هەر من ناشادم
از کتاب:
دیوانی وەلی دێوانە
اثر:
ولی دیوانه (1826-1881)
2 دقیقه
925 مشاهده
هەر من ناشادم، هەر من ناشادم
گشت عاڵەم شادەن، هەر من ناشادم
هەر من نەیاوان وە لای حەق دادم
هەر من نائومید قاپی مرادم
هەر من بازی باز نەردەن نە بارم
هەر من ڕای شەشدەر بەندەن نەچارم
هەر من ناسزان فەڵەک وە بەختم
هەر من گێرودەی ئازار سەختم
هەر من چەرخ چەپ وەنەم نە قینەن
هەر من تاڵەم پەست خاک زەمینەن
هەر من ستارەم سیا بێ نە سەر
هەر من فریشتەم کەفتەن دەر بە دەر
هەر من ئیقباڵم خاوێر خەفتەن
هەر من نە ڕووی «ئەرز» ڕای ڕاسم چەفتەن
هەر من خەمیدەی دەور گەردوونم
هەر من جورعەنۆش جام مەجنوونم
هەر من پەروانەی پەشێوحاڵ جەستەم
هەر من پەڕ سفتەی خەمناک خەستەم
هەر من چون بوڵبوڵ یەک فەسڵم وەسڵەن
هەر من سێ فەسڵ عومرم بێ ئەسڵەن
هەر من ڕۆی ڕۆشن وە دیدەم تارەن
هەر من زیندەگیم چون ژار مارەن
هەر من گرفتار جەور و عازاوم
هەر من پەرێ دۆس دیدە لێڵاوم
هەر من سزاکێش دەرد و داخانم
هەر من چەمەڕای ڕای لێڵاخانم
هەر من جە پەی دۆس لێڵاخ نشینم
ها وەختەن بەرشۆ گیان شیرینم
تا ئەو ڕۆ کە خێڵ شیان وە دامان
من هام نە سزای جەور بێ سامان
مەر موشکڵ گوشا بدۆ مرادم
وەرنە تا مەردەن خاتر ناشادم