لە ئاوێنەی درزبردوودا

لە ئاوێنەی درزبردووی وەرزەکانی ئەم شارەدا
دەموچاوی هەڵەوگەڕاو
دەموچاوی ژێر سێبەری داری زڕی بێرەنگ و ئاو
دەموچاوی – سەر پێ نەماو -
زمان لە پڕیشکی خوێنی منی سووتاو
دەرئەکێشن
زمان، ئەکەن بە کەرەتە
تا پێڵاوی بەرازەکەی حوزەیرانی پێ هەڵکێشن.
لە ئاوێنەی درزبردووی چاوەکانما
لە خمخۆرکی ژانی مێژووی دێڕەکانما
گەڵای پیتە وەریوەکان، ئەخزێنە:
ناو کێلانی خەنجەری ژەنگگرتوومەوە
ئەو خەنجەرەی – ناوکی ‌‌ - لەدایکبوونی بۆ بڕیم
ئەو خەنجەرەی خوێنی کڕیم!
لە ئاوێنەی درزبردووی، ڕۆژەکانی:
وڵاتی کەڕەواڵەما
لە سەردەمی چاخی کوێری
پڕچزووی شارە زەردەواڵەما
لە فەرهەنگی ڕووتوقووتی بەر دڵۆپەی ئەم جارەما:
ئەبینم جۆگە بەرەوژوور گەڕایەوە.
بەفر لە چلەی زستان و سەرمادا بوو کە توایەوە
ئەبینم نان دوای پێوەدان
ئەبێتەوە بە هەویری ژێرپێی شێلان!
ئەبینم خوێن دوای هەڵگیرسان
ئەبێتەوە بە دووکەڵی ژێر مەنجەڵی نەوسنەکان!
ئەم جارەیان لە درزەکانی ئاوێنەی بیرمانەوە
شاگردەکانی – خەلیفەی - خوالێخۆشبوو
بە هایوهوو.
بەدەم ویردی دەسنوێژەوە، هاتنە دەرێ
پەڕینەوە
بە سمێڵی بادراوی هەموومانا پەڕینەوە
بە جامانەی لار بەستراوی هەموومانا پەڕینەوە.
لە ئاوێنەی درزبردووی ئەم شارەدا
«یەک دەموچاو»، ئەبێ بە دووان!
ئەبن بە سێ، ئەبن، ئەبن هەتاکوو سەر:
لە ئاوێنەکەش تێک ئەچێ.