سەوزەڵەی چاوڕەش

لە کتێبی:
دیوانی پیرەمێرد
بەرهەمی:
پیرەمێرد (1867-1950)
 1 خولەک  712 بینین
سەوزەڵەی چاوڕەش، سەوزەڵەی چاوڕەش
ڕۆژی ڕەش کردم سەوزەڵەی چاوڕەش
وەختێ زوڵف و پرچ لێک ئەبن بە نەخش
عەقڵ و هۆشی من هەردوو ئەبن پەخش
پرچت لوول مەکە حاڵم پەشێوە
کێ ناشێوێنێ ئەو توڕڕە و شێوە؟
پڕ «روح القدسعەرەبی» ە سڕڕی ئەو لێوە
هەرتای زوڵفێکت دڵێکی پێوە
ڕەشیی بەختی من کلی چاوتە
ڕشتەی حەیاتم زوڵفی خاوتە
ئەم چەند ڕۆژەیە کەوا باوتە
دڵم مەشکێنە کە پێناوتە
کوشتەی نازی خۆت زۆر مەدە ئازار
زوڵفت نەبێتە پەرژینی ڕوخسار
با ڕۆژ نەگیرێ و نەکەومە هاوار
عاشق لە بێزار زوو دەبێ بێزار
پرچت لوول مەکە، دڵم مەلوولە
شێوەی مەلوولیم وەک پرچی لوولە
تۆماری شەرحی دەردم بەتوولە
تەریبی وەسڵ و بەختم شەفتوولە
بەسم بکوژە بە تیری غەمزە
غەمزەت ئەندامی هێنایە لەرزە
قەتڵی دڵدادەت لە لای تۆ فەرزە
سەوزەی بێ بەینەت! ئاخ داخت سەوزە!
ئیشارەی دیدەت بە من ئەنوێنیت
خەریکی ئەوەی گیانم بستێنیت
وا گیانم دایتێ هەر تۆ بمێنیت
بە مەرجێک لە سەر قەبرم بخوێنیت