amdin şîrîn bih xîmey xisru ba kinîzan û miqalat bît xwandin ayşan
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
519 Dîtin
şewê mîşkînter ce zułf şîrîn
nesîmş piř ’etir, hewaş ’ebîrîn
saraş ce şemîm weşboy beharî
mibexşa nefḧey ’etir ’ettarî
hewaş çun ahûy şox xetayî
mikerd ne sara nafe guşayî
ce mîşk efşanî bad terebnak
’enber mibêza ’etir nafey xak
zemîn çun yetax mudbîrey tatar
mwatit têşdan koy mîşk be xerwar
midrexşa ne burc çerx exzerî
koy zeřřîn mang, zuhre û muşterî
ne qîrtas sewz taq zeřřîn tewq
’etarîd mikerd înşay meşq zewq
goşey sureyya çun duřir meknûn
řexşan kerdibê gencîney gerdûn
zemzemey murẍan řengîn şewxêz
seday ’eyş bezim westebê û bêz
xusrew nîştebê wêney eskender
ne bargey bo mîşk muresse’ gewher
ce feř feyrûz ferxundey şahî
nimanaş ne çem ce meh ta mahî
beẍeyr ce diłdar şîrîn diłber
bêzar bî ce text, ce tac û efser
ew şew yek şexsê zułf bo’ebîrîn
kyast we pay text feřbexiş şîrîn
ferma waçe pêş hey nûr ’eynim
řewneq bexiş řeng ayney zeynim
ce ’ersey wesî’ daray hefit kîşwer
şewê ce emşew nimebo xaster
hewaş boy beheşt heştem mibêzo
gerd mîşk ce bad saraş mixêzo
çêş mibo îmşew ta be subiḧ dem
binîşim be şad çun cemşîd cem
ce neş’ey şerab şîşey ’enberbo
ber kermê ne dił kogay xem koko
şîrîn çun çenî banûy diłpesend
cenab xusrew werdebê segend
mitersa û mikerd be řo ta be şew
firê îḧtyat ce kar xusrew
axir la ’îlac ew şay şîrîn řeng
çenî de kenîz zułf û xał sêwřeng
xaster ce mîş’el firozendey şew
kerdişan řewşen meclîs xusrew
sosen boy guł bûm, kełaf ’enberbo
şîrîn şeş dang şay firîşte xo
nîşt be şad çenî ceqey newhałan
ce bezim bo mîşk şay kemer lałan
hem ew şew fermaş şazadey
de kenîz şox guł boy guł dehen
«- - - - -Teksta ne aşkira» «perîza»y bo naf
«sewł bała»y sermest, zułf destey kiłaf
«semen turk» şox cemîn cam zeř
diłşad «gewher mułk» wêney sewł teř
»ferengîs» şox newřsîde nû
«’eceb noş» çun çerx tewar xoş xû
«humîlan» şox bała zeř sitûn
çun ahûy xuten hem «xuten xatûn»
girdîn cem kerdin ne xergey xusrew
so sendin ce şewq şu’ley şem’ şew
şapûrîç midra dest we ban dest
ne pay zeřřîn text perwêz sermest
ce dimay noşan badey xoş gewar
ferma pêşan şay ferîdûn tebar
her yek çun tûtî bezim eskender
ḧerfê ce şîrey şeker şîrînter
bwaçan ne bezim ta şeq mibo şew
be best eḧwał şîrîn û xusrew