مەیموون و دارتاش

لە کتێبی:
دیوانی پیرەمێرد
بەرهەمی:
پیرەمێرد (1867-1950)
 2 خولەک  503 بینین
پیاوێکی دارتاش مەیموونێکی بوو
بۆ هەموو ئیشێک لەگەلیا ئەچوو
هۆگری بووبوو لای هەڵوەستابوو
مەیموون شاگرد بوو، دارتاش وەستا بوو
کە ئەیوت: تەشوێ، زوو بۆی ئەهێنا
شەقەی مشاری بۆ دائەهێنا
ڕۆژێک وەستاکەی داری ئەقڵاشت
جارجارە بە پواز لەنگەری ئەداشت
بە تەور دارەکەی ئەقڵیشاندەوە
بە پواز لە یەکی ئەڕەواندەوە
وەختی نیوەڕۆ کە چوو بۆ سەر ئاو
مەیموون هاتە جێی وەک وەستای تەواو
خۆی قیت کردەوە و لە جێی ئەو دانیشت
کلکی خۆی بە شوێن قڵیشدا داهێشت
پوازی دەرهێنا و کلکی پێوە بوو
کەوتە قیژ و هووڕ ئاگری تێ بەر بوو
کلکی مەیموونی تونگ تێ چەسپیبوو
قڵیشی جێی پواز یەکدگیر بووبوو
مەیموون غەشیم بوو، بوو بە فاقەوە
ئەیناڵان بە دەم واقەواقەوە
لە واقەی مەیموون خەڵک گرد بوونەوە
چوونە پێشەوە لێی ورد بوونەوە
کلکی گیرا بوو لە قڵیشی دار
ڕێگای نەدەبوو کەوتبووە هاوار
وەستا لە تاوا سەراوی نەکرد
هاتەوە پوازی لێدا دەستوبرد
مەیموون ڕزگار بوو بە کولەمەرگی
بەڵام ژانەکەی گەیشتبوە جەرگی
مەیموون چۆن ئەبێت بە وەستای دارتاش
بلبل و لەقلەق نابن بە یۆڵداش
ناگاتە پایە مەردی ناحساب
نان بۆ نانەوا، گۆشتیش بۆ قەساب
قەت ڕێک ناکەون حوشتر و قەزازی
هەورامی و سواری، مەلا و ڕمبازی