جواب دادن شیرین خسرو را
از کتاب:
شیرین و خوسرەو
اثر:
خانای قبادی (1704-1778)
4 دقیقه
460 مشاهده
نەرگس بۆی پڕ ناز نەزاکەت فرۆش
سەمەن سیمای ساف، سیمین بناگۆش
پەی جەواب شای فەڕ بەخش قابڵ
بەی تەور شکاوا غونچەی لەب چون گوڵ
تا زەمین نە پشت گا و ماهی بۆ
شا هەر شاد بە تەخت شاهەنشای بۆ
بەرز بۆ چون پەروین بڵەندیی پایەس
کەم نەبۆ جە فەرق بەندەگان سایەش
هەر سەرێ جە تەوق بەندەگیش دور بۆ
جە بەند سەر تەوق زاڵم ڕەنجوور بۆ
بوڕڕا بۆ دایم وێنەی تەهەمتەن
شمشێرت نە فەرق بەدخوای دین دوشمەن
بەڵێ فیدات بام شای کەیخوسرەو خوو
دارای دەماخ بەرز، مەعریفەت بێ شۆ
ئەر ماڵەن، ئەر گەنج، ئەگەر شاهیەن
دەخڵش بە سەرکار قیبلەگاهیەن
بەڵێ هەی خاقان کەیخوسرەو نەژاد
نەوەی نەوشیروان ساحێب عەدڵو داد
نەشیم وە باڵای ئەی قەسر بێ دەر
بە خەیاڵ ئێد جە شام زیادتەر
ئەرێ جەمشید جام کەیانی ئاڵام
سەد جار بە سەرگەرد باڵات بۆ باڵام
من قاپی جەو بۆن جە تۆ نەبەستم
یانێ بزورگم، یا باڵا دەستم
بە وێت مزانی شەهەنشای لاڵ پۆش
بگێرۆ عەورەت ئەر سەد شێر نە گۆش
جە لای جەوانمەرد چون شای ساحێب زات
عەورەتەن عەورەت هەم بێ دەستەڵات
شەهەنشا سەرمەست بادەی تەمام ڕەس
من بێ دەستەڵات عەورەت و بێکەس
تەرسام شیم وە بام قەسر وێم بە دەو
گاڵ دام ژەندشان قوفڵ قاپیی ئەو
فیدات بام چێش بی من پەی تۆ وێڵم
پەی تۆ چون عەبداڵ کەڵپۆس وە پێڵم
ئاخر نە منیچ ڕەوشەن تەبارم
جە نەسڵ شاهان شەوکەت شیعارم؟!
جە شاهان نییەن کەم ڕوتبەی شاهیم
شایعەن نە عام عیسمەت پەناهیم
هەرگا شای جەم بەخت موخالیف شکەن
ڕەزاش بۆ چون من شازادەی ئەرمەن
وێنەی بەخت سەعد ببۆش هەم ئاغۆش
جە مەی گوون لەعلم بکەرۆ مەی نۆش
تەخت خوسرەویی موکەللەل جە عاج
ئاموودەی گەوهەر ئەو تەخت چەنیو تاج
مورەسسەع سەد تێغ پۆلای زەڕ ئەندوود
بەڵ پێچ جە یاقووت تیە نیشان زمڕوود
سەد تەبەقچەی سیم پڕ دانەی گەوهەر
بە خەروار عەبیر، بە سندووق عەنبەر
سەد پەڕەند مەنقووش جە یاقووت زەڕ
تۆ تۆ شان جە موشک نافەی ئاهوو پەڕ
مەهدێ مورەسسەع جە یاقووت ئاڵ
پەیکەر فرۆزان جە فەیرۆزەی لاڵ
یەک سەد عەماری، سەد ئەسپ و ئێستەر
عەماریی کەش گەشت سادەی لاڵ کەمەر
سەد ڕۆمی غوڵام زەبەرجەد نگین
موتەللا نە دەور تاقیەی زەڕڕین
جە میسری و چینی و سوقلابی پەڕەند
جە مەنسووج هیند دێبای دڵ پەسەند
باوەرۆ بە ڕەسم شاهان ڕووسی
بکەرۆم بە عەقد نیکاح عورووسی
وەر نە شەهەنشا بەی تەمەننای خام
سیمرغ کۆی قاف ماوەرۆ بە دام
من ئەو سیمرغم بێ درۆ و گەزاف
ئاشیانشەن نە کۆی قوللەی قاف
شا دەرکارشەن بە نەیرەنگ سازی
بە دەستەی زوڵفم بکەرۆ بازی
بۆ بنیۆ بێ عەقد نە بۆی عەنبەر بۆم
دەست ئەفشار کەرۆ شەمامەی وەشبۆم
هەر شەو چون توڕڕەی بۆ موشک لوولم
پەشتان بۆ وە بەژن باڵای نەوتوڵم
بکەرۆ بە زۆر خاتر شکشتەم
بشکەنۆ تەلیسم گەنج دەر بەستەم
نەوەڵڵا پەی وێم خاستەرەن بێ دەنگ
منیشوون نەی قەسر خرابەی دڵتەنگ
هەر شەکەر خاسەن پەی شای بێ ئەندێش
شیرین تاڵ بیەن، چێش مکەرۆ پێش
ئیسە با نەبۆ شیرین دڵبەر
وەسەن پەرێ شا شیرینیی شەکەر
من خۆ جە داخت کۆی خەم لێم بارەن
هەنی جە گیانم چێشت دەرکارەن
حەق هۆرنەگێرۆ لێت نە باڵای سەر
ویەردی جە وەسڵ شیرین پەی شەکەر
مەر خاسەن بزورگ یەند نا دروست بۆ
یەند لۆتی مەزهەب، قەحبە پەرست بۆ
شەکەر هەرچەند شۆخ زوڵف عەبیرینەن
بە عەرز و سیرەت کەی چون شیرینەن؟
بەڵێ شا جە لاش نییەن تەفاوت
ئەر عیسمەتدارەن، ئەگەر بێ عیسمەت
ئاحر کەی کێشات تۆ پەی من خواری؟
کەی جە سەودای من تۆ کەردت زاری؟
کەی بی وە بێ من بادەت نەنۆشا؟
کەی بی جە داخم قەترانت پۆشا؟
سا واچە پەی من کام جەفات کێشان؟
کەی نیشی پەی من خاتر پەرێشان؟
تۆ هەر مەی نۆشای، تەپڵ شادیت ژەند
شاپوور کێشا نەخش، فەرهاد تێشەش شەند