لە نادانی برا سەرفی نەزەر کە
لە کتێبی:
دیوانی زاری
بەرهەمی:
زاری (1905-1982)
2 خولەک
719 بینین
لە نادانی برا سەرفی نەزەر کە
کڵاوی ئەقڵ و دانایی لە سەر کە
لە خۆراک و خەوا ئەوقاتی خۆ خەرج
مەکە، ئینسانی، کەم تەقلیدی کەر کە
مەکە بێهوودە سەرف ئەم نەغدی وەختە
هەتا عومرت هەیە کەسبی هونەر کە
ئەگەر نەتدیوە باڵی دانش و هۆش
تەماشای سەیری پەروازی بەشەر کە
بە سووڕەت نە، بە عیلم ئینسانە ئینسان
لە سووڕەت پەروەری وەک بت حەزەر کە
بە نووری عیلم ئەم دنیایە ئاوا
لە دڵ بەو نوورە تاریکی بەدەر کە
بەری عیلمە تەواوی پیشە، فیکرێ
لە ئالاتی سواری و بارەبەر کە
وەکوو عیساکەس بڕۆ بەو شەوقە بۆ ژوور
وەکوو مووساکەس بە دەریادا گوزەر کە
بە دەستووراتی ئەو ڕێگانوێنە
لە بوون تا مردنت کەسبی هونەر کە
نەسەب ئینسان چون ناخاتە پێشۆ
بە عیلم و سەنعەتێ خۆ موعتەبەر کە
برا، تەشبیهی بەتتاڵانی بێکار
ئەگەر شا بێ بە داری بێ سەمەر کە
گەدا شایە ئەگەر دەس باتە کارێ
هەزار ئاغا فیدای یەک کاریگەر کە
ئەمن پیری ئەوا باڵی شکانم
ئەتۆ ئەووەڵتە بۆ دانش سەفەر کە
لە دانیشگاهی دانش پەروەرانا
لە دەردی جاهیلی خۆبێ خەتەر کە
لە ئاوا بوونە ڕۆژی عومری«زاریناسناوی ئەدەبی»
ئەتۆ ڕۆژت بە دانش شوعلەوەر کە