بانگ
از کتاب:
پاشمەرگەی قانع
اثر:
قانع (1898-1965)
2 دقیقه
726 مشاهده
ئەی گرۆهی برسی، ئەمڕۆ ڕۆژی تێکۆشینتە
ڕۆژی تۆڵەسەندنی خوێن خواردنی دێرینتە
باڵی لێ هەڵماڵە وەک شێر، بێرە مەیدانی خەبات
ڕوو کەرە ئاغا، کە ئاغا دوژمنی خوێنینتە
لێدە نەعرەی دەنگ دلێری، ڕووبەڕووی زوڵم و ستەم
هەر بڵێ ئەی کاکی مالک بۆچ ئەمە ئایینتە!؟
تا بە کەی زۆرداری و چەوساننەوەی چینی هەژار!؟
خوێنمژینی کۆمەڵی بێ دەستەڵاتان دینتە
یەک قرۆشت دا بە ڕەجعی تورک و تاپۆت گرتە دەس
تا قیامەت ئەو قرۆشە مایەکاری ژینتە
باخێ هێندە قایم و مەحکەم نەبووی من نەتگەمێ
دەستی ئیستیعمارە هێز و کۆمەک و پەرژینتە
گوێ گرە، قانوونی سۆشیالیزمی دەنگی دایەوە
ڕۆژی مەرگت زۆر نزیکە، ئەو دەنگە یاسینتە
نۆکەر و پێشخزمەت و کارەکەر و دایانەکەت
کەوتە ڕۆژی خۆی، بزانە دوژمنی خوێنینتە
خۆت لە من باشتر ئەزانی: باوی زۆرداریت نەما
عوودەکەی ئەمڕۆ، سبەینێ شۆڕشی ناڵینتە
ورگت شۆڕ کرد وا ئەزانی هەر بە ورگ ئەبڕێتەوە
دەی بتۆپە! ڕۆژی ئەمڕۆ ڕۆژی هەڵلەرزینتە
داسی دەستی چینی جووتیارە ئەنێتە گەردنت
تێر بگریە، چونکە ئەمڕۆ ڕۆژی گریە و شینتە
بەند بە بەند قانوونی ئیسلاحی زراعی دێتە پێش
فەخرە بۆ من، بۆ جەنابت ئایەتی تەڵقینتە