مقدمه
از کتاب:
شیرین و خوسرەو
اثر:
خانای قبادی (1704-1778)
3 دقیقه
1147 مشاهده
یا ڕەب بە فیراق فەرهاد کۆکەن
بە خورشید حوسن شیرین ئەرمەن
بە ئیستیلای عەشق خوسرەو و پەروێز
بە خۆش خورامیی گوڵگوون و شەبدێز
بە خامەی میشکین شاپوور چینی
بە ناز شیرین، بەو نازەنینی
بە ساز و بە لەحن شۆخ نیکیسا
بە نەبیر ئاهەنگ موعجیزەی عیسا
بە توغیان دەرد بێ دەرمان عەشق
بە تۆفان سەد ئەسر مەینەت مەشق
وێنەی نیزامی سەیقەل دەر زەینم
بە سورمەی دانش ڕەوشەن کەر عەینم
تا کە ماجەرای شیرین و خوسرەو
سەنگتاشیی فەرهاد، سەرگوزەشت ئەو
باوەرون وە نەزم خاستەر جە گەوهەر
بە ڕەشح خامەی شۆخ بۆ عەنبەر
جەلای عاقڵان ساحیب عەقڵ و دین
دانا بزورگان کوردستان زەمین
ڕاستەن مواچان فارسی شەکەرەن
کوردی جە فارسی بەڵ شیرینتەرەن
پەی چێش؟ نە دەوران ئەی دنیای بەدکێش
مەحزووزەن هەر کەس بە زوبان وێش
مەعلومەن هەر کەس بە هەر زوبانێ
بواچۆ نەزمێ جە هەر مەکانێ
وێنەی عوروسان زێبای میشک چین
بکەرۆش جە حوسن عیبارەت شیرین
خاریج جە مەعنی نەبۆ مەزموونش
کریابۆ چون شیعر جامی مەوزوونش
جەلای خیرەدمەند دڵ پەسەند مبۆ
شیرینتەر جە شەهد شیرەی قەند مبۆ
جە عەرسەی دنیای دوون بەدفەرجام
بە دەستوور نەزم نیزامی مەقام
بە لەفز کوردی کوردستان تەمام
پێش بوان مەحفووز باقی «والسَلامعربی»
مونشیی ئەی ئینشای شیرینتەر جە قەند
بەی تەور تەحریر کەرد نەزم دڵ پەسەند
ئەوڕۆ کە خامەی عەنبەر شەمامە
وەشبۆ کەرد جە میشک ئینشای ئەی نامە
تەئریخ هیجرەت «خَتم الرسلينعربی»
موتیع دیوان شەرح شەرع و دین
ڕۆی دووشەممە بی «ذي حَجة الحَرامعربی»
هەزار و پەنجا و یەکسەد سێ تەمام
ناگا جە وەختێ مینای سوبحدەم
جە جام خورشید ڕەوشەن بی چون چەم
جە پەردەی ئەسرار لامەکان ماوا
سرووشێ بەی تەور بە گۆشم یاوا
واتن: هەی شوعەرای خۆش نەزم و شێوە
جانشین قەیس پەی لەیلا لێوە
چێش مبۆ چون نەزم نیزامیی دوڕ سەنج
بە لەفز شیرین، بە بێ لارە و لەنج
جە وەسف فەرهاد شیرین و پەروێز
باوەری بە ڕەقس خامەی عەنبەر بێز
عەیبەن پەرێ تۆ دانای زەڕ شناس
دەمێ چون سەڕڕاف یاقووت و ئەڵماس
جەی زاراڕ عەشق جە ڕای پڕهۆشی
مەشغووڵ بی بە کار جەوهەر فرۆشی
حەیفەن وێنەی تۆ جەواهیر بارێ
نەکەرۆ پەی وێش ڕەنگین بازارێ
خاترت جەم بۆ جەوهەریی لاڵ سەنج
دانای دوڕ شناس، گەنجوور کۆی گەنج
هەر کەس وێنەی تۆ گەوهەر بارشەن
دانا و بزورگان خڕیدارشەن
گوشاد کەر زوبان جەواهێر بارت
تا گەرم بۆ زەریف سەودای بازارت
وەرنە جە دەوران تۆ جە بێکاری
عومرێ بە زایە و بە پووش مویاری
سفارش ئێد بێ یار کەردم تەمام
«سَلام عَلَيكعربی» باقی «والسَلامعربی»
بەندەیچ «حَسب الأمرعربی» ئەو سرووش غەیب
بە ڕەشح خامەی میشکین بێ عەیب
بەی تەور کەردمان ئەی نامەی نامی
ئینشا بە دەستوور نەزم نیزامی
ئومێدەن بە زات دانای شیرین کار
مەزموون ئەی نەزم جەواهێر نیگار
چون ڕاز شیرین نادیرەی ئەیام
شیرین بۆ بە کام کاففەی خاس و عام