بۆ خزمەتی یار

بە ناوی «کەسنەزان» ەوە بڵاوی کردۆتەوە
لە کتێبی:
دیوانی پیرەمێرد
بەرهەمی:
پیرەمێرد (1867-1950)
 2 خولەک  777 بینین
بۆ خزمەتی یار، بۆ خزمەتی یار
ئەمشەو ڕێکەوت بوو بۆ خزمەتی یار
نە ڕێی حەسحەس بوو، نە بەد، نە ئەغیار
تەنها سەعاتێک تەنها من و یار
شەو خەرقەی نیلی قەترانی پۆشا
کەڵەشێر بێدەنگ نەدەخرۆشا
مورغی عەرش لەجێی خۆی هەڵنیشتبوو
دیار بوو ماندوێتی ڕۆژی چێشتبوو
کاکێشان باری کەری کەوتبوو
کای ڕەشکەی لەسەر ڕێ هەڵڕشتبوو
گای حەوتەوانە کای زۆر خواردبوو
هەوساری بە دەست قوتب سپاردبوو
ئەوشەوە لەیلا و مەجنوون یەک کەوتن
بەڵام لە خۆشیا نەئەسرەوتن
ئاواتەخوازی خەڵک هاتبووە دی
لە ڕێی ئەفلاکا جووڵەت نەئەدی
هەستام خۆم گورج کرد، ئازا، شێرانە
نەمئەوت هیچکەس لە لام ئینسانە
خەرقەی شەوگەردیم کێشا بەسەردا
چاکی داوێنم کرد بە کەمەردا
ڕۆیم تا گەیمە بەردەرگاکەی لەیل
لەوێ بوبوومە قەیسەکەی دوجەیل
چوومە ژوور سەری لە نیوەشەودا
ئێشکچی کچان هەموو لە خەودا
لەسەرخۆ پێم نا، چوومە سەرینی
ماچم کرد خاڵی لێوی شیرینی
چاوی هەڵبڕی سەوڵی خەرامان
یەخەی کردەوە سەر تا بە دامان
وتی: کام بێ شەرم لە نیوەشەودا
ڕاستی کردمەوە لە شیرین خەودا
بەرقی ڕوخسارم بدات لە جەستەی
هەڵیقرچێنێ ئەندامی خەستەی
وتم: ئەی شەمعی ڕووی نازەنینی
پەروانەکەت هات تا بیسووتێنی
بە ئومێدی سەر نەهاتمە ئێرە
من قوربانی تۆم بمکۆژە لێرە
من شۆڕی عەشقت بێ ترسی کردووم
هەرچەند کە زیندووم لەڕیزی مردووم
چاوت بیماری بە ناو لەسەرە
پیاوکوشتن لەلای نەخۆش خەتەرە