داستانی بەردەقارەمان

ئیستە شەوە لەسەر شانی لوتکەی «سێکەوان»
وەک شاژنێ ڕۆنیشتووە
«مانگ» ی حوزەیران.
سەر و قژی بە چارشێوی هەورێکی تەنگ،
داپۆشیوە و بریسکەی دێ،
ڕووی زیوینی وەک ئاونگ
شێوەی سوخمەی پوولەکەچن و ورشە و پرشەدار
بە هەیاسە و قوبەی ڕوونی ئاسمانەوە،
ئەستێران هەزار.
لە ئاوێنەی تریفەدا دەشتی بازیان
پێ ئەکەنێ و دەرئەکەوێ دانی سپی،
جۆگەکەی «کانی شەیتان»
پیرەمەگروون پیرەمێردی قژبەفرینی،
دەروون تەمگرتوو
چاوی لوتکەی بڕیوەتە پاشەڕۆژی،
هێشتانەهاتوو.
دارستانی سنەوبەری بەفیز و لووتبەرز،
لە ژوور شانی لاپاڵەوە،
ئەڕوانێتە ئەرز.
دارهەناری سوراوکردووی،
دەم پڕ لە شیلە
قۆڵ و باسکی سپی و سۆڵی،
هەرمێ کێویلە..
لەم شەوەدا بە دەم کزەی بای باشوور و،
بەفرەوەهاتوو،
دێن و ئەچن لە جۆلانەی،
شەماڵدا ئارامگرتوو.
بۆنی شەوی هاوینانی نزیکی باخچە
مۆردی پەرژین، گوڵەزەرد و ڕەشەڕێحانە
بۆ نووستنی درەنگانێ خەونی پڕ گوڵاو
ئەپرژێنن لە وەنەوزی،
کەروێشکەی ناوچاو.
ئاگری شوانی سەر دوورەشاخ،
سوورباو کە هەڵدێ
دەمی گەش گەش
دەمێکی تر
کزکز ئەسووتێ.
زیکەزیکی سیسرکی ناو،
کێڵگە و وەرد و شیو
باڕەباڕ و،
حیلەی ئەسپ و لوورەلووری
سەگی لمۆز بەرانبەر مانگ هەڵبڕیو
ئەو دەنگانەن لەگەڵ غەڵبە و
هۆبەهۆی ناو لەشکردا
لە دوورەوە ئەگەنە گوێ و،
وەک ژاوەژاو
تێکەڵ ئەبن لەناو یەکتردا
* * *
ڕواڵەتە ئەم جوانییە،
دوورکوژەی سرووشت.
دێوجامەیە..
بزەی مانگ و سەمای بەفر و
سیحری هەڵەمووت!
تا سەر نەکەیت بە ماڵانی،
بن میچ نەویی
گوندی برسیدا
تێکەڵ نەبی لەگەڵ ناڵەی ڕەز و باخ و
ژانی زەویدا.
تا گوێ نەگری لە دڵی شاخ
لە زامی داران
بە دەستی خۆت دەس نەخەیتە
سەر تەوێڵی «تا»لێ هاتووی
کەژ و کۆساران
قەت ناگەیتە قووڵاییی ناخ
نایخوێنیتەوە
لە تەنگاوا قەت مرواری دڵی مێژوو
نادۆزێتەوە.
* * *
شەو درەنگە وا خەریکە
ڕەشەبایەک هەڵبکا
«با» دەمتیژە و وژەی باڵی
لە شمشێری
وەشێنراوی ڕووت ئەکا.
شەو درەنگە لەبەردەم و
لە لاشانی ڕاست و چەپی
«دەربەندە وشکا»
پانزە ڕۆژە
هۆبەهۆبە، لەشکری شێخ
بنە و بارگەی خستووە.
پانزە ڕۆژە
لە تەختایی، بەردەڵانا
تا ژوور ئەژنۆ
سەنگەریان هەڵکەندووە.
ملەی شاخ و قوتکەی سەرە ڕێ
بە چوار دەورا گیراوە
هیچ دەرناچێ لە باڵندە بەولاوە!
* * *
پانزە ڕۆژە کوڕانی هۆز یەکەیەکەی،
بەخۆ و کەڵەگەت
چاپوک سوار و کەللەڕەق و سمێڵبابڕ
مووڕەش و مووزەرد
دەستیان لەسەر مشتووی خەنجەر
چاویش وەکوو چاوی بازی
نێچیرڕاوکردوو،
پانزە ڕۆژ کوڕانی هۆز ئێشک گری
دەربەندن و
سەر و ڕیش هاتوو.
وەک پڵنگی دڕک لە قاچ هەڵ چەقیوی
ناو بێشە و لانە
بێئارامن، دێن و دەچن، چیا ئەبڕن
ئەم دیو، ئەودیوی
بۆ دێ بە دێ بانگ ئەدەن و
هان ئەدەن و
وان لە پارێزدا.
هەر هەموویان
بەدوای شێخی،
سوارەی ماوزەڕ لە شانکردوودا
بەدوای شێخی شیرهەڵکێشاو
لە ڕووی ئینگلیزدا
هەر هەموویان سوێند خۆرن و
دائەنەون، لەم خاک و خۆڵە،
پڕ بە مشتێ هەڵ ئەگرن و ماچی ئەکەن
بۆ ڕۆژی تۆڵە.
ئەم دەربەندی بازیانە
کە بە وێنەی ژمارە «٧»
هەر دوو دەستی بەرەو ئاسمان،
هەڵبڕیوە
لە دنیای کۆن و تازەدا
چاوانی ئەو چی نەدیوە؟!
ئەم دەربەندی بازیانە
تەنها دەروازەی بەردینی
ئەم مەڵبەندەی کوردستانە
ئەوەی زووتر
چنگی گیر بوو لەم گەرووە
ئەوەی زووتر
ئەم دەروازەیەی پێوەدا
ئیتر شاخ و ئەم دیوی شاخ
بۆ خۆی بووە.
* * *
بۆ کڕوزی جەرگ و خاکی،
دوای سەر هێشتا،
بۆنی لە لووتا هەر مابوو،
ئەو وەختەی لاکی عوسمانی
لەنێوانی گورگەکاندا لەت‌لەت کرا
کوردستان و
ئەم مەڵبەندەی سلێمانیمکان
بە گورگە چاوشینی دوورگەی،
ئینگلیزمکان بڕا
گورگی چاوشین نەوت بۆنکەر
بە زەردەخەنەی ژەهراوی
جێی خۆخۆشکەر،
گورگی چاوشین نیوەی ڕێویی
ماندووی هەورازەکەی شەڕ بوو
تا هیلاکی لەش دەرئەچێ
با حوکمدار لە مەڵبەندا
کەڵەکێوی هەر کێو خۆی بێ!
* * *
گورگی دوورگەی لمۆزدرێژ،
تا هیندستانمکان
وای ئەگەیان:
ئیدی گوایا شوانی مەڕ و
شوانی ماف بوو
هەر کە تاریکیش دائەهات
ئیدی گورگی لمۆزدرێژ
تا هیندستان
کلکی خۆی ئەکرد بە گۆچان
بە گۆچانیش مەڕ و ماف و
کلوور و نەختینەی دنیای
بۆ خۆی ئەفڕان.
* * *
حوکمڕانی کەڵ بانگی دا:
گورگ هەر گورگە
شوانی هەقە و
حەقیش پارووی دوورگەی دوورە!
چاوشینە یاخود چاوزەرد
گورگ هەر گورگە
لەندەنییە و ئەستەمووڵی
گوێچکەی خوارە یاخود قوتە
گورگ هەر گورگە
ئەم مەڵبەندە
بۆ ڕاست، ڕاستە
بۆ مەند، مەندە
بۆ کێرد، کێردە
حوکمداری کەڵ بانگی دا:
- گوێزی پووچە،
بەڵێنی شای دوورگەی درۆ.
میوەجاتێکی گلارن
گفتەکانی مستەر «ویلسنشخص»
پێکەنینەکەی «مێجەرسۆن»،
شمشێرێکە و دەم بە خەندە،
ژەهرە و شیرین.
ئاگادار بن
ئەو وەختەی دەستتان ئەگوشن
هەر لە پەنجەکانتان پواز،
دائەتاشن.
هەتا ئێستە
ئارامی ئێمە گۆیژە بوو
گۆیژەش «ئەیووب»
ئەوا ئەیوب کراسەکەی،
خۆی دائەدڕێ.
هەتا ئێستە:
دڵمان جامێکی گەورە بوو
گەورە بە قەد
گوومەزەکەی سەر «کاک ئەحمەد»
ئەوا جامیش لێی ئەڕژێ.
قولاپ، قولاپ
ئەو ئەزانێ ماسی لە چ،
گۆمێکدایە
خەنجەر، خەنجەر
ئەو ئەزانێ حەقی خوراو
لە گیرفانی کام کەسدایە!
* * *
شەو درەنگە
ڕەشەبا نووست.
ئەم مەڵبەندە
لە ناوەڕاستی شاخاندا
ئاسکی دەشتێکە گیرخواردوو
هەر باڕەی دێ
بۆ بژوێنی هەژارانی
ئەم مەڵبەندە
چاو ئەگێڕێ.
هەژارانی ئەم مەڵبەندە
وەک زەعفەران
ڕەنگیان زەردە
قاچ و قۆڵیان باریک باریک
وەکوو قامیش
دەست و پلیان وەک زەوی دێم
قڵیش، قڵیش
لە سنگی داچەقاوەوە
مەمکی ژنان
وەکوو کۆترە شینەکەی مردوو
تەکەیان دێ
منداڵانی ئەم مەڵبەندە
زۆر کەمیان لێ گەورە ئەبێ.
ئەم مەڵبەندە
کە بارانی پەڵەی تێر ئاو ئەخواتەوە
کە دەغڵ و دان و مەرەزە باڵا ئەکەن
کەروێشکەی «با» لەناویاندا
قوونەقوون ئەکەن، ڕا نەکەن
دنیایەکی بەبڕشتە
بەڵام، بەرهەم
بۆ کەم، زۆرە
بۆ زۆر، کەمە
تەنها یەک ژەم
بۆ چەندان دەم
بۆ یەک دەمیش
دە دوانزە ژەم!.
شەو درەنگە
ڕەشەبا نووست.
وەک بترسێ هەور هەڵات.
ئیتر مانگیش
زێڕە تریفەی خاوی خۆی
لەسەر بەفری گەردنی شاخ
بە مشت هەڵڕشت.
شەو درەنگە
لە هۆبەیەکی لەشکرا
لەسەر پەڕا
لەژێر دەوارێکی سپی
کەنار گرا
وەک شێری تووڕە «شێخ مەحموودشخص»
دێت و ئەچێ
دەستی ڕاست لەبەر پشتێنا
پەنجەی نەسرەوتی دەستی چەپ،
دەنگی تەزبیحێکی ئەبڵەق،
دێنێ و دەبا.
ناو بەناویش
لەبەر ستوونی دەوارا ڕائەوەستێ
لە کڵاوی پیرەمەگروونمکان
تریفە چن
ڕائەمێنێ
لە دڵیا خۆی بە خۆی ئەڵێ:
«کە سەربەست و حوڕ نەژیام
جەننەتیش بێ وێرانەیە
سەروەت و ماڵ، دەشت و چیام
موڵکی سرفی بێگانەیە.»
وەک شێری تووڕە «شێخ مەحموودشخص»
بەسەر لبادێکی سپی و ڕەشدا
دێت و ئەچێ
باڵای وەک قەدی دارگوێزی،
تۆکمە و پتەو.
جۆشی پیاوەتی وەک جۆش و گوڕەی بەهار.
سەروپێچ، مشکی و جامانەی
تێکەڵکراو
قۆڵ و فەقیانەی،
تێوەپێچراو.
باڵە پەڕەسێلکەی سمێڵ
تۆزێ ئەستوور
ڕەش قەترانی.
دوو برۆی مانگرتوو لەسەر
جووتێ چاوی بریسکەدار
وەکوو پشکۆ.
بەرگی بەری مراخانی.
پشتێنیش هەر مشکییەکی
ڕەش، خەتسپی.
خەنجەری قەد دەبانێکی
مشتۆ مەیلەو زەردێکی کاڵ
لە شاخی بەران داتاشراو.
فیشەکدانی
ڕاست و چەپی
سەر سنگی پان
خانەی پڕ لە فیشەک کراو.
کڵاشی پێ هەورامانی
* * *
شەوە درەنگە بەڵام بازی ئەم مەڵبەندە
بە شەو چاوی ناچێتە خەو
ئەو دێ و ئەچێ
لەم لاشەوە
«تایەری فەرخەشخص» و «سەی حەسەنشخص»
ڕاوەستاون
دوو ستوونن جووڵە ناکەن.
دوو سەرسامن
هەر وەک لە «بەمۆ»ڕامابن.
سەی حەسەنی کورتە بنە
مامی شێخ خۆی.
ڕیش تۆپزی
دەم و چاوی شەڕەنگێزیی
ئازای کون لە جەرگا نەبوو
هەر دەڕوانێ و چاوەڕوانە.
تایەری فەرخەی مووزەردی
چەناگە چاڵ
لووتبەرانی و برۆئەستوور
کوڕی قۆشمەی سلێمانیمکان
هەر دەڕوانێ و چاوەڕوانە.
لەدوای ئیستێ
شێخ وەرچەرخا و
ڕووی تێ کردن:
- لەپاش هەڵمەتی «تاسڵووجەو»
شەڕەکانی بەسەر پێرێی
لای «شیوەسوور»
کە هەیبەتی «میجەرسۆن»مان
وەک جەڕەی کۆن
تێدا شکان
لووتی بەرزیمان دا لە عەرد
فیزی زلیمان دا لە بەرد
هەواڵ وایە لە موسڵمکانەوە
هێزی هەژدەمی «فرایزەر»
کەڵەشێری لە خۆبایی
«جەنەڕاڵ»ی
چقە دەرکردووی سەرسپی
بەرەو مەڵبەند کەوتۆتە ڕێ
دەربەند بگرێ
هەر بۆ ئەوە بانگم کردن
ئەم هەواڵە بە لەشکر و
دێهاتەکان ڕاگەیەنن.
سەی حەسەن وەک:
لەسەر ئاگر ڕاوەستابێ
بێئارام بوو
هەڵیدایە:
- قوربان! گەرووی ئەم دەربەندە
بە دیواری لەشی خۆمان هەڵ ئەچنین
قوربان! کوڕەی لەشکر
دەستەی شەستتیر تەقینەکان
سوارەی «دزڵی»
ئامادە بۆ:
شەڕی دەستەو یەخەی مەیدان!
تایەری فەرخەش لەسەرخۆ
بەدەنگێکی نزم وتی:
- قوربان! ئەگەرچی «فرایزەر»
سەری لەناو کەرکووکمکاندا بێ
کلکی لە پردێ تۆز ئەکا
پیادەی «سیک و گورگە»ی ڕەشمار
لە شارە مێروولە ئەچن
لە چاو لەشکری ئێمەدا
سەد بەهەزار.
بەڵام دەربەند گەروویەکی هێندە قووڵە
زۆر فرایزەری قووت داوە
گەلێ چقەی پیرەڵۆکەی وەکوو ئەوی
تیا خنکاوە!
بە قەڵای «چەمچەماڵ»ەوە
قشڵەی بەردینی
چوار قوللەی
ئێسک گران
وەک بەرازی لمۆزبۆری
شفرەسپی
ددانی جیڕ ئەکاتەوە و
ئەڕوانێتە ڕێی بازیان.
سەر قەڵا و دامێنی قەڵا
جمەیان دێ.
لەشکری هەژدەی فرایزەر وەک بارگیری،
لەناو خۆڵەمێشدا گەوزاو
لە موسڵەوە بەڕێ کەوتووی
لە تەپوتۆزدا نوقم بووی
چاو دیار نەماو
لەدوای چەند شەو و چەند ڕۆژێ
گەیشتە جێ.
* * *
لە قشڵەدا
لە هۆدەیەکی گەورەدا:
تەختی خشت ڕێژی مەیلەو سوور
کەوانی تاقی پەنجەرە
برۆپەیوەست
سەر یەکانگیر.
دیوار سپی وەک چوڕەی شیر
قەنەفەی قەبەی بەرگ قەیفەی
ئەمبەر و ئەوبەر ڕیزبەستوو:
مێزی لە دارگوێزکراوی،
سەروگرتوو.
شووشەی گرنج،
خانەخانەی مەرەکەبدان.
لەسەر ڕەفەش،
دوو سێ گوڵدان.
لەسەر کورسی ئەو دیوی مێز
«جەنەڕاڵ»ی سەر دانەوی و،
زۆر قووڵ، وردورد
ئەڕوانێتە نەخشەی مەڵبەند.
لەسەر کورسی ئەم دیوی مێز
«موشیری حەمەی سلێمانشخص»
بەگزادەیەکی هەمەوەند
چاوانی زیت
زۆر قنج و قیت
دانیشتووە و
بەپێشەوە
لە مابێندا
لیڤیەکی کورد، زمانزان
ڕاوەستاوە و
بووە بە پردی نێوانیان
* * *
فرایزەر پیاوێکە درێژ
ڕەقەڵەیە وەکوو تانجی.
قاچەکانی وەکوو قاچی
شینەشاهۆ.
قژی، خوری.
ڕەنگی پێستیش سوور و سپی
* * *
پێش مووسڵ
فرایزەر ڕمێکی باریکی
نووکتیژ بوو
لە مەمکی ڕەشتاڵەی بێشیری
هیندستانمکان چەقی بوو
پێش چەند ساڵ
فرایزەر لە بەنگاڵ
گورگێکی ڕەقەڵەی سوورفل بوو
ئەچووە سەر سەربانی
ماڵانی بێ دیوار ئەی لووران
ئەچووە سەر ڕێوبانی
ئاوایی و
منداڵی «دێ»ی ئەفڕان.
پێش چەند ساڵ فرایزەر
لاوێکی ئەفسەری بچووک بوو
ئەو وەختە گەورە بوو
ساڵ‌بەساڵ
کە بەسەر پلیکەی سەرانی
بڕڕاوی زنجیرا سەر ئەکەوت
تا بووە
«جەنەراڵ»
پێش ئێرە کوللە بوو
چاوانی گەنم و جۆی
زۆر خاکی دەرهێنا.
پێش ئێرە سیسارکە کەچەڵەی
ئاسمانی بێ هەور و باران بوو
باڵندەی سەربەستی
ڕاو ئەنا.
دوای ئەوەی تایەری لاواز و
حەسەنی گردەڵە
ئیزنیان خواست لە شێخ و لە دەوار هاتنە دەر.
ئەو حەلە
تازە خۆر
بەکاوخۆ بە شانی گۆیژەدا سەر ئەکەوت
تازە خۆر پەنجەرەی زێڕینی نێونیگای
هەڵ ئەبڕی.
تازە مەل لە ئاسۆی ڕۆژێکی تازەدا
هەڵ ئەفڕی
پێدەشتیش شۆخێ بوو
پێست زیوین ڕاکشاو
پاو پوزی خستبووە ناو جۆگەی بەر هەتاو.
ئیدی هەر بێوەستان بەپەلە
سوار بوون و هەر یەکەی بۆ قۆڵێ
ئاوزەنگی تێ تەقێن
ئەسپەکان باڵیان گرت
دوو کۆمەڵ..
تایەریان جڵەوی بەرەو ژوور وەرگێڕا
حەسەنیش بەرە و خوار وەرچەرخا
ئەڕۆن و بانگی شێخ
وەک تۆوی دەغڵودان
لە دڵی دێ بە دێی
مەڵبەندا ئەچێنن
ئەڕۆن و بانگی شێخ
وەک شەتڵی گوڵەباخ
لە سنگی شەقاری مەڵبەندا
ئەڕوێنن.
* * *
ئەو دەمە
وەک چاڵی خەڵووزان
وەک کووچە و ناو چوخمی شەوگاران.
تاریک و نووتەک بوو بیروهۆش
زۆر کەم بوون
چراوگی دەس وشەی
ڕێگەوبان.
بیری کۆن وەک قفڵی ژەنگگرتوو
لەسەر دڵ درابوو
خەیاڵی پڕوپووچ وەک ڕەشمار
بە قەف قەف
لە ملی کوردستان ئاڵا بوو.
هەژاران ڕیشۆڵەی بێ دان و
تەزیوی بەسەرما و
ناو داوی ڕاوکەر بوون
جوتیاران کەروێشکی ترساوی
ناو کێڵگەی
لە لانەبەدەر بوون
ئەو دەمە
لانەی شێخ
لای چەپی لای ڕاستی
چوار دەوری
بە ورچی دەفژەن و
مەیموونی سەماکەر گیرابوون.
هەرا بوو
ئیدی هەر ورچ بوو
ئەهات و فووی ئەکرد
لە مۆمی تاک تاکی مەڵبەندی داگیرساو
ئیدی هەر مەیموون بوو ئەهات و
مێزەری قازێتی ئەبەست و
ئەبوو بە:
سەر پشکی حەقخوراو!
* * *
باڵای شێخ لەو چوخمە
تاریک و نووتەکەی ئەوسادا
درەختی پەلوپۆگڕگرتووی
ڕێوبانی خاکی بوو
ئەڕۆیشت و ئەسووتا
دەنگی شێخ، چریکەی
لە مێژووی خامۆشی ئەوسادا
نزاری لە خەوی کەنار چەم، ڕاچڵەکان
دەستی برد کاکۆڵی چیای گرت، ڕایتەکان.
دەستی برد لاشانی هەردی گرت.، ڕایوەشان
دەنگی شێخ، چریکەی:
چووە بن پەناگوێی فورات و
ڕایپەڕان.
«موشیر» بەر لە یەک دوو ساڵێ
لە پاییزێکی درەنگدا بە سەردانێ
وەک چەقەڵێکی زراوچووی گوێچکە تەپیو
بۆ پاکانە چوو بۆ لای شێخ
دیوەخانی شێخ ئەو ساتە
پوورەهەنگ بوو، جمەی ئەهات
لەدوای ئەوەی چەقەڵ دەستی
شێخی ماچ کرد
شێخ ڕووی تێ کرد
- موشیر! من، تۆ و کوللە و زەروو
تۆ و گورگی بۆر، تۆ و داڵاش و کونەپەپوو
وەکوو یەک تەماشا ئەکەم!
بە دەست تۆوە نان و ئاوی برسی و تینووی
ئەو ناوچەیە هەمووی ئەگرین!
کاروانی ئەو ڕێگەوبانە
بە دەست تۆوە
وەکوو درەختی ڕنراویان
لێ هاتووە
بە دەست تۆوە هەر نامووسە و
ئەزریکێنێ و زەوتی ئەکەی
ئەی مڵەی پیس!
تۆ چی ناکەی؟!
* * *
ئیتر لەو ڕۆژەوە کە شێخ
لەبەر چاوی سەرەک هۆز و
سەر خێڵەکان
موشیر ئاغای ئاوا شکان
لەو ڕۆژەوە
ئەویش ڕقێکی لێ هەڵ گرت
گەورە بەقەد:
شاخی دەربەندی بازیان.
* * *
دەمەو عەسرە
هێشتا هەواڵی چەمچەماڵ
ئەڵێی هەناسەی ئاگرە.
ئاسمان ڕەنگی:
خۆڵەمێشییەکی تێرە.
تا چاو بڕکا گردۆڵکەی زۆر
ڕەنگسوور و بۆر
وەکوو قارچکی هەڵتۆقیو
نزیک نزیک، بڵاو بڵاو
لە پێدەشتا، دێنە بەرچاو.
لە قشڵەدا
لەژێر سێبەری دارمێو و
دارتووی هەڵچووی گوێ حەوزەکەی
ناو حەوشەدا
جەنەراڵ و چەند ئەفسەرێ
دەستیان خستۆتە پشت قنگیان
وەک کۆمەڵێ تاوسی گیڤ
تێل ڕەنگاوڕەنگ
پیاسە ئەکەن، دێن و ئەچن
ناوبەناو ئەیکەن بە غەڵبە و
ناوبەناویش کڕ و بێدەنگ
بە هەشت نۆ هەنگاو لەدواوە
کوڵە نانی
لەژێر کەوای قۆڵ فشۆڵدا
پشتێنی پانی بەستووە
موشیرە و دوایان کەوتووە
موشیر چاوی وەکوو ڕێویی
زەرد و زیتە.
کابرایەکە چەناگەی کوڵ
گوێچکەی ڕەپە، قنج و قیتە.
پەڕەی لووتی تۆزێ خوار و
تەوێڵ قۆقز
دەنگێکی گڕ تۆزێ نووساو.
جەنەڕاڵ دیارە خەیاڵی
بۆ ئەودیو دەربەند ڕۆیشتووە
نەخشەی ناوچەی
لوول لە دەستا هەڵگرتووە
لەناکاودا
گورگە چاوشین ئیستێک ئەکا
بە پەنجە بانگی موشیری
گوێ قوت ئەکا
بە تەکانێ ئەگاتە لای
فرایزەر هێواش لەسەرخۆ
هەر لەسەر لێواری سەکۆ
نەخشەی مەڵبەند ئەکاتەوە
موشیر خۆی دائەنەوێنێ
سەیرێ ئەکا
لێی تێ ئەگا و لێی تێ ناگا
فرایزەر پەنجە ئەخاتە
سەر ڕێی شوێنێ
ناوی بە گوێی سووکی مشکا
ئەچرپێنێ
موشیر سەری ئەلەقێنێ
جەنەڕاڵیش پێ ئەکەنێ.
ئاوڕێکی سەرکەوتوانە
لە ئەفسەری دەور و پشتی ئەداتەوە.
دوای چنینی تۆڕی تەگبیر
دەست ئەبات و
دەمانچە پەڕەبێلەکەی
لە قەدی خۆی ئەکاتەوە
پێشکەشی ئەکا بە موشیر
ئینجا ئەڵێ:
- هەتا ئێستەش
«شێخ مەحموود» وەکوو دڕندەی
کێوی وایە
توڕە و سرکە
ئەمانەوێ ماڵی بکەین ماڵیی نابێ
ئێمە تێ ناگەین چی ئەوێ؟!
بووین بە پرد و
لە زەریاوە شارستانیمان گەیاندە
دەیان وڵات
هەرگیز، هەرگیز ڕێگە نادەین
ئەو ئاژاوە بەرپا بکات!!
لەشکری هەژدەی فرایزەر
وەک مێروولەی ڕەش و سووری
دەشتی تینوو
بەدوای یەکدا ڕێچکەبەستوو.
تەقەتەقی
ئەسپی عەرەبانە کێشکەر،
پڕمەی وڵاخی بارەبەر،
ڤڕەڤڕی وەڕسکەری،
پاسی تەختەی
تۆپ لە دواوە پێوە بەستراو
شەستتیری لەسەر دامەزراو
تاک تاک هۆڕنی قەمەرە
سندووقی تەختەی فیشەکی
سەرمۆرکراو
زۆرهەڵچنراو
چەک و جبەخانەی فرە
پیادەی قڕە،
هەناسەسوار، بۆڵەبۆڵکەر
دووسێ فڕۆکەی باڵدرێژ
پەیتاپەیتا
بەسەر هێزدا هاتوچۆکەر.
هاواری ئەفسەری سوارەی
ئەمر دەرکەر.
گڕەی تەنووری حوزەیران
لەشسووتێنەر.
هەورازەڕێی پڕووکێنەر:
لەشکری هەژدەی فرایزەر
قۆناغ‌قۆناغ
ڕێگە ئەبڕێ و دێتە پێشێ.
ئەم نەهەنگە تۆزاوییە
کلکدرێژە
دەمی گەورەی داپچڕیوە
وا هاتووە
شاخ قووت بدا و
دەربەند بگرێ!
* * *
پێش گەردوگۆڵی بەیان بوو
پێش کازیوە
تاریکی زیاتر لە ڕوونی
ڕەش لە سپی.
لە ئەستێرەی
قوبەی چاو خەواڵوو زیاتر.
لەسەر زەوی
نەچاوی باڵندەی نامۆ
نە هی لووتکە
نە هی چرۆ
هێشتاکە هەڵنەهاتبوون
هێشتا بژوێن و دارستان
هەر لە خەوی سەوزیانا بوون
هەڵنەسابوون.
هێشتا زەوی
لێوقڵیشاو
خەوی بە ئاوەوە ئەدی
هەڵنەسابوو.
لەو کاتەدا
بە شاخی ئەودیو دەربەندا
بەسەر ملەی ڕەوەزێکدا
کە هەر بزنەکێوی و بەران
هەر باڵندە گۆشتخۆرەکان
پێی ئەزانن و نازانن.
ڕێیەک: کە چیای داک خۆی
لێی ون ئەبێ و
شەماڵ ناچێتەوە سەری
ڕێیەک: لووتکە سەرو و بنی
لە یەکتر جوێ ناکاتەوە
هەور نایەتەوە بیری.
ڕێیەک: چاوان بزر ئەکا.
وەک قومقومۆکە ڕەنگی خۆی
تێکەڵ بە ڕەنگی وەرز ئەکا
ڕێیەک: بەفر بە خەیاڵیا
نەهاتووە
هەتاو کەم ڕێی تێ کەوتووە
وا ئێستاکە بەو ڕێیەدا
موشیر وەک پشیلە کێوی
دانڕیچ
لەشجیڕ
چنگ گییر ئەکا و
هەڵ ئەگەڕێ و هەڵ ئەگەڕێ
لە دواشەوە
ڕێچکە کوللەی
«سیک و گورگە»
جێ پێی پشیلە هەڵ ئەگرن
وردەوردە سەر ئەکەون
وەختێ موشیر
گەیشتە سەر
دوند و قوتکە
ئەوسا وەکوو قەلەڕەشکە
باڵەکانی خۆی کردەوە
پڕ بە سنگی
هەوای ڕقێکی هەڵمژی.
کە داگەڕاو چووە خوارێ
تازە هەتاو
پەنجەی گزنگی خۆی ئەدا
لە قژی بەفری سپی و خاو
هۆ بە هۆیە، قرمەقرمە
گرمەگرمە، قریوەیە.
لەشکری شێخ
وا لەناو داوی ئاسنی فرایزەرا
لەشکری شێخ
وا لەنێوان دوو دارستانی ئاگرا
پیاوەکانی ئەم لەشکرە گیرخواردووە
ئەسپەکانی ئەم لەشکرە ڕام نەبووە
وەکوو دەیان ماسی گچکە و گەورەگەورە
کەوتوونە ناو تۆڕی فێڵی
ئاڵقە وردی موشیرەوە
تۆڕ بەسەر شاخدا کشاوە
تۆڕ بەزەویدا خشاوە
پان و پۆڕ مل درێژە
تۆڕ سەرێکی لەو دیو دەربەند
ئەوی تری لە تاسڵووجە
تەپە تەپە، ناڵە ناڵە
پڕمە پڕمە، شریخەیە.
ئەم لەشکرە پڵنگێکە و لەتاوانا
چۆتە سەر کلک
بە دەوری خۆیدا خول ئەخوا
ئەزریکێنێ و زریکەکەی
دار و بەردی ئەم دەربەندە ئەلەرزێنێ
ئەزریکێنێ و شاڵاو ئەباو هەر دوو چاوی
گڕپرژێنی
ڕقی سوور دائەگیرسێنێ.
لەتۆڕایە و ئەودیوی تۆڕ ئەتۆقێنێ!
* * *
وەکوو نیوەڕۆی حوزەیران
شەڕیش گەرمە.
مەتەرێزی ئەملاوئەولای
شانی چیا
قرمەژنیان گوێی دەربەندی
کەڕ کردووە.
شەستتیرەکان لە بێژنگی
دەشت و دەرا
کوژراوەکان ئەبێژنەوە.
جانبێزار و پێنجتیرەکان
بە گوللەی تاک
هەر کە دەرکەوت
کاسەی سەریان هەڵگرتووە.
یەک لەسەر یەک
گوللەتۆپی لەو دیو دەربەندەوە هاتووی
لەناکاو گرمەکردوودا
گێژەڵووکەی دووکەڵ و گڕ
بە چوار دەورا دروست ئەکا:
دەستی ئەسپێ
قاچی ناو دەمەر قۆپانێ
ملێ، سەری
وەک خڕکەبەرد، یان بنچکێ
پەیتاپەیتا
لەگەڵ خۆیدا
ئەبا و ئەبا.
* * *
تاوی غارە. تەپوتۆزە
حیلەی ئەسپ سوارگلانە.
تەپڵی بازە و لێدراوە
شێخ هەستاوە
ئەوەتا لەسەر خوانی زین
چرایەکی بەر ڕەشەبای داگیرساوە.
چەپۆکانی ئەسپەڕەشی
تەوێڵ مارۆی کەفەڵ پانی
لەسەر کلکە و
سنگی بە کڵپەوە ناوە.
ئەوەتا لەسەر خوانی زین
هۆرەیەتی
هۆرە ئەبێ بە سۆزی خاک
بەکڕووزەی سلەیمانی
بە هەناسەی شیعری «ناریناری شاعیر»
هۆرە ئەبێ بە زامەکانی «شێخ سەعی» و
ئەسپەڕەشەیش هەر تاو ئەدا.
یاڵی درێژ و خاو ئەفڕێ
کە دێتەوە ئەم جارەیان شەپۆل ئەدا
ئەفڕێتەوە و ئەم جارەیان
لکی فەقیانە ماچ ئەکا
تەپڵی بازە و لێدراوە
شێر کەوتۆتە ناو تۆڕەوە و حەپەساوە
بەڵام هێشتا ئەنەڕێنێ
بەڵام هێشتا
گورگی چاوشینی ئەودیو تۆڕ
ئەتۆقێنێ!.
* * *
«سیک و گورگە»ی باریک‌باریک
ڕەنگە تیژ وەکوو دەلووبیبەر
دەموچاویان تاریک‌تاریک
وەک شەوەزەنگ
وەکوو لەقلەق
قاچ ڕووت، قاچ ڕووت.
بەرپشتێنیان پڕ لە قەمە
پڕ قەدارە
وەکوو ژیژک.
بەڕیز هەر دێن، بەڕیز هەر دێن
ئەکەون و بەلادا دێن
ڕیز چۆڵ ئەبێ
دیسانەوە ڕیزێکی تر
وەکوو ڕمی ڕەش و درێژ
ئەیکەنەوە:
بە هەڵبەزین و دابەزین،
بە لوورەلورێ وەک وەڕین
شمشێری تیژ یەک قولانج پان
بەدەستەوە قورس و گران
هەڵکێشراوە
لەبەر هەتاوا بریسکەی وشککەری ئاوی چاوە.
* * *
نیوەڕۆیەکی درەنگی حوزەیرانە
وەک کزەبا
تەقە کزە.
ناو بەناوە
یانزە تیر و حسکە و ماوزەڕ
لە سەنگەرا
توێشووی گڕیان پێ نەماوە.
ئەوا ئیتر:
تێک ڕژانە، هەڵپژانە، هەڵدێرانە
سوار ئەگلێ، سوار، ئەپەڕێ
تەپوتۆزی خاکی تووڕە
ئاسمانی بێڕەنگ دائەگرێ
حیلەحیل و ناڵەناڵ و گرمەگرم و
وشەی کوردی و وشەی هیندی
تێکەڵ بەژاوەژاوێکی.
گەورە ئەبێ
نێزە سەر ئەکا بەسکا
خەنجەر بۆ ناو دڵ ڕائەکا
فیچقەی خوێنی فوارە بەستوو
لە دەموچاو، لەقەدارە
لە زین و یاڵ
لە ئاوزینگی لە مەتارە
هەڵ ئەپڕژێ
دار سوور بووە
بەرد سوور بووە
لاڵ و پاڵە
ئەو لەسەر پشت
ئەم لەسەر دەم
قاچی بێ سەر
سەری بێ قاچە و کەوتووە.
* * *
هەر لەلاشانی دەربەندا
سوارەی ئەسپی ڕەش تاو ئەدا
هەڵمەتە یان ڕەشەبایە؟
یاخود شێرێکی باڵدارە؟
بروسکەیە یاخود غارە؟
ئەوە لکی فەقیانەیە
یاخود بەفری هەڵفڕیوی
سەر چیایە؟!
ئەوە پڕمەی ئەسپەڕەشە
یا هەناسەی گەرمی سینەی
گردەکانی سەر ڕێگایە؟
ئەوە هۆرەیە و قەتارە؟
یاخود چریکەی هۆمایە؟
هەر لەلاشانی دەربەندا
لە هەڵمەتا
«کاجنیس»ێکی نەوەی مەغۆل
خۆ مت کردوو
لەپاڵ قەدی دارتوویەکدا
ئەسپەڕەشی
لەگەڵ جاسوسی تفەنگدا
تەواو جووت کرد
کە پەنجەی نا
بەپەلە پیتەدا ئیتر
ئەسپ گلا!
گلا!
گلا!
گلا!
* * *
ئەسپەڕەش لەدوای حیلەیە
یاڵ بژو کەفەڵ خۆڵاوی
هەڵسایەوە
وەک بزانێ
ئاوڕێکی
لە سواری گلاو دایەوە
نزیک گابەردێکی بن بۆش
شێر لەسەر تەنیشت کەوتبوو.
لە دوو لاوە باز زامدارە
لە دوو لاوە دوو کانیی خوێن
هەڵ ئەقوڵێن.
لە دوو لاوە دوو خونچەی سوور
وا ئەپشکوێن
لە دوو لاوە دوو زاری سوور
لەگەڵ ئەسپەڕەشدا ئەدوێن
نزیک گابەردێکی بن بۆش
سوارێک و ئەسپەکەی تەنیا
سوار زامدارە و
جڵەوی ئەسپیش بەرەڵڵا
نزیک گابەردێکی بن بۆش
بە جڵەوی شۆڕی ئەسپا
سوارەی زامدار خۆی هەڵواسی
لەسەر سک و بەخشەخش
ئەسپ ئەیبا.
تا بەردەمی گابەرد ئەیبا
* * *
ئێستە ئەسپەڕەش بەتەنیا،
هەر خۆیەتی
کوڕژن ئەکا و سوار دیار نییە.
چاوانی وەکوو دوو گوڵە
ژاڵەی تەڕی بەر بارانە
کوڕژن ئەکا و شێخ دیار نییە
گوێچکەکانی
ئێستە وەکوو
دووگەڵا چناری سیسی،
هەڵوەریوی پایزانە.
ئێستە یاڵ و ئێستە کلکی
بوونە توتڕک و دڕکەزی
حوزەیرانی ئەم دەشتانە.
کوڕژن ئەکا و شێخ دیار نییە.
ئێستە ئەسپەڕەش بەتەنیا،
هەر خۆیەتی
نامۆی لەوەڕگەی خۆیەتی
وێڵی وڵاتی خۆیەتی
کوڕژن ئەکا و شێخ دیار نییە.
* * *
ئەوا حەمەی یاوەری شێخ
شان خوێناوی
وەکوو بەرانێکی پێکراو
هەناسە سوار
وەک هەناسەی
سنگی پۆڕێکی بریندار.
چاوی ترساو
وەک دوو هەڵماتی قاوەیی
شەوق پێنەماو
بەهەر چوار لادا ئەگێڕێ.
بن بەرد بن بەرد بەپێ دزکێ
لە ئەسپەڕەش دێتە پێشێ
وا ئەزانێ شێخ نەماوە
ئاخێکی قوڵ پڕ بە سینەی،
خۆی و سینەی
ئەسپی بێ سوار هەڵ ئەکێشێ.
لە ئەسپەڕەش دێتە پێشێ.
جڵەوەکەی ڕائەکێشێ.
تا ئەیباتە پەنا بەردێ
هەر چۆنێک بێ
سواری ئەبێ و
بۆی دەرئەچێ!
ئێستە دەربەند، دەشتی دەربەند
ژنێکی قژدووکەڵاوی
سکسووتاوی ڕاکشاوە
چەتری ڕەشی گەواڵەهەوری نەباری
لەسەر سەری خۆی هەڵداوە
ئێستە مەیدان، مەیدانی شەڕ
بۆکڕووزی جەرگی کوردستانی لێ دێ
ئێستە ئاسمانەکەی مەڵبەند،
هەر مانگی خوێنی تیا هەڵدێ
تەماشا کە:
کوڕی جوانەمەرگی شاخ و
ئەم پێدەشتانە ببینە.
لەم عەردەدا پەنجا دار سنەوبەر نووستوون
لەم دەشتەدا پەنجا ئەستێرە پاڵ کەوتوون.
پەنجا گۆرانی وەریون
پەنجا گوڵەگەنم مردوون
پەنجا جۆگەی سوور مەییون
لەناویاندا
تایەری فەرخە و سەی حەسەن
بەرانبەر یەک
وەک ڕەزی سووتاوی دووشاخ
درێژ بوون و
هەر تەماشای یەکتر ئەکەن.
لە تانکێکدا
فرایزەری چاو بەدووربین پێ ئەکەنێ و
دەستی ڕاست ئەدا بە پشتی
موشیرئاغای هەمەوەندا.
تانک هات و هات
کە گەیشتە گەرووی دەربەند
دووربینی لە چاو کردەوە
بە سنگیا شۆڕی کردەوە لە تانکەوە
سەرێکی کێشایە دەرێ
وا ئێستاکە گورگی چاوشین
چاوبەشاخی
دەست هەڵبڕیوی یەخسیر و
تەختی تەوێڵی شکاوی،
پێدەشتەکاندا ئەگێڕێ.
ئینجا ڕووی کردە موشیر و
وتی:
- شێخم ئەوێ!
تانک هات و هات
وەختێ لە دەربەند ئاوا بوو
بەم دیودا هات
جەنەڕاڵی پیرەداڵاش
بەسەرهاتێکی دێرینەی
لەناو هەوری خەیاڵەوە،
بەبیردا هات:
«هێشتا مەسیح
وەک گوڵی سپیدار هەرمێ
نەپشکووتوو بوو، چاوانی.
لەو دەمەدا خاکی یۆنان
دایکێ بوو سەری لە هەوراو
چرای دەستی
هۆش هەڵکردووی
بەسەر دنیادا ئەیڕوانی
کوڕی وەکوو «لەئونیداس»ی بە شیری
مەمکی پڕی گۆش کردبوو.
کوڕەکانی تەڕلانی دەوری سەری بوون
ئەویش هێلانەی ناو دڵان
کوڕەکانی دیوارەشاخی دەوری بوون
ئەویش خەرمان
ئەو ڕۆژانە
خونکار نەبوو دەستی بگاتە دامێنی
کراسە سەوزەکەی یۆنان
یان کێ هەبوو کە بوێرێ
تەنها گوڵێ بکاتەوە
لە قژی خاوی ناو باخان.
هێشتا مەسیح
وەک گەواڵەهەوری سپی
نەچوو بووە ناو ئاسمانەوە
ئەو بەفرێکی نەباریو بوو.
کە لەشکری
لمۆز ڕەشی پارسی ئێران
وەک بەرازێکی یەکانە
بە ئاراراتا وەرچەرخاوە
ڕووی شفرەی خۆی،
کردە یۆنان
لە مەڵبەندی «تەسالیا» ی،
کاکۆڵ سپی گۆنائاڵدا
بەراز گەیشتە بەر دەرگای
داخراوی دەربەندەکەی «تەرمۆپیل»
«لەئونیداس» پشتی پانی
نا بەدەرگای دەربەندەوە
«لەئونیاس» ئەچووە چاوی بەرازەوە
هەڕەشەی مەرگی لێ ئەکرد
شاخی بەسەردا ئەڕووخان.
هەر ئەوەندە و ئیتر بەراز
وەک کەوتبێتە زەلکاوی
خەمخۆرکێکی قوتدەرەوە
چەقی و هەر سەری با ئەدا
بەڵام «ئەفیاڵت»
بەڵام «ئەفیاڵت»ی سپارتی
کوڕی ڕەشی «تەسالیا»ی
چیافرۆش
بارانفرۆش
هەتاوفرۆش
ڕێوی مەڵبەند بەڵەدی ڕێ
نەویی لە گوێچکەی بەراز و
دەری هێنا
کەوتە پێش و بە ڕێیەکدا
کە خوای «ئۆڵمپ»یش نەیزانێ
کردنی بەودیو دەربەندا.
جەنەڕاڵی پیرە قاژوو
لەو بیری خەیاڵە قووڵەی تێی کەوتبوو
کە هاتە دەر
یەکسەر سەیرێکی «فیاڵت»ی
کوڕی ڕەشی کوردانی کرد
ئەوسا ئیتر
بزەیەکی زەرد وەک چزووی
زەردەزیڕە
بزەیەکی ناخ هەڵکەنە،
ڕەش وەکوو مێش
وەکوو گەنە
لە لێوی نیشت.
ئینجا دووربینی سەرسنگی هەڵگرتەوە
نای بە چاویەوە و وتیەوە:
- شێخم ئەوێ.
* * *
ئەوا ئێستە
سەرقاپی تانک هەڵبڕاوە
دەمی تەندووری ئاسنین بەرەڵڵایە
سووک‌سووک ئەڕوا
لەم ساتەدا
چەند باڵایەکی کەم نەبێ
هەموو شتێ بۆ فرایزەر لەسەر چۆکە
لەم ساتەدا
چەند لاقێکی زۆر کەم نەبێ
هەموو شتێ لەبەر دەمی فرایزەردا
قاچ لەرزۆکە!
تانک هەر ئەڕوا
سووک سووک ئەڕوا
ئەوا ئێستا
تانک ڕاوەستا
سەریان لە تەندوور دەرهێنا
هاتنە خوارێ
لەبەر دەستە ڕاستەوە
بۆ چڕووکی دەشت و لەش و
قژ و یاڵ و خوێن تێکەڵە.
لەپێشەوە
موشیر ئەڕوات و بۆن ئەکا
خاوەن تەڵە
کوڕی ڕەشی ئەم دەربەندە
بەبۆن جێ پێی شێخ هەڵ ئەگرێ
لووت لەسەر زەوی هەڵنابڕێ
هەتا ئەگاتە بن گابەرد
لەپڕێکدا دا ئەچڵەکێ
چەند هەنگاوێ
دێتە دواوە و ئەقیژێنێ و
دەست بۆ فرایزەر هەڵ ئەبڕێ
ئینجا ئەڵێ
- شێخت ئەوێ؟!!
- ١١ -
بۆ سبەینێ، بۆ بەیانی
هەر کە یەکەم چەپکە گزنگ
لەکەلەوە
هەڵفڕی و خۆی هەڵدایە ناو،
سیروانەوە.
«بەمۆ» خۆی بینی لە ئاوا.
لەو کاتەدا
بە کەناری داوێن تەڕا
وەک پەڵەهەورێکی سپی
شوانێک و ڕانە مەڕەکەی
بەرەو بژوێن دائەگەڕێن
لە دوو ئاوان
شوانەی عاشق لەسەر بەردێ
ڕوو لەهەتاو
تێی چریکان
لە بەیتێکی تێچریکاو
تا ئەوساتە
بەرگوێی سیروان
بەرگوێی بەمۆ نەکەوتبوو
هەر کە بیستیان
ڕەوەز شێت بوو
کەژان خۆیان ڕائەوەشان
بەیت بوو.. بەیتی بازیان
بۆ شێخی بەردەقارەمان
* * *
بۆ سبەینێ، بۆ بەیانی
هەر کە یەکەم شەقژنی مەل
گەڵایان خەبەر کردەوە
نزم.. نزم هەڵفڕین و
باڵیان وەردا «زرێبارمکان»
لە کێڵگەکەی ئەو بەرەوە
خاڵەی جووتیار
خۆ هەڵکردووی دەسقوڕاوی
سەری بۆ «شاهۆ» هەڵبڕی
لە هۆرەیەک تێی چریکان
تا ئەو ساتە
نە زرێبار و نە شاهۆ
بەر گوێی سووکیان نەکەوتبوو
هەر کە بیستیان
شەپۆل لای دایە بەستێن و
دەمی خوڕەی خۆی توند گرت و
هاژەی بڕی
شاهۆش درەختی باوەشی،
ڕائەژەنی
هۆرە بوو هۆرەی سۆزتکێن
بۆ بازیان
بۆ شێخی بەردەقارەمان
* * *
بۆ سبەینێ، بۆ بەیانی
هەر کە یەکەم پەڵەهەوری
وێڵ و نامۆ
گۆزەی خاڵی خستە سەر شان
چوو بۆ باران
وەختێ گەیشتە سەر سەری
گۆمەکەی «وان».
بۆ بەلەمێک تاق و تەنیا
چەتری سێبەری خۆی هەڵدا.
ماسیگری گوپقووپاوی
شەڕواڵدڕاو
وەختێ تۆڕەکەی کردەوە و
بە هەردوو دەست
توند حەوای دا
بۆ ناو ئاو و
بۆ ئەو بەختەی کە ئەو ئەیویست
ئیدی لەپڕ
لە لاوکێ تێی چریکان
تا ئەو ساتە
نەهەوری سەر،
نەماسی بن،
بەر گوێی هیچیان نەکەوتبوو
هەر کەبیستیان
لەتاوانا هەوری نامۆ
گۆزەی پڕی لەدەست بەربوو
فرمێسکی هاوینەی داڕشت
پۆلە ماسی جووت‌جووت هاتن
ناو تۆڕی لەدەنگ نزیکیان،
کرد بە مۆڵگە بۆ گوێگرتن
لاوک بۆ لاوکی جۆشدان
بۆ بازیان
بۆ شێخی بەردەقارەمان.
لە دوای پتریش لە شەست ساڵ
لە شارێکی باڵاسووری
بەفر لە تەوێڵ نیشتووا
لە شارێکی دووسەد ساڵەی نەنووستووا
لە گەڕەکێکی دەست و قاچ قڵیشاوا
لە خانوویەکی سەرپەڕی کورتەباڵای
بێ هەناوا
لەناو ژوورێکی یەک چاوا
لە شەوێکی قژسپیدا
شاعیرێکی ئەم سەردەمە
بە چوار مشقی دانیشتووە و بالیفەکەی
لەسەر ڕانی خۆی داناوە
لەگەڵ وشەدا ڕێ ئەگرێ
لەگەڵ وشەدا ڕێ ئەبڕێ
بۆ بازیان
بۆ شێخی بەردەقارەمان
داستانێکی نوێ ئەنووسێ