سۆزی پیرەمێرد
لە کتێبی:
دیوانی پیرەمێرد
بەرهەمی:
پیرەمێرد (1867-1950)
1 خولەک
1343 بینین
هاوار تێپەڕی، هاوار تێپەڕی
دووری باڵاکەت لە حەد تێپەڕی
پەژارەت هێزی لە ئەژنۆم بڕی
لە هێلانەی دڵ شەوقی دڵ فڕی
فراقت فەرقی کرد بە کۆی مەفرەق
دڵ بە شەوقی غەم وەک شەبەق بوو شەق
تۆ جوێ بوویتەوە و گیان جیا بووەوە
ڕۆژی ڕووناکم تاریک بووەوە
تیرێکی وەهات داوە لە جەرگم
بێزارم لە ژین لام خۆشە مەرگم
توخوا خۆت بیڵێ نەونەمامی نۆ
مردن خۆشترە یاخود دووری تۆ؟
مردن جارێکە و زوو ئەبڕێتەوە
دووریت دەردێکە ئەتەنێتەوە
ڕەنگە جەستەی من شووشەی پۆڵا بێ
هێند بیڕەنجێنن هێشتا هەر ما بێ
چەرخی چەپکردار خستوومیە سەما
وەک بەردم دابێ لە شوشەی سەما
نایەڵێ ساتێک بسرەوم بۆ خۆم
ئەمە ساڵێکە من چاوەڕێی تۆم
با شەوێک لە لات دەردم هەڵڕێژم
تامی شیرینی ڕازت بچێژم
ئەنجا بشمرم هیچ باکم نابێ
گەرمەگۆڕمە نان و کەبابێ
ئێستا لە داخا هیچم پێ ناخورێ
نەوسن چۆن بەرگەی برسێتی ئەگرێ
دوو شتە ڕێگەی ڕزگاری من بێ
یا یار هی من بێ، یا یار هێمن بێ