hewr nedo xemîn
From the Book:
Dîwanî Welî Dêwane
By:
Wali Dewane (1826-1881)
2 minutes
529 views
hewr nedo xemîn, hewr nedo xemîn
to xem poşenî min xatir xemîn
bo ta herdûman derdîn matemîn
wêł wêł bigêłîn seraser zemîn
to ce «sema» seyl, min ce «zemîn» ah
her dû bikerîm řûy gerdûn syah
to seyl sirişk dîdet we zarî
řêjan ker çun taw seyl weharî
min ce zemîn ah nałey neberdim
bixêzo ce dił henasey serdim
ta bo we tofan tof řestaxêz
syamał ne birc lêłax bo gurêz
xêłxanan ce dûd ah ye û to
byan we damen germesêr ce no
ta ke koç xêł caf muradî
peyda ban çenî qiblem we şadî
ew dey germesêr hem beyo we feř
feř gêro ce zewq tetaran «beř»
hewr no bey tewr bisazîm we yek
min ce řûy zemîn, tu ne řûy fełek
her dûman we cext bigeřêym we taw
tof «zemherîr» peyda keym ce naw
bey tewr tofanî bawerîm we hem
ta xêłan ne birc lêłax keran řem
koç kerde małan byan we laman
daman bo we zewq newtûł nemaman
şad bo wey zamin şay şem cemînim
guşadî xatir xar xemînim
ta minîş we dîn dîdey ew şadbam
ne cewr gerdûn xatir azad bam