ڕۆژی ئازادی

از کتاب:
بەرهەمی خاوێن
اثر:
علی عارف آقا (1910-1996)
 1 دقیقه  585 مشاهده
ڕۆژی ئازادی لە کەل وا هاتە دەر
شەو نەما تاریکی وا بوو ژێرە و زەبەر
هێزی شێرانە لەگەڵ هەوڵ و خەبات
ئاخری ئامانجی کوردی خستە سەر
هیممەتی مەردانە کردەی بێوچان
باخی ئومێدی گەل هێنایە بەر
ڕێی فیداکاری گەلێ کۆسپی هەبوو
هەم گەلێ دڕک و دڕندەی هاتە بەر
گەرچی قوربانی درا یا خوێن ڕژا
چەن هەزاران بوونە وێڵ و دەربەدەر
عەزمی پۆڵایینی گەل نەشکا ئەبەد
تێک نەچوو ڕۆی لەسەر ڕێگەی هونەر
«دەستی خوێناوی ئەبێ بیکاتەوە
قاپی ئازادی نەوەک بازووی قەدەر»
‏نایبەزێنێ هێزی عالەم بێگومان
هەرچی بۆ سەربەستیی گەل بەستی کەمەر
تێشکان و پێشکان و سەرشکان
خۆ ئەبێ لێی بکرێ هەر سەرفی نەزەر
ئەو گەلەی بۆ حەقی خۆی گیانی بەخت ئەکا
دیارە ناترسێ لە ئافات و خەتەر
هیچ پڕوپاگەندە کاریگەر نییە
بەندە و باوی ناحەزیش ناچێتە سەر
لاپەڕەی مێژوو موحەقەق باس ئەکا
ئەم خەباتی کوردە تا بکرێتە بەر