٣١
بولبولیا زینێیە دگەل پەروانەئێ پەروانیا وێیە دگەل دیوانەئێ
از کتاب:
مەم و زین
اثر:
احمد خانی (1650-1707)
1 دقیقه
1169 مشاهده
پەروا نەدکر ب ئاتەشێ غەم
پەروانە دکر ژ بۆ خوە هەمدەم
کەی تائرێ ئاشیانێ فرقەت
وەی بولبولێ بۆستانێ حرقەت
ئەی حوججەتێ عاشقێ د سائب
وەی موبتلێ موددەعیێ کازب
مەردانە دبەخشی جانی ئەرزان
حەیفە کو بمەر کرانی لەرزان
ناوەستی دەمەک ل بەر هەوایێ
ناپوختە تەلەب دکی فەنایێ
ئەو لەز ژ تە ڕا گەلەک قوسوورە
ئەو لەرزە ژ بۆ تە ڕا فوتوورە
بێ سەبری و بێ سوکوون و بێ تاب
لەورا خوە دکی ب زۆری پور تاب
ناپوختەئێ عەیبەکە تەمامە
مەتبووخ دبێژنێ کو خامە
پوختە دسو ژن مەگەر چو جاران
فانی قە نابن ب نوور و ناران
باقی دگەڕن وەکی سەمەندەر
وان جسم دبیتە جانێ ئەنوەر
وێ جسم مونەووەرا مەلەک رووح
بەیزا قەمەرا موقابەلەت یووح
یەک زەررە ژ ئاسمان و عەردان
نەدما کو نەکەت د گەل خەبەردان
ژەڤ ئادەمیێ د ساحب ئەغراز
مەحزا دکر ئحتراز و ئعراز
فکرا خوە دکر ژ ئنس و جانان
سررا خوە دگۆتە بێ زبانان
سەر تا ب قەدەم غەریقێ غەم بوو
نەقشێ دل و جان خیالێ مەم بوو