شار

ئەمڕۆ تەنها هەر لەنێوان دوو سەعاتا
لەناو سنگی شارەکەمدا
پەنجا ڕووباریان خنکاندم
قودس وای وت!
ئەمڕۆ تەنها هەر لە ماوەی یەک سەعاتدا
لەناو سەری شارەکەمدا
سەد ئەستێرەیان سەربڕیم
مانگی شیعرێکی ئاسمانی سانتیاگۆیش وای پێ وتم!
ئەمڕۆ تەنها هەر لە ماوەی نیو سەعاتا
لەسەر بەردی ڕەشی پشتم
مێشکی زۆر گوڵیان پژاندم
ئەسپێکی ڕەشی باشووری ئەفریقایش وای پێ وتم!
براینە!
تەنها جیاوازیی نێوانمان
ئەوەیە، من
شارەکەیان وەها کوشتم،
دەقیقەیش هەستی پێ نەکرد!