مجلس گرفتن خسرو و شیرین در شکارگاه
از کتاب:
شیرین و خوسرەو
اثر:
خانای قبادی (1704-1778)
3 دقیقه
562 مشاهده
وەزیر دیوان کەیقوباد عەشق
پەرێ عاشقان بەی تەور دا سەرمەشق
ئەو پەرستاران زوڵف بۆ عەبیرین
تا مەغریب چەنی خوسرەو و شیرین
بە چەوگان بازی، جریت و جەولان
بە سەیر گوڵزار تەماشای سەوڵان
خێزناشان گەرد یەند نە ڕووی هەوا
گەرد ڕووی زەمین نیشت نە ڕووی سەما
وەختێ بە میشکین پەڕەند زوڵمات
پۆشا عورووس زێبای کائینات
خوسرەو بە شیرین شیرەی شەکەر ڕاز
واتش ئەرێ شۆخ شیرین غەمزە و ناز
سا وەسەن جارێ ئەی چەوگان بازی
با دەمێ بە ساز شیشەی شیرازی
بویارمێ دنیا بە شادمانی
دەوران پڕ پووچەن گشت مبین فانی
شیرین ئێد شنەفت جە لەفز پەروێز
خێزا و سوجدەش بەرد چون سەوڵ نەوخێز
واتش بیناییم، سەبر و قەرارم
هەرچی بواچی فەرمان بەردارم
خوسرەو ئێد شنەفت جەو سەوڵ ساوا
گوڵ گوڵ چون گوڵزار جەننەت شکاوا
هەردوو نە جایێ سەبز میرغوزار
کەردشان وە پا خەیمەی زەڕنیگار
دەورا دەورشان گوڵ سەد هەزار ڕەنگ
مدرەوشا چون نەقش بتخانەی فەرەنگ
عەتر ڕەیاحین گوڵ بۆی میشکینی
مبەخشان بۆی زوڵف ڕەندان چینی
سەمەن چون ساقیی سادە سیم ئەندام
سۆسەن مەیکەشەن، نەرگس وێنەی جام
لالە و شەقایق منمانا جە دوور
ڕەنگینتەر جە چەتر خاقان و فەغفوور
چنوور عەتر میشک چینی مبێزا
نەفحەی عوود جە ناف نەسرین مخێزا
جە سەوزەی بەهار وەشبۆی عەبیرین
جە عەتر گوڵزار سەیرانگەی شیرین
مواتت زەمین زومەڕڕەد پۆشەن
هەوا چون عەتتار عەنبەر فرۆشەن
چەهچەهەی بوڵبوڵ، زەمزەمەی دوڕڕاج
سەبر عاشقان مبەرد بە تاراج
بە نەغمەی قومری نە سەر شاخ سەرو
مڕەقسان چون نەبز عاشقان تەزەرو
دەستارچەی ڕەنگین شکۆفەی ڕازان
مدرەوشان چون نەقش ئەبیەزی و خەزان
گوڵاڵەی چینی، چیهرەیی و گوڵنار
میشکی و مێخەکی نارنجی و گوڵخار
یەشمی و یاقووتی، مەخمەڵی و مادی
شەممی و ئاشتی، ئەزرەفی و ئاوی
چون سوپای سەنگین سارووچەی خوونکار
مدرابێ چەند تیپ نە سارا و کۆسار
چون گونەهکاران پای وەنەوشە و گوڵ
کەردەبێ زنجیر سیلسیلە و سونبوڵ
نە ڕەوزەی گوڵان بۆی عەنبەر ئەنگێز
شاخ عەنبەر بار ڕەیحان پەل دێز
منمانا جە دوور چوون دوود مەجمەر
پەی سەیر پەروێز شیرین دڵبەر
هەی هەی جەو فەسڵ ئاڵای پڕ زەوقە
جەو شەمیم بەزم سارای پڕ شەوقە
جەو بەهەست ئاباد فەرەح ئەنگێزە
جەو فەزای فەڕبەخش بۆی عەنبەر بێزە
فەسلێ بەو خاسی، بەو دڵ نەوازی
تەماشاش پووچەن بێ عیشقبازی
بە شەو تا بە ڕۆ، بە ڕۆ تا بە شەو
چەنی بەزم ساز شیرین و خوسرەو
جەو گوڵزارەدا گوڵ گشت مکەردن
جام بادەی ناب تێشدا موەردن
گوڵشەن بە گوڵشەن جام مەی بە دەست
تا یاوان ئەو ڕۆ بە «شەهڕوود» سەرمەست
چۆگە هەم خەرگەی خوسرەویی گوڵ زەڕ
کەردشان وە پا وەخت ئافتاو پەڕ
سەدای سازشان کەیخوسرەو دەستوور
بێزا نەغمەی ڕەکب زەمزەمەی ماهوور
جە شەکەر خەندەی شیرین دڵبەند
شەهروود بێزنا شیرەی شەهد قەند
عەبیر کەرد ئەرزان زوڵف مێشک بێزش
شەکەر ڕێزا ڕاز تەبەرزەد ڕێزش
باڵاش وێنەی سەوڵ ڕشتەی ئیلاهی
بەخشا بە گوڵشەن تەشریف شاهی
خوسرەو جە شێوەی شۆخ و شەنگیی ئەو
جە سام و شەوکەت شکۆی سەنگیی ئەو
سوڵتان شادیش جە سەرهەنگ خەم
چەنی سوپا و تیپ مودارا کەرد ڕەم