سۆزی پیرەمێرد

لە کتێبی:
دیوانی پیرەمێرد
بەرهەمی:
پیرەمێرد (1867-1950)
 2 خولەک  640 بینین
یاران فەرهادم، یاران فەرهادم
بە وێنەی فەرهاد هەر ڕەنج بە بادم
هەم مەجنوونیشم لە هۆش ئازادم
کوردێکی پەتیم بۆیە ناشادم
دوو عاشقی کۆن هەردوو ناودارن
هەردووکیان کوشتەی عەشقی دڵدارن
هەرچی شاعیرە بۆ ئەفسانەی عەشق
پیشەی ئەوانیان کردۆتە سەرمەشق
تاهربەگ ئەڵێ: یاران فەرهادم
جێنشینی خاس قەومی فەرهادم
وەلی دێوانەش ئەڵێ: مەجنوونم
دێوانە، وارس قەومی مەجنوونم
ئیتر مەجنوونە یاخود فەرهادە
تەرانەی عاشق داد و بێدادە
یەکێکیان مەجنوون قەیسی عامری
ئەوی تر فەرهاد لە دنیا بەری
فەرهاد کوردێکی دەوری بێستوون
لە عاشقیدا شێتتر لە مەجنوون
مەجنوون هیچ نەبێ لەیل دڵخوازی بوو
لە منداڵیشدا لەیل هامڕازی بوو
فەرهاد بە تەفرەی شیرینی بەدناو
هەر لە خۆیەوە پێی خۆی خستە داو
نەدیو، نەناسیاو، ڕەدوو کەوتبوو
وەک کچە مەنگوڕ هەڵیانگرتبوو
بە سیاسەتی ڕەقابەت هێنای
فەرهادی کردە دۆستی جانفیدای
خوسرەو لەشکری ئیسفەهانی بوو
شیرینیش ڕێکەوت فەرهادی بۆ بوو
فەرهاد ئەیزانی کە بۆ ڕەقابەت
پێی ئەکەوێتە داوی سیاسەت
بە عەشقی شیرین تەشوێی ئەوەشان
بە زۆری بازوو کێوی ئەڕووخان
شیرین و خوسرەو بوونەوە بە یار
فەرهاد قوڵنگی خۆی لێ کەوتە کار
خۆ من عاشق نیم عەشقیش نەماوە
لە ناو دڵخوازا بێ شەرمی باوە
بەڵام من لەسەر عاشقانی پێشووم
تەشوێی سیاسەت بووە بە تێشووم
ئەمەوێ کێوی بێستوون کون کەم
بە زمانی شیرین شوێنی خۆم ون کەم
ئاخ چی بکەم لەگەڵ سەرنویشتی خوا
کورد بە قاڵەی دەم زوو تەفرە ئەخوا