جواب دادن خسرو شیرین را به مهربانی
از کتاب:
شیرین و خوسرەو
اثر:
خانای قبادی (1704-1778)
3 دقیقه
457 مشاهده
خوسرەو دیش شیرین تاڵەن گفتوگۆش
پێچ مدۆ چون مار زوڵف عەنبەر بۆش
بە لەفز شیرین شەکەر بار ڕەند
جەوابدا شیرین شیرینتەر جە قەند
واتش: شەکەر ڕاز شۆخ شیرین دەنگ
باڵا تەرز تووڵ گوڵ باغچەی فەرەنگ
دایم تای توڕڕەت بۆ عەبیرین بۆ
شێوەی شیرینت خاستەر شیرین بۆ
عیتابت هەرچەند چون ژار مارەن
جە لام چون شەربەت نەبات شارەن
ڕاستەن شیرین گشت من ڕووزەرد تۆم
بێ خەبەر جە حاڵ داخ و دەرد تۆم
ئەر باوەڕ داری شازادەی ئەرمەن
سەوگەند بە گێسووت شۆخ پڕ شکەن
هۆش و خەیاڵم دایم جە لای تۆن
«کحل الجواهر» من خاکپای تۆن
مورغ دڵ بە دام گێسووت گیر وەردەن
زیندەی نیمە گیان بەتەر جە مەردەن
من خوان ئیخلاس تۆ بدۆ گیرم
غەیر جە وەفا و شەرت نییەن تەقسیرم
سا هەر گونام بۆ وێنەی گومڕاهان
مەویەر تۆ جە ڕەسم ڕای پادشاهان
ڕەویەی عەدڵ و داد بە چەم مداران
مبەخشان ڕۆیێ چەند گوناکاران
ئەر شازادەنی سەوڵ نا پەروەر
تۆیچ ڕەویەی شاهان هەم وە ڕاگە بەر
ئاخر نە من شام؟ ڕەحمێ بکەر لێم
مەنمانە بەی تەور ئەوەند خواری پێم
مەر هەرکەس، شیرین، زوڵف عەنبەربارەن
نە پەرواش جە شا، نە جە خووندکارەن؟!
ئەر من خوار بە تیر شەست تۆ نەبوون
مەدهۆش دیدەی مەست تۆ نەبوون
پەی چێش ئەوەند لێت ملاڵوونەوە
مگێرووت دامان، مپاڵوونەوە؟
چون تۆ واتەنی چەند کەس یارمەن
چەند مەحبووب شۆخ پەرستامەن
ئەر زامم بە عەشق تۆ نەبیا ناسۆر
پەی چێش مکێشام ئەوەند تار و تۆر؟
ئەر ساحێب شەرتی، گورفتار تۆم
بێ خاو و بێ خۆر، بێ قەرار تۆم
بەی تەور پێم ئامان، قیبڵەم، جە داخت
جە کیبر و جە ناز بەرزیی دەماخت
ئەر نەبیا بەعید جە ڕەسم شاهی
مبیم پەشتانت خواهی و نەخواهی
بەڵێ سا جە ڕەسم شاهانە دوورەن
ڕەویەی نەوشیروان بابام مەنزوورەن
وەرنە بێ ئەمریت هاڵا مکەردم
جە مەی گوون لەعت جامێ موەردم
سا شیرین بە عەشق زوڵف گرنجت
بە سێف زەریف ڕەنگین زنجت
مەواچە یە شان، ئومێدمەن پێت
بکەریم قوبووڵ بە غوڵام وێت
خواجەیێ چون تۆ شۆخەکەی سەرمەست
غوڵامێ چون من نمەگنۆت بە دەست
تەبع هومایون ما مایل بە تۆن
شەکەر چ کارەن، وجوودش جە کۆن
جە تۆم نەکەردەن بە دانای داوەر
من وێم ڕووگەردان پەی وەسڵ شەکەر
ئەر شۆخیم کەردەن بە کامەرانی
جەوانم، پۆشەن ڕەسم جەوانی
بەڵێ بە خەڵوەت جە سوب تا بە شام
جە شەرم شاهان ئومەرای عیزام
جە دووریی باڵات زوخاوم وەردەن
چون ڕۆ مەردەگان هەر زاریم کەردەن
پەی چێش؟ تا جەی سۆنگ زوڵفان بۆ عەنبەر
هۆرنەگێڵان لێم ئەی سوپا و لەشکەر
هیچکەس نەزانۆ هەم بە گومڕاهیم
خەلەل نەیاوۆ بە پادشاهیم
بەڵێ تا بۆی زوڵف لوولت یاوا پێم
بێزار بیم جە تەخت پادشاهیی وێم
بەی تەور موینی پەی تۆ ئاشفتەم
چون شەم جە شەوقت سەرتاپا سفتەم
ئیستیدعام ئێدەن سەوڵ سەر سایەم
نەمەندەن تاقەت، سا بدەر وایەم