میعراجنامە
از کتاب:
شیرین و خوسرەو
اثر:
خانای قبادی (1704-1778)
4 دقیقه
1235 مشاهده
شەوێ وێنەی شەمع تەجەللای کۆی توور
عەرسەی سەرزەمین ڕەوشەن بی جە توور
چەتر چین چەرخ چۆن دێبای گوڵ دۆز
مدرەوشا جە دوڕ نەجم شەب ئەفرۆز
توراب تیرەی ئەرز عەنبەرین
مبەخشا شۆڵەی شەمی خاوەرین
سەقف زەیبەقیی چەرخ زەڕبەفت پۆش
گوڵ گوڵ بە ئەنجوم وێنەی گوڵ فرۆش
نەسیمش بۆی زوڵف شیرین مبێزا
جەوهەرش بۆی میشک خوتەن مخێزا
ئەو شەو مەر حامیل وەحی ڕەببانی
جە دەوڵەت سەرای ڕای «ام هانيعربی»
واتەن پێش: سەیید سەومەعەی ئەفلاک
بەی تەور ئەمرشەن قەییوم بێباک
چەنی چەندین فەوج «اعلىٰ عليينعربی»
بشی وە پای تەخت «رب العالمينعربی»
واچە پێش هەی توور بورج فوتووەت
موتەووەج بە تاج ئاڵای نوبووەت
پۆسە ڕەزاشەن پادشای کەونەین
تەخت عەرش کەری بە فەرش نەعلەین
جەودما بە ئەمر بینای بیهتەرین
خازین بەهەشت جە ڕەوزەی بەرین
چەنی بوراقێ چون بەرق ئەنجوم
ئادەمی سوورەت، شۆخ، تاوس دوم
سم قورس یاقووت، سیای پڕ شەفاف
ناڵ نوقرەی ئەبیەز، مێخ مراوریی ساف
یاڵ خەیاتەی خام، خۆش ڕەنگ بێ خەوش
وەشبۆتەر جە وەڵک وەنەوشەی وەنەوش
لوجام لاجیوەرد، سینەبەند جە توور
ڕەشک توڕڕەی زوڵف پڕ گرنج حوور
زین جە یەک پارچەی لەعل بەدەخشان
تەنەشان جە یەشم مرواری و مەرجان
جە فیکر ئەسحاب هەستیی خۆشتەر
تەی مکەرد ساتێ نە چەرخ ئەخزەر
جیبراییڵ چەنی میکائیل بە دەو
ڕاهی بین بە ڕا کێشاشان جڵەو
بە تەکبیر گۆیان وەر جە سوب شەبەق
شین وە پای سەریر ڕەسووڵ بەر حەق
ئەوشەو نە حوجرەی جای «ام هانيعربی»
میهمان بێ ڕەسووڵ حەیی رەببانی
ئاخر بە سەد عیزز، بە سەد ئیحتیرام
«مبلغ الوَحي عَليه السَلامعربی»
بە میروەحەی باڵ قورس بۆ عەنبەر
بێدار کەرد جە خاو سالار مەحشەر
واتش: «يا سَيد، لعمركعربی» مەقام
تەڵەبکار تۆن «حَي لايَنامعربی»
پەرێ سواریت بوراقێ جە توور
کیاستەن جەناب پادشای غەفوور
ئێد کە شنەفتش شای «بدر الدجىٰعربی»
بە سەد شادی و زەوق هۆرێزا وە پا
قۆڵش گرت جەناب جوبرەئیل بە ناز
سوار بی حەبیب حەیی بێ نیاز
ئیسرافیل چەنی مەلائیک بە دەو
گرتشان ڕیکاب هومایون ئەو
وێنەی غوڵامان حەڵقەی دوڕ نە گۆش
کێشاشان قودسی غاشیەش بە دۆش
زومرەی سەبووحی گر بی تەمام
وێنەی مەشعەلدار شاهان جەم جام
جوبرەئیل چەنی مەلهء ئەعلا
ڕووشان کەرد نە ڕای «مَسجِد الأقصىٰعربی»
ڕۆح هومایوون ئەنبیا و ئادەم
ئامان وە پێشواز سەیید خاتەم
رەسوول نە ئەوشەو بی وە پێشواشان
ساتێ نیشت بە عەیش عوشرەت جەلاشان
دیسان سوار بی وە پشت بوراق
یاوا بە ئەیوان گەردوون شەش تاق
سەبعەی سەییارە چەنی ماهـ و خوەر
کەردشان پابۆس سەیید سەروەر
بەرجیس و ناهید، کەیوان و بەهرام
بە خەت شەریف، عەتارید تەمام
سپەردەن بە ئەو بزورگی و نامی
بە چەند ئیحترام نامی و گیرامی
مێڕڕیخ ڕیکابش بۆسا بە ئیعزاز
پەی نەسرش هەم نەسر تایر کەرد پەرواز
جە ڕەنگامێزیی ڕەیحان ئەی باغ
نیا نە دیدەی وێش سورمەی «مازاغ»
سا وەختێ تەی کەرد بە فەزڵ بێچوون
سەد هەفت ئەوڕەنگ چەرخ بێ ستوون
بە تەئید زات حەیی بێ هەمتا
تەشریف بەرد بە سەدر سیدرەی مونتەها
جوبرەئیل چۆگە بە خاتر مەلوول
عەرز کەرد بە پایەی سەریر ڕەسوول
وات: ئەر من چەنی تۆ ببوون ڕاهی
مسۆچوون بە نوور زات ئیلاهی
تا ئاخر ڕەسوول سەیید سەروەر
جە سەواد عەرش ئەعزەم کەرد گوزەر
مەحرەمان غەیب گشت میننەت بەردن
ڕەفڕەفێ جە نوور پەرێش ئاوەردن
سوار بی چۆگە بە ڕەفڕەف هەی کەرد
ڕاگەی پانسەد ساڵ لامەکان تەی کەرد
وەختێ بە زەروەی لامەکان یاوا
لەرزا جە هەیبەت هەتاکە تاوا
ئاما نیدا لێش نە پەردەی ئەسرار
واتن: «لا تخف» سەیید موختار
عەرز کەرە دوعات «یا خیر الانام»
بە سوردایقات «حی لاینام»
ڕەسوول بە جەناب سەنعەت ساز فەرد
هەرچی بی مەتڵەب سەراسەر عەرز کەرد
شای «کثیر اللطف» بێ هەمتای وەههاب
جە ڕای مەرحەمەت کەردش موستەجاب
هەم ئەوشەو قەییوم فەرد بێ ئەندێش
یاوناش دەرسات بە مەقام وێش
ئومێدم بە زات بەخشندەی داوەر
خانای خەم خەیاڵ زام دڵ خەتەر
ببەخشۆ گوناش جە عەرسەی مەحشەر
بەو شەمع میحراب ڕەسووڵ سەروەر