هەور نەدۆ خەمین
از کتاب:
دیوانی وەلی دێوانە
اثر:
ولی دیوانه (1826-1881)
2 دقیقه
502 مشاهده
هەور نەدۆ خەمین، هەور نەدۆ خەمین
تۆ خەم پۆشەنی من خاتر خەمین
بۆ تا هەردوومان دەردین ماتەمین
وێڵ وێڵ بگێڵین سەراسەر زەمین
تۆ جە «سەما» سەیل، من جە «زەمین» ئاهـ
هەر دوو بکەریم ڕووی گەردوون سیاهـ
تۆ سەیل سرشک دیدەت وە زاری
ڕێژان کەر چون تاو سەیل وەهاری
من جە زەمین ئاهـ ناڵەی نەبەردم
بخێزۆ جە دڵ هەناسەی سەردم
تا بۆ وە تۆفان تۆف ڕەستاخێز
سیاماڵ نە برج لێڵاخ بۆ گورێز
خێڵخانان جە دوود ئاهـ ئیە و تۆ
بیان وە دامەن گەرمەسێر جە نۆ
تا کە کۆچ خێڵ جاف مورادی
پەیدا بان چەنی قبلەم وە شادی
ئەو دەی گەرمەسێر هەم بەیۆ وە فەڕ
فەڕ گێرۆ جە زەوق تەتاران «بەڕ»
هەور نۆ بەی تەور بسازیم وە یەک
من جە ڕووی زەمین، تو نە ڕووی فەڵەک
هەر دوومان وە جەخت بگەڕێیم وە تاو
تۆف «زەمهەریر» پەیدا کەیم جە ناو
بەی تەور تۆفانی باوەریم وە هەم
تا خێڵان نە برج لێڵاخ کەران ڕەم
کۆچ کەردە ماڵان بیان وە لامان
دامان بۆ وە زەوق نەوتووڵ نەمامان
شاد بۆ وەی زامن شای شەم جەمینم
گوشادی خاتر خار خەمینم
تا منیش وە دین دیدەی ئەو شادبام
نە جەور گەردوون خاتر ئازاد بام