ڕایگرت بە ستەم دیسان چاوی ڕەشی فەتتانت
از کتاب:
دیوانی سالم
اثر:
سالم (1800-1866)
1 دقیقه
719 مشاهده
ڕایگرت بە ستەم دیسان چاوی ڕەشی فەتتانت
بۆ قەلبی دڵی زارم سەف سەف سەفی موژگانت
ئاشوفتەگییی دەوران کوللەن لە دڵم قەیدە
سەوداییی پەرێشانم بۆ زولفی پەرێشانت
تیری موژە قاتیلمە، خۆت دوور بە لە نەزدیکم
وا چاکە نەبێ خوێنم ئالوودە بە دامانت
دڵ ساکینی گێسووتە، ڕەهجۆیە لەناو زوڵمەت
تا ئابی بەقا مابێ، لەو چاهی زەنەخدانت
دووهەفتەمەهی من تۆی، دوو هەفتەیە مەستووری
بێ، چاکی نیقاب لادە بۆ عاشقی حەیرانت
بەدگۆ! بە بەدی کردمت بەدنامی هەموو عالەم
سا لادە لە من ئیتر، توو مەسحەف و ئیمانت
وەک بولبولی شۆریدەم بۆ لێوی وەکوو غونچەت
پەروانەیی بێ پەروام بۆ عاریزی ڕەخشانت
سا حەرفی دوعا خوانت گوێ بگرە، بڵێ ئامین
جان و دڵی سالمتخلص بێ، قوربانی دڵ و جانت