٦
- تو دڤێ بزەوجی... بەری کۆ رۆشەن خانم بکەڤە عەرەبی، ئەو گۆتنا خوە یا داوین ژی دبێژە. پشتێ رۆشەن خانمێ، جەلادەت بەگ ژی دکەڤە عەرەبێ. ب دو جەلادەت بەگ رە، دۆستێ وی هوسنیێ بەرازی ژی دەرە و ل ئالیێ پێش، نک شۆفێر رۆدنە. عەرەبا نۆ ب رێ دکەڤە. دنیا سارە، چلێ ١٩٣٥ -ئان دەست پێ کریە. تشتەکێ کۆ زوو ب زوو ل دەڤەرێن بەیرووت و شامێ ناقەومە، ئیجار، ئیسال، قەومیە؛ بەرف باریە. بەرفەکە بۆش هەموو دۆرئالی ڤەگرتیە. دنیا سپی دکە و بەرف ژی، هوور ب هوور، دبارە.
بایێ دانێ سبێ کولیێن بەرفێ ددە بەر خوە و وان ل هاوێ دزیڤرینە. کولی تێن و ل پەنجەرێن عەرەبێ دکەڤن و دهەلن. جەلادەت بەگ ژ هوندر ل کولیێن دەر کۆ ب لەز دخوین و وندا دبن، دنهێرە. رۆشەن خانم ژی ل وی.
- جەلادەت ئابێ، ئەم چ بکن؟ تو ب ڤێ قایل نابی، ب وێ قایل نابی... دە ببێژە ئەم چ بکن؟
- کا تە کەس نەدیت...
- تو ب کەسێ قایل نابی.
جەلادەت بەگ بەرسڤ نادیێ، ب تەنێ دکەنە و کولیێن بەرفێ نیشانی وێ ددە.
- ل من ببۆرە، لێ ژینا مەرڤان نە مینا یا کولیانە. ژ مەرڤان رە مال، مولک، پێوەندی، زار و زێچ دڤێن، رۆشەن خانم دبێژە.
عەرەبە هێدی هێدی دکەڤە سەر ریا بێرووتێ و دەرە.
ئەم ل سەر ریا بێرووتێ بوون. من و هوسنێ بەگ ڕۆشەن دبر نەخوەشخانا ئامەریکایێ یا بێرووتێ. چاڤێن وێ نەخوەش بوون. دەمەکی کورت ئەو ل ور مابوو و نها ژی هەر چار مەهان جارەکێ دچوو کۆنترۆلێ. ئیجار ئەم ژی پێ رە چوون. (دیا وێ هنگێ نە ل شامێ بوو، ئەو چووبوو باخدایێ.) ژخوە ئەز مینا باڤێ وێ بووم! ژخوە گەلەک کەسێ وەلێ باوەر دکر کۆ ئەز باڤێ وێ بووم! ما ئەنی و بیڤلێن مە ژی نە وەکی هەڤ بوون؟..
من بریارا خوە دابوو؛ ئەز ئێ ل شامێ بماما و بزەوجیاما. لێ رۆشەنێ هێ نزانیبوو کا ب کێ رە.
تەڤی کۆ کنجێن گەرم ئێن زڤستانێ ل وانن، ئەو دهەژن. سارە، سەقەمە. دەنگێ با ژ دەر ڤە تێ. رێ ڤەکرییە، لێ ژ بلێ ریێ، هەر دەر ب پەردا سپی یا بەرفێ هاتیە ڤەگرتن. رۆشەن خانم، هنەکێ دن، مانتۆیێ خوە دگوڤشینە سەر هەڤ.
- رۆشەن، کزم... جەلادەت بەگ، ژ نشکا ڤە دبێ. من قەرارا خوە دا، ئەز ئێ بزەوجم...
- جەلادەت ئاب! رۆشەن ب کێف دبێژە، پر باش، پر باش...
- کزم، ما تو دێ نەپرسی کا ب کێ رە؟
- ب کێ رە؟
- گاڤا ئەم، ل ستەمبۆلێ، زارۆ بوون، تو دزانی، مە ئامۆژنەک هەبوو؛ ئامۆژنا ستی. ئامۆژنا ستی هەر وەها دگۆت؛ شوور شام، خەنجەر مام و ژن دۆتمام...
- جەلادەت ئابێ، پر باش، پر باش... ب کێ رە، تو دێ ب کێ رە بزەوجی؟
- ب تە رە!
- ب کێ...... ب من رە؟ ب من رە؟
- بەلێ ب تە رە... لێ ژ بۆ گەراندنا کارێن زەواجێ، من کاخزا تە یا هوویەتێ دڤێ.
- ب من رە؟ تە گۆتە، ب من رە؟..
- هەیە کۆ چەند فۆتۆگراف ژی پێوست بن. ژ کەرەما خوە، چەند فۆتۆگرافان ژی حازر بکە...
- ب من رە؟ ب جاریەت -ئول متباخ رە؟ ب من رە؟