نەوبەهار

لە ساڵی ١٩٤٠دا بە ناوی «زەڵمی» یەوە وتوویەتی
لە کتێبی:
دیوانی پیرەمێرد
بەرهەمی:
پیرەمێرد (1867-1950)
 1 خولەک  762 بینین
یاران نەوبەهار، یاران نەوبەهار
خوا نەشئەیەکی وای دا بە بەهار
گیاندار و بێگیان، زەوی و گیا و دار
خرۆشا و زەڵمیش کەوتە هاڕەهاڕ
سەری نایە دەشت وێڵ و بێ - قەرار
بە شۆڕی شێتی خۆی ئەدا لە دار
***
شارەزوور بەرگی سەوزی لەبەردا
کەمەری زیوی چەم لە کەمەردا
هەوای بووکێنی تازە لە سەردا
چەند خوازبێنیکەر لە داخ و دەردا
دەستی لە زاوای نێرەمووک بەردا
لە دەردیسەری نابەکار بێزار
***
نێرگس بە دیدەی شۆخ و شەنگەوە
پۆڕ بە کناچەی خۆشئاهەنگەوە
ڕاوکەر بە شوێنیا بە تفەنگەوە
نێرەکەر بە جۆش زەڕ و دەنگەوە
هەندێ بە سەودای قەنگەی بەنگەوە
هەریەک بە ڕەنگێ کەوتوونە ڕووی کار