micils giriftin xisru û şîrîn dir şikargah
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
563 Dîtin
wezîr dîwan keyqubad ’eşq
perê ’aşiqan bey tewr da sermeşq
ew peristaran zułf bo ’ebîrîn
ta meẍrîb çenî xusrew û şîrîn
be çewgan bazî, cirît û cewlan
be seyr gułzar temaşay sewłan
xêznaşan gerd yend ne řûy hewa
gerd řûy zemîn nîşt ne řûy sema
wextê be mîşkîn peřend zułmat
poşa ’urûs zêbay ka’înat
xusrew be şîrîn şîrey şeker řaz
watiş erê şox şîrîn ẍemze û naz
sa wesen carê ey çewgan bazî
ba demê be saz şîşey şîrazî
buyarmê dinya be şadmanî
dewran piř pûçen gişt mibîn fanî
şîrîn êd şineft ce lefiz perwêz
xêza û sucdeş berd çun sewł newxêz
watiş bînayîm, sebir û qerarim
herçî bwaçî ferman berdarim
xusrew êd şineft cew sewł sawa
guł guł çun gułzar cennet şikawa
herdû ne cayê sebiz mîrẍuzar
kerdişan we pa xeymey zeřnîgar
dewra dewrşan guł sed hezar řeng
midrewşa çun neqiş bitxaney fereng
’etir řeyaḧîn guł boy mîşkînî
mibexşan boy zułf řendan çînî
semen çun saqîy sade sîm endam
sosen meykeşen, nergis wêney cam
lale û şeqayq minmana ce dûr
řengînter ce çetir xaqan û feẍfûr
çinûr ’etir mîşk çînî mibêza
nefḧey ’ûd ce naf nesrîn mixêza
ce sewzey behar weşboy ’ebîrîn
ce ’etir gułzar seyrangey şîrîn
mwatit zemîn zumeřřed poşen
hewa çun ’ettar ’enber firoşen
çehçehey bułbuł, zemzemey duřřac
sebir ’aşiqan miberd be tarac
be neẍmey qumrî ne ser şax seru
miřeqsan çun nebiz ’aşiqan tezeru
destarçey řengîn şikofey řazan
midrewşan çun neqiş ebyezî û xezan
gułałey çînî, çîhreyî û gułnar
mîşkî û mêxekî narincî û gułxar
yeşmî û yaqûtî, mexmełî û madî
şemmî û aştî, ezrefî û awî
çun supay sengîn sarûçey xûnkar
midrabê çend tîp ne sara û kosar
çun gunehkaran pay wenewşe û guł
kerdebê zincîr sîlsîle û sunbuł
ne řewzey gułan boy ’enber engêz
şax ’enber bar řeyḧan pel dêz
minmana ce dûr çûn dûd mecmer
pey seyr perwêz şîrîn diłber
hey hey cew fesił ałay piř zewqe
cew şemîm bezim saray piř şewqe
cew behest abad fereḧ engêze
cew fezay feřbexiş boy ’enber bêze
feslê bew xasî, bew dił newazî
temaşaş pûçen bê ’îşqibazî
be şew ta be řo, be řo ta be şew
çenî bezim saz şîrîn û xusrew
cew gułzareda guł gişt mikerdin
cam badey nab têşda mwerdin
gułşen be gułşen cam mey be dest
ta yawan ew řo be «şehřûd» sermest
çoge hem xergey xusrewîy guł zeř
kerdişan we pa wext aftaw peř
seday sazşan keyxusrew destûr
bêza neẍmey řekib zemzemey mahûr
ce şeker xendey şîrîn diłbend
şehrûd bêzna şîrey şehd qend
’ebîr kerd erzan zułf mêşk bêziş
şeker řêza řaz teberzed řêziş
bałaş wêney sewł řiştey îlahî
bexşa be gułşen teşrîf şahî
xusrew ce şêwey şox û şengîy ew
ce sam û şewket şikoy sengîy ew
sułtan şadîş ce serheng xem
çenî supa û tîp mudara kerd řem