بەفری بەهار
لە کتێبی:
دیوانی پیرەمێرد
بەرهەمی:
پیرەمێرد (1867-1950)
1 خولەک
801 بینین
بەفری ڕووسپی بە دەمەوبەهار
سەری دایەوە سەری پێ بوو هار
ئاوەدانی و چۆڵ هەر وەک پەموانە
لە لۆکەی بەفرا تێکڕا پەنهانە
دڵسارد و ڕووڕەش بێ بەزەییە
ڕووسپیەتیەکەی ناوی تورکییە
وەک گەنمەشامی بریشکەی سەرساج
سپی هەڵگەڕا هەژار بێ عەلاج
کلکەخاکەناز لە سەرما سووتا
گوێسوانەکانمان بە زوقم ڕووخا
گۆپکەی درەختی نازداری ترسان
پەلکی وەنەوشەی سیس کرد چرووسان
ئەو چاوە جوانەی نێرگسی کوێر کرد
بەستەڵەک دەستی «خانمەڵی» ی لێ برد
پیرێژن ئەڵێ: بەفری ئارد بووە
قەدریان نەگرتووە و لەکیسیان چووە
چی دەبوو بەفر شەکر بوایە
سەرمایە ئەبوو بۆ ئەم سەرمایە
هاتوە خۆی پیشان هەڵەکۆک ئەدا
جاڕی ڕیسوایی کۆکەکۆک ئەدا