û bê derd
çun fełek ne bext min kiç şana nerd
şerit bo newînî lêm diłnewazî
be lîmoy weşbom nekerî bazî
horêze ce lam, fire piř pêçî
hîç dosît nyen, firawan hîçî
me’lûmen ce lay gişt mû şikawan
kes be ḧîle û mekir be kam neyawan
ce ’ersey dewran ta nekêşî řenc
er şan er geda neyawan be genc
er maçî çonî zułf ’ebîrînî
guftarit tałen, to wêt şîrînî ?
min ke şîrînim şerbeten barim
’eyb nyen eger tał bo guftarim
me’lûm bo ce lay dara terz û tewr
ce lay herkesê ce řûy ’ersey dewr
saḧêb selîqen hem cîhan dîden
guławîç tałen, dił pesendîden
sa min ew guław tam tał û weş bom
pesend şahan daray cem şikom
hîç bakim nyen min ce tałîy wêm
eger sed tał bim şîrîn maçan pêm
qurs şekerřaz, qaş qews zeřbexiş
ta ta zułf we ban şemamda pexiş
çun bey tewr gewher řîza ce yaqût
horêza be xeşim çun giřey barût
wat: hey nezerbaz şox mest řend
be şêwey şîrîn şox wêm sewgend
be nexiş feřbexiş fîrdews berîn
be şems eywan ’erş berterîn
bew kes ewen ḧey ferd «la yinam»
teqdîrş bey tewr min wisten ne dam
be erway ’emmey kiłaf sosenî
şay saḧêb temkîn mułk ermenî
herta be destûr şahan cem xû
koy genc gewher nekerî be ko
sîẍey nîkaḧim newanî ne dewr
er sed to şanî, şay sikender tewr
wesiłim be hîç wece pey şay derya dił
ne ’ersey dewran nimebo ḧasił
sa be bê qeza to bigêre řêt
herçend minîşî to dêr meyo pêt