le awêney dirizbirdûda

le awêney dirizbirdûy werzekanî em şareda
demuçawî hełewgeřaw
demuçawî jêr sêberî darî ziřî bêreng û aw
demuçawî – ser pê nemaw -
ziman le piřîşkî xwênî minî sûtaw
der’ekêşin
ziman, eken be kerete
ta pêławî berazekey ḧuzeyranî pê hełkêşin.
le awêney dirizbirdûy çawekanma
le ximxorkî janî mêjûy dêřekanma
gełay pîte werîwekan, exzêne:
naw kêlanî xencerî jengigirtûmewe
ew xencerey – nawkî ‌‌ - ledaykibûnî bo biřîm
ew xencerey xwênî kiřîm!
le awêney dirizbirdûy, řojekanî:
wiłatî keřewałema
le serdemî çaxî kwêrî
piřçizûy şare zerdewałema
le ferhengî řûtuqûtî ber diłopey em carema:
ebînim coge berewjûr geřayewe.
befir le çiley zistan û sermada bû ke twayewe
ebînim nan dway pêwedan
ebêtewe be hewîrî jêrpêy şêlan!
ebînim xwên dway hełgîrsan
ebêtewe be dûkełî jêr mencełî newsinekan!
em careyan le dirzekanî awêney bîrmanewe
şagirdekanî – xelîfey - xwalêxoşbû
be haywihû.
bedem wîrdî desniwêjewe, hatne derê
peřînewe
be simêłî badrawî hemûmana peřînewe
be camaney lar bestirawî hemûmana peřînewe.
le awêney dirizbirdûy em şareda
«yek demuçaw», ebê be duwan!
ebin be sê, ebin, ebin hetakû ser:
le awênekeş têk eçê.