نەورۆزنامەی نەسرین و پەروین

لە کتێبی:
دیوانی پیرەمێرد
بەرهەمی:
پیرەمێرد (1867-1950)
 1 خولەک  544 بینین
پار دێتە بیرم وەک خەوێ
کە دیبێتم پێرێ شەوێ
ساڵێکی وا تازەم دەوێ
کە کورد بەهاری بەرکەوێ
وەتەنی پێ بێت بە گوڵزار
مژدە بێ ساڵ گەڕایەوە
ئاگری نەورۆز کرایەوە
بەفری زستان توایەوە
گژ و گیا و گوڵ ژیایەوە
نوخشەش بێ لە کوردی هەژار
گوڵ لە باغا خۆی دەنوێنێ
بلبل بە ڕوویدا دەخوێنێ
هەور مرواری ئەپژێنێ
شەماڵ زیندەگانی دێنێ
نێرگز مەستە و چاو بە خومار
وا فەرشی چەمەن ڕاخرا
گوڵاڵە بوو بە شەوچرا
گوڵ دەستەیان بەست وەک برا
نەسرین و لاولاو تێکخرا
هاتنە لەنجە سەرو و چنار
بلبل شەو بە ئاواتەوە
بادەی شەونم ئەخواتەوە
دەگری بە مناجاتەوە
بەڵکوو گوڵ دەم بکاتەوە
ئەو پێکەنێ و ئەم بگری زار
وەنەوشە وەک من شینپۆشە
لە سوجدەدایە خامۆشە
دڵی بۆ گریان بەجۆشە
بەهاری لە لا ناخۆشە
بێزارە لە نەغمەی هوزار