جزاك الله کە تۆ هاتی بکەی سەردانی بیمارت
از کتاب:
دیوانی سابیری
اثر:
صابری (1881-1944)
2 دقیقه
1083 مشاهده
جزاك اللهعربی کە تۆ هاتی بکەی سەردانی بیمارت
شیفات هێناوە یەعنی میوەهاتی ڕووی گوڵزارت
بە نووری حوسنی تۆ شەمس و قەمەر بێ نوور و حەیرانن
غەزال و لەعل و گەوهەر، سێ لە چاو و لێو و ڕەفتارت
لە ترسی بازی چاوت پووری دڵ چاری نەما جانا
ئەمێستاکە پەناهی داوەتە جەنناتی ڕوخسارت
ئەتیببا دەردی دڵ موشکیل ئەزانن، سەهل و ئاسانە
بە ئەوراقی گوڵی حوسنت، بە لێوانی شەکەربارت
سەڵا لەو ڕۆژە تەشریفت بچێتە سەر نەخۆشانت
وەکوو زەڕڕە لە دەورت ڕەقس ئەکەن سووتاوی دیدارت
تەماشا کە لە ئاوێنە دیارە چارەیی دەردم....
ئەگەرچی پێم ئەڵێن خەڵکی بە لوقمان ناکرێ چارت
بفەرموو با نەچم بێ تووشە بۆ سەحرایی بێ پایان
وە ئیللا خۆت ئەزاتی ئەبمە مایەی ڕەنج و ئازارت
بە قوربان نەوبەتی ئینسافە عومرێکە تەمەننامە
ئیتر وەعدە وەفا کە با نەبم مەحروومی دیدارت
عیلاجی زوعفی قەلبم مەیل ئەفەرمووی سەهل و ئاسانە
بە ئەوڕاقی گوڵی حوسنت بە لێوانی شەکەربارت
دوعا ناگاتە گوێ و دەستی کەس، ناگاتە دامانی
چ عالی قەدرە یا ڕەب بێ بەڵا بێ سابیریتخلص یارت