سروودی من
لە کتێبی:
دیوانی محەمەد ساڵح دیلان
بەرهەمی:
محەمەد ساڵح دیلان (1927-1990)
1 خولەک
1036 بینین
کوێستان تارای شۆی بەسەر داداوە
خشڵی گەردنی (مای زەرد و کاوە)
شەماڵ لە ترسی شنەی نسێی سەخت
پەنای بۆ باسک و دەشت هێناوە
پەڵەی گوڵاڵە لە ترسی چنوور
ناو جەرگی سووتاو ڕەش هەڵگەڕاوە
ئای.. جەستەی ئاڵتوون، کەژاڵ چاوانی
نێرگس خەیمەگای زێڕی هەڵداوە
***
چوون بووکی شاخە جریوەی شمشاڵ
شاباشی شایی هاژەی چەماوە
بەزم قەتارەی قوڵنگ و قازە
(مەی) تریفەیە (جام) مەنگی ئاوە
ئاوێنە بەردە (جوان) گردەکانە
(پرچ) تارای گوڵە (شانە) شەقاوە
لەسەر چنار ناز، لە زەڵم سازێ
لە قۆپی ڕازێ بەهەشت ڕازاوە
شیرین.. شیرینی خاکی کوردستان
هەر بۆ پەرەستن دروست کراوە