کشتن خسرو شیر را به ضرب مشت در صحرای شاهرود
از کتاب:
شیرین و خوسرەو
اثر:
خانای قبادی (1704-1778)
3 دقیقه
542 مشاهده
شوعەرای شیرین شیعر، شیفایی شێوە
توغرا کێش زوڵف لوولیای لێوە
شیرینتەر جە نەقش شۆخ مانەوی
بەی تەور کێشا نەقش نامەی خوسرەوی
خوسرەو چەون چەنی شیرین ئەرمەن
شکارگای «شاڕوود» کەردن بە مەسکەن
پەی وێشان بە زەوق نیشتن نە جایێ
بە غەیر جە سۆسەن نەوی گیایێ
خاسەی غوڵامان نەو ڕسیدەی نو
جەرگەی خاڵ خاسان ئاهووی خوتەن خوو
سەف بەستن نە دەور سەیوان خوسرەو
شەوق سەندن جە شەمع چون ستارەی شەو
شیرین و خوسرەو چون کەیان کەی
نیشتن نە یەکجا مەست جورعەی مەی
سوراحیی زەڕیین نە دەست ساقی
غەمزەزەن چون حور بەهەشت باقی
مبەخشا پێشان چون مەیخانەی عەشق
بادەی شۆرئەنگیز قەیس مەینەت مەشق
سا وەختێ جە جام بادەی عەبیرین
جە شەراب عەشق پڕ شۆر شیرین
مەست بی، جە ناگا شێرێ سام سەنگی
زەنندەی پڕ زۆر غوڕەندەی جەنگی
چون ئەژدەها مەست جە دووردا دیار
خرۆش کەفت نە فەوج سوپای بێ شومار
هەڵمەت دا ئەو شێر شووم شەڕئەنگێز
هەر بە قەسد جەنگ خوسرەو پەروێز
خوسرەو بەو مەستیی، بێ زرێ و شمشێر
چون شێر غوڕڕان هەڵمەت کەرد وە شێر
بەو تەور مشنێ دا نە پشت گۆشش
گێجیا و گێج وەرد جە سەر شی هۆشش
فەرماش بە جەختێ تا گیانش سەندن
دەر ساعەت پۆستش پەی عیبرەت کەندن
جەو دەما شەرت کەرد شای واڵا گوهەر
هەرگیز بێ شمشێر، بێ تێغ و خەنجەر
نەنیشۆ هەرتا زیندەن نە ڕووی دەور
دەستوور بۆ پەرێ بەگلەران بەور
ئیسە جەو سەبەب ڕەسمەن پەی شاهان
پەی فەوج فەڕبەخش حیشمەت پەناهان
جە «مُدة العُمرعربی» هەرکۆ بۆ جاشان
مبۆ حازر بۆ شمشێر جە لاشان
سا وەختێ خوسرەو بە زەرب مشتێ
کوشتش بەو دەستوور زەرغام زوشتێ
شیرین هەڵمەت دا بە دەست پەروێز
بۆسا بەو لەبان شەهید شەکەرڕێز
خوسرەو جە شیرین ڕازان ڕێزەی قەند
ئەو دەست بۆسانە هیچ نەکەرد پەسەند
شیرین جە بۆسەی لەعل شەکەرڕێز
دەست خوسرەو کەرد تەمام شەربەت بێز
خێزا بە جڵدی ئەو شای دەریا دڵ
بۆ نیا نە بۆش وێنەی دەستەی گوڵ
واتش سپی سەوڵ، زوڵفان بۆعەنبەر
جای بۆسە ئێدەن بێ دەماخ مەبەر
خوسرەو جە بۆسەی ڕۆح ئەفزای بێ خەوش
یاوا ئەفسەرش بە چەرخ زەڕکەش
شیرین و خوسرەو چون دوور جە ئەغیار
چەشتشان شەربەت بۆسەی شەکەر بار
تا فرسەت مدین بە دڵواز دڵ
بۆ نیان نە بۆی یەکتەر وێنەی گوڵ
خوسرەو مەر جە خۆف ئەغیار نەگبەت
پەیش هۆر نەکەفتا یەک جارێ خەڵوەت
وەگەر نە ئەر مەست، ئەر هوشیار مبی
جە مەیگوون لەعلش هەر سەرشار مبی
ئەو نازەنین ناز شۆخ بۆ سونبوڵ
ئەندامش جە بەس نازک بی چون گوڵ
بە هەر کۆش خوسرەو تا کە مگرت دەست
چون شاخ وەنەوش ڕێحان ڕەنگ بەست
نەبی بە وێنەش گوڵ بەو ڕەنگینی
بەو شۆخ و ڕەندی بەو نازەنینی
بە ماچێش سەد موڵک جون چین و ماچین
هەرزان بی هێمای نە ڕووی سەرزەمین
جە بۆی هەناسەش عەترێ مخێزا
موعجیزەی ئەنفاس عیسا مبێزا