cwab dadin şîrîn xisru ra
From the Book:
Şîrîn û Xusrew
By:
Khana Qubadi (1704-1778)
4 minutes
268 views
nergis boy piř naz nezaket firoş
semen sîmay saf, sîmîn binagoş
pey cewab şay feř bexiş qabił
bey tewr şikawa ẍunçey leb çun guł
ta zemîn ne pişt ga û mahî bo
şa her şad be text şahenşay bo
berz bo çun perwîn biłendîy payes
kem nebo ce ferq bendegan sayeş
her serê ce tewq bendegîş dur bo
ce bend ser tewq załim řencûr bo
buřřa bo daym wêney tehemten
şimşêrit ne ferq bedxiway dîn duşmen
bełê fîdat bam şay keyxusrew xû
daray demax berz, me’rîfet bê şo
er małen, er genc, eger şahyen
dexiłş be serkar qîblegahyen
bełê hey xaqan keyxusrew nejad
newey newşîrwan saḧêb ’edłu dad
neşîm we bałay ey qesir bê der
be xeyał êd ce şam zyadter
erê cemşîd cam keyanî ałam
sed car be sergerd bałat bo bałam
min qapî cew bon ce to nebestim
yanê bizurgim, ya bała destim
be wêt mizanî şehenşay lał poş
bigêro ’ewret er sed şêr ne goş
ce lay cewanmerd çun şay saḧêb zat
’ewreten ’ewret hem bê destełat
şehenşa sermest badey temam řes
min bê destełat ’ewret û bêkes
tersam şîm we bam qesir wêm be dew
gał dam jendişan qufił qapîy ew
fîdat bam çêş bî min pey to wêłim
pey to çun ’ebdał kełpos we pêłim
axir ne minîç řewşen tebarim
ce nesił şahan şewket şî’arim?!
ce şahan nîyen kem řutbey şahîm
şay’en ne ’am ’îsmet penahîm
herga şay cem bext muxalîf şiken
řezaş bo çun min şazadey ermen
wêney bext se’d biboş hem aẍoş
ce mey gûn le’ilim bikero mey noş
text xusrewîy mukellel ce ’ac
amûdey gewher ew text çenîw tac
muresse’ sed têẍ polay zeř endûd
beł pêç ce yaqût tye nîşan zimřûd
sed tebeqçey sîm piř daney gewher
be xerwar ’ebîr, be sindûq ’enber
sed peřend menqûş ce yaqût zeř
to to şan ce muşk nafey ahû peř
mehdê muresse’ ce yaqût ał
peyker firozan ce feyrozey lał
yek sed ’emarî, sed esp û êster
’emarîy keş geşt sadey lał kemer
sed řomî ẍułam zeberced nigîn
mutella ne dewr taqyey zeřřîn
ce mîsrî û çînî û suqlabî peřend
ce mensûc hînd dêbay dił pesend
bawero be řesim şahan řûsî
bikerom be ’eqid nîkaḧ ’urûsî
wer ne şehenşa bey temennay xam
sîmirẍ koy qaf mawero be dam
min ew sîmirẍim bê diro û gezaf
aşyanşen ne koy qulley qaf
şa derkarşen be neyreng sazî
be destey zułfim bikero bazî
bo binyo bê ’eqid ne boy ’enber bom
dest efşar kero şemamey weşbom
her şew çun tuřřey bo muşk lûlim
peştan bo we bejin bałay newtułim
bikero be zor xatir şikşitem
bişkeno telîsim genc der bestem
newełła pey wêm xasteren bê deng
minîşûn ney qesir xirabey diłteng
her şeker xasen pey şay bê endêş
şîrîn tał byen, çêş mikero pêş
îse ba nebo şîrîn diłber
wesen perê şa şîrînîy şeker
min xo ce daxt koy xem lêm baren
henî ce gyanim çêşt derkaren
ḧeq hornegêro lêt ne bałay ser
wiyerdî ce wesił şîrîn pey şeker
mer xasen bizurg yend na dirust bo
yend lotî mezheb, qeḧbe perist bo
şeker herçend şox zułf ’ebîrînen
be ’erz û sîret key çun şîrînen?
bełê şa ce laş nîyen tefawit
er ’îsmetdaren, eger bê ’îsmet
aḧir key kêşat to pey min xwarî?
key ce sewday min to kerdit zarî?
key bî we bê min badet nenoşa?
key bî ce daxim qetranit poşa?
sa waçe pey min kam cefat kêşan?
key nîşî pey min xatir perêşan?
to her mey noşay, tepił şadît jend
şapûr kêşa nexiş, ferhad têşeş şend