kiştin xisru şîr ra bih zirb mişt dir siḧray şahrud
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
536 Dîtin
şu’eray şîrîn şî’ir, şîfayî şêwe
tuẍra kêş zułf lûlyay lêwe
şîrînter ce neqiş şox manewî
bey tewr kêşa neqiş namey xusrewî
xusrew çewn çenî şîrîn ermen
şikargay «şařûd» kerdin be mesken
pey wêşan be zewq nîştin ne cayê
be ẍeyr ce sosen newî gyayê
xasey ẍułaman new řisîdey nu
cergey xał xasan ahûy xuten xû
sef bestin ne dewr seywan xusrew
şewq sendin ce şem’ çun sitarey şew
şîrîn û xusrew çun keyan key
nîştin ne yekca mest cur’ey mey
suraḧîy zeřîyn ne dest saqî
ẍemzezen çun ḧur beheşt baqî
mibexşa pêşan çun meyxaney ’eşq
badey şor’engîz qeys meynet meşq
sa wextê ce cam badey ’ebîrîn
ce şerab ’eşq piř şor şîrîn
mest bî, ce naga şêrê sam sengî
zennidey piř zor ẍuřendey cengî
çun ejdeha mest ce dûrda dyar
xiroş kefit ne fewc supay bê şumar
hełmet da ew şêr şûm şeř’engêz
her be qesd ceng xusrew perwêz
xusrew bew mestîy, bê zirê û şimşêr
çun şêr ẍuřřan hełmet kerd we şêr
bew tewr mişnê da ne pişt goşiş
gêcya û gêc werd ce ser şî hoşiş
fermaş be cextê ta gyanş sendin
der sa’et postiş pey ’îbret kendin
cew dema şerit kerd şay wała guher
hergîz bê şimşêr, bê têẍ û xencer
nenîşo herta zînden ne řûy dewr
destûr bo perê begleran bewr
îse cew sebeb řesmen pey şahan
pey fewc feřbexiş ḧîşmet penahan
ce «mudة al’umirErebî» herko bo caşan
mibo ḧazir bo şimşêr ce laşan
sa wextê xusrew be zerb miştê
kuştiş bew destûr zerẍam zuştê
şîrîn hełmet da be dest perwêz
bosa bew leban şehîd şekerřêz
xusrew ce şîrîn řazan řêzey qend
ew dest bosane hîç nekerd pesend
şîrîn ce bosey le’il şekerřêz
dest xusrew kerd temam şerbet bêz
xêza be ciłdî ew şay derya dił
bo nya ne boş wêney destey guł
watiş sipî sewł, zułfan bo’enber
cay bose êden bê demax meber
xusrew ce bosey řoḧ efzay bê xewş
yawa efserş be çerx zeřkeş
şîrîn û xusrew çun dûr ce eẍyar
çeştişan şerbet bosey şeker bar
ta firset midîn be diłwaz dił
bo nyan ne boy yekter wêney guł
xusrew mer ce xof eẍyar negbet
peyş hor nekefta yek carê xełwet
weger ne er mest, er huşyar mibî
ce meygûn le’ilş her serşar mibî
ew nazenîn naz şox bo sunbuł
endamş ce bes nazk bî çun guł
be her koş xusrew ta ke migirt dest
çun şax wenewş řêḧan řeng best
nebî be wêneş guł bew řengînî
bew şox û řendî bew nazenînî
be maçêş sed mułk cun çîn û maçîn
herzan bî hêmay ne řûy serzemîn
ce boy henaseş ’etrê mixêza
mu’cîzey enfas ’îsa mibêza