ڕۆژی تازە
لە کتێبی:
دیوانی پیرەمێرد
بەرهەمی:
پیرەمێرد (1867-1950)
1 خولەک
730 بینین
ڕۆژی تازەی ساڵی تازەی ئێمە هات
ڕۆژهەڵات ڕۆژی هەڵات، سەرما هەڵات
بای بەهار هات خاکی زیندوو کردەوە
بۆیە نێرگس چاوی مەستی کردەوە
نەوجوانی هات و پیری بردەوە
تیشکی ڕۆژ دەرکەوت تەمی لابردەوە
هەردە سەوز و مۆرە وێنەی بەرگی بووک
شایی دەنوێنێ چراخانی گڵووک
شەونمی ناو لالە بادەی بلبلە
بەو مەیە سەرخۆشە وا شەیدای گوڵە
چونکە خۆش ئاواتە هەم ئاواتەخواز
زۆر بەسۆزە ناڵەکەی وەک سۆز و ساز
هاتە جونبوش ئاو و سەوزە، با و درەخت
دەوری کانی بوو بە گوڵزاری بەهەشت
ئەو بەهەشتە خۆشە جێی بەزمی جەمە
دەم بە دەم جێی یەکدگیری هەمدەمە
بورجی بەرخە ڕۆژ سەرئەفرازی ئەکا
بەرخی ئێمەش بۆیە وا بازی ئەکا