گفتار در شجرة الطوبی
از کتاب:
کۆمەڵەی شیعری فەقێ قادری هەمەوەند
اثر:
فقی قادر هموند (1830-1890)
1 دقیقه
448 مشاهده
یەک درەخت دارۆ عالی مەنزیلەت
حەق بە لوتف وێش سازان جە قودرەت
سەرازێر ئامان ئاوێزان عەرش،
شاخش بە هەر قەسر جەننەت بییەن پەخش
ئیسم ئەو شەجەر فاشەن بە تووبا
هەشت قیتعەی جەننەت کەردەن ئیکتیفا
زەیتوونەن جە لای بەعزێ موفەسسیر
بەعزێ دان نیسبەت تووبا بە ئەنجیر
نە حوجرەی وێشان هەر کەس جە کورسی
شاخش مەنمانۆ جە تۆی عورووسی
نەفس هەر میوە کەرۆ ئیشتیها
دەر لەحزە پەیدان جە شاخ تووبا
نە تۆی پەنجەرە مەیۆ جە بیرون
زەرفش موجەوهەر، سەرپۆش سەرنیگوون
ئەنواع تویوور مەیۆ، مەویەرۆ
نەفست بە هەر کام ئیشتیها کەرۆ
بە هەر نەوع کەباب کەردی ئارەزوو
بەو نەوع جە تەبەق حازر مەبۆ زوو
جە ئەکل تەعام نەفست کەردی سێر
جە پۆست و ئێسک ئیحیا مەبۆ تێر
بێ بەیع و خڕید بێ ڕەنج و تەعەب
مەوجوودەن ئەشیا هەر چی کەی تەڵەب
ئیشتیهای نەفست بە هەر چی کەرد مەیل
حازرەن بێ ڕەنج، بێ میزان و کەیل،
نە عەرسەی هەر حەوش یەلخییەن بوراق
هەردەم حازرەن موکەممەل یەراق