دووبارە - تاڤگەی زەڵم

لە کتێبی:
دیوانی پیرەمێرد
بەرهەمی:
پیرەمێرد (1867-1950)
 1 خولەک  905 بینین
ئاوە جوانەکەی سەرچاوەی زەڵم
بۆچ بەهار لێڵی و پاییزان پڕ تەم
ئەڵێی سەرچاوەی بەختی کوردانی
لەسەردا سارد و سەر لە ئاسمانی
زۆری پێ ناچێ ئەکەویە زەوی
وەک فرمێسکی چاو بڵاو و نەوی
وێڵ و عەوداڵی ڕێی چغورد و هەرد
بە قەڵبەزەوە سەر ئەدەی لە بەرد
یەکدگیر ئەبی لەگەڵ تانجەڕۆ
بە عەشقی سیروان وێڵ و ڕەنجەڕۆ
لە دواواندا کە یەک ئەکەوی
وەک دوو میسرەعی فەردی مەولەوی
سیروانی ئەو چەم تانجەڕۆی ئەم چەم
بدەن وەهەمدا ئەم چەم تا ئەو چەم
سەر بنێرەوە بە لم و خاکا
بگری لە بارگەی سەلمانی پاکا
بڵێ: بە قوربان، تۆ ناوت پاکە
بمانخەرە ڕێی یەکێتی و چاکە
تۆ خۆت ئەزانی ئەو عەردە دێمە
کە پاراو ئەبێ بە ئاوی ئێمە
کە وا بێ گوڵ و نێرگس پێکەوە
با شاد بن بە دڵی ڕێک و پێکەوە